༢༠༡༥ ཟླ་ ༣ ཚེས་ ༡༨ རེས་གཟའ་ལྷག་པ།
སྔོན་གླེང་།
༄༅། །རང་ཅག་བོད་ཁ་བ་གངས་ཅན་ལྗོངས་ཀྱི་སྐྱེ་འགྲོ་རྣམས་ཀྱི་མེ་ཏོག་གང་ལ་ཕོག་པའི་ལྷ་སྐལ་རྒྱལ་ཀུན་སྙིང་རྗེའི་རང་གཟུགས་འཕགས་མཆོག་འཇིག་རྟེན་དབང་ཕྱུག་སྡོམ་བརྩོན་ངུར་སྨྲིག་གར་གྱི་རྣམ་པར་རོལ་བ། ལྷར་བཅས་སྲིད་ཞིའི་གཙུག་རྒྱན། འཇིག་རྟེན་ཞི་བདེའི་དེད་དཔོན། ས་སྟེང་རྒྱལ་བསྟན་ཡོངས་རྫོགས་ཀྱི་མངའ་བདག ཁམས་གསུམ་ཆོས་ཀྱི་རྒྱལ་པོ། དགོས་པ་དང་དོན་གྱི་སླད་དུ་མཚན་ནས་སྨྲོས་ན། ༸རྗེ་བཙུན་འཇམ་དཔལ་ངག་དབང་བློ་བཟང་ཡེ་ཤེས་བསྟན་འཛིན་རྒྱ་མཚོ་སྲིད་གསུམ་དབང་སྒྱུར་མཚུངས་པ་མེད་པའི་སྡེ་དཔལ་བཟང་པོ་མཆོག་འཇིག་རྟེན་སྐྱེ་འགྲོ་སྤྱི་དང་། ཁྱད་པར་གངས་རིའི་ལྗོངས་ཀྱི་ཉམ་ཐག་པའི་གདུལ་བྱ་རྣམས་ལ་ཐུགས་བརྩེ་བས་ཉེ་བར་དགོངས་ཏེ་བསམ་བཞིན་སྲིད་པ་བཟུང་བ་ནས་ད་ཆ་ཕྱི་ལུགས་དགུང་གྲངས་ ༨༠ ལ་ཕེབས་ཏེ་༸སྐུ་ཡི་གསང་བ་གསུམ་ལ་ཚུལ་བསྟན་སྐུ་གེགས་ཀྱི་མཚན་མ་ཆ་ཕྲ་མོ་ཙམ་ཡང་མ་བཞེས་པར་བདག་ཅག་བོད་འབངས་སྐྱེ་འགྲོ་ཡོངས་ཀྱི་བསོད་ནམས་ཀྱི་དཔལ་དུ་འཚོ་ཞིང་བཞུགས་པ་ནི། ཆེས་ཤིན་ཏུ་རྙེད་པར་དཀའ་བའི་སྐལ་བཟང་གི་གནས་སྐབས་ཤིག་ཡིན་པས་དགའ་སྒོམ་དང། བཀའ་དྲིན་སྙིང་བཅངས་ཀྱིས་རྗེས་དྲན་ཞུ་ཕྱིར་མཛད་འཕྲིན་གྱི་ཆ་ཕྲ་མོ་ཙམ་ཞིག་གླེང་བར་བྱ་རྒྱུའི་ཐོག་མར། ཐུན་མོང་གདུལ་བྱའི་སྣང་ངོར་འཕགས་བོད་ཡུལ་གྲུ་མཐའ་ཡས་པར་རྒྱལ་བློན་པཎ་གྲུབ་སོགས་གང་བཞེད་ལྷུན་གྲུབ་རྒྱུན་མི་ཆད་དུ་འཇུག་པའི་སྤྲུལ་སྒྱུར་བསམ་གྱིས་མི་ཁྱབ་པའི་སྒོ་ནས་མཐའ་ཡས་པའི་གདུལ་བྱ་རྣམས་མངོན་མཐོ་དང་ངེས་ལེགས་ཀྱི་ལམ་བཟང་པོར་བཀྲི་བར་མཛད་པའི་འཕྲིན་ལས་རྟག་ཁྱབ་ལྷུན་གྲུབ་ཀྱི་ངང་ཚུལ་ནི་བསམ་གྱིས་མི་ཁྱབ་ཅིང་བརྗོད་ཀྱིས་མི་ལངས་ཤིང་། ༸རྒྱལ་མཆོག་དགེ་འདུན་གྲུབ་པ་ནས་བཟུང་སྡོམ་བརྩོན་ངུར་སྨྲིག་གར་གྱི་རྣམ་རོལ་དུ་བྱོན། ༸རྒྱལ་མཆོག་ལྔ་པ་ཆེན་པོས་བོད་གཞུང་དགའ་ལྡན་ཕོ་བྲང་པའི་ཆོས་སྲིད་ལུགས་གཉིས་ཀྱི་ཁ་ལོ་མངོན་པར་བསྒྱུར་ཏེ་གངས་ལྗོངས་ཆབ་སྲིད་ཀྱི་གདུགས་དཀར་ཡུག་གཅིག་གི་གྲིབ་བསིལ་འོག་སྐྱེ་འགྲོ་མཐའ་དག་བདེ་བར་འཚོ་ཞིང། རིས་མེད་༸རྒྱལ་བསྟན་རིན་པོ་ཆེ་དར་ཞིང་རྒྱས་པར་མཛད། ལྷག་པར་༸རྒྱལ་མཆོག་བཅུ་བཞི་པ་ཆེན་པོ་གང་ཉིད་ནི་༸རྒྱལ་དབང་གོང་མ་རིམ་བྱོན་གྱི་ཐུགས་བསྐྱེད་སྨོན་ལམ་དུས་སུ་སྨིན་པ་ལྟར། མགོན་མེད་སྙིགས་དུས་ཀྱི་སྐྱེ་འགྲོ་སྤྱི་དང་བྱེ་བྲག་ཏུ་གང་གི་སྐྱོང་ཡུལ་ཆོས་ལྡན་གངས་ཅན་ཞིང་དུ་གཉན་འཕྲང་ཆེ་བའི་དུས་སྐབས་འདི་ལྟ་བུར་སྐུ་ཡི་བཀོད་པ་བཟུང་སྟེ། མཚན་དཔེའི་ལང་ཚོ་ཡོངས་སུ་དར་ཞིང་གསན་བསམ་སྒོམ་གསུམ་དང། འཆད་རྩོད་རྩོམ་གསུམ་སོགས་ཐུན་མོང་དང་ཐུན་མོང་མ་ཡིན་པའི་ཤེས་བྱའི་གནས་མཐའ་དག་མཁྱེན་ཅིང་སྟོན་པ་བླ་ན་མེད་པ་ངེས་པ་དོན་གྱི་གངས་ཅན་མཁས་པ་ཀུན་གྱི་གཙུག་གི་རྒྱན་དང་སྙིང་གི་ནོར་བུར་གྱུར།
ལྷག་པར་རྒྱ་དམར་ཀླ་ཀློའི་དཔུང་ཚོགས་ཀྱིས་བོད་ལྗོངས་སུ་བཙན་འཛུལ་གྱིས་བོད་ཀྱི་སྣོད་བཅུད་ཆགས་འཇིག་གི་མཚམས་ལ་ཉེ་བའི་སྐབས། མགོན་པོ་མཆོག་དགུང་གྲངས་ ༡༦ ལས་མ་ཕེབས་ཀྱང་བོད་ལྗོངས་ལུགས་ཟུང་ཆབ་སྲིད་གསེར་གྱི་འཁོར་ལོ་ཕྱག་མཚན་དུ་བཞེས་འཕྲལ་འཛམ་བུ་གླིང་སྤྱི་འགྲོས་ཀྱི་སྲོལ་བཟང་དང་མཐུན་པའི་མང་གཙོའི་ལམ་ལུགས་གསར་གཏོད་བསྐྱང་རྒྱུའི་དགོངས་བཞེས་བཀའ་དྲིན་ཆེ་བ་ལྟར་དུས་བསྟུན་སྒྱུར་བཅོས་ཀྱི་སྤྱི་ཚོགས་ལེགས་བཅོས་ལས་ཁུངས་གསར་འཛུགས་སོགས་ཕྱག་ལེན་དབུ་འཛུགས་བསྐྱངས་པ་དང་ཆབས་ཅིག་རྒྱ་དམར་བཙན་འཛུལ་བར་ཁ་གཏད་གདོང་ལེན་གནང་སྒོ་སྤྱི་དང། ལྷག་པར་བཙན་འཛུལ་དམག་དཔུང་གིས་གངས་ལྗོངས་བསྟན་སྲིད་མི་རིགས་དང་བཅས་པ་དུས་གཅིག་ལ་རྩ་བརླག་ཏུ་གཏོང་རྒྱུའི་ཧམ་སེམས་དང་ཉེན་ཁའི་གནས་སྐབས་སུ་ལྷུང་སྐབས་གང་ཉིད་ཀྱི་འཚེ་མེད་ཞི་བའི་ཐབས་མཁས་ཐུགས་རྗེའི་མཛད་བྱུས་ཀྱིས་རེ་ཞིག་བོད་མི་ཁྲི་ཕྲག་མང་པོའི་ཚེ་སྲོག་འཐབ་རོལ་དུ་འགྲོ་མི་དགོས་པའི་མི་འཇིགས་པའི་སྐྱབས་སྦྱིན་ཡང་དག་པར་མཛད། འོན་ཀྱང་རྒྱ་ནག་དམག་དཔུང་གི་གདུག་རྩུབ་སྲིད་བྱུས་འོག་བོད་ས་བཙན་ཕྲོགས་དང་བཙན་བཟུང་དབང་གིས་སྐྱབས་བཅོལ་དུ་ཕེབས་དགོས་སུ་གྱུར།
རྒྱ་གར་འཕགས་པའི་ཡུལ་དུ་༸ཞབས་སོར་འཁོད་འཕྲལ་ཐོག་མའི་དགོངས་བཞེས་བཞིན་ཕྱི་ལོ་ ༡༩༦༠ ལོར་ཆོལ་གསུམ་ཆོས་བརྒྱུད་དང་བཅས་པའི་བོད་མི་མང་སྤྱི་འཐུས་འདེམས་བསྐོ་དང་འབྲེལ་རིམ་བཞིན་ཡུལ་དུས་གནས་བབ་དང་མང་ཚོགས་ཀྱི་བསམ་བློའི་ཆུ་ཚད་དང་བསྟུན་མང་གཙོ་ཡང་དག་པའི་ཕྱོགས་སུ་བཀྲི་གནང་མཛད་པ་དང། མང་ཚོགས་ཀྱི་བསམ་འཆར་བསྡུ་བཞེས་དང་བཅས་མ་འོངས་བོད་ཀྱི་རྩ་ཁྲིམས་གཏན་འབེབས་ཡོངས་ཁྱབ་མཛད། བོད་དོན་བདེན་པའི་གནས་ལུགས་འཛམ་གླིང་མཉམ་འབྲེལ་རྒྱལ་ཚོགས་སུ་ཞུ་བསྐུལ་མཛད་དེ་བོད་མིར་འགྲོ་བ་མིའི་ཐོབ་ཐང་དང། རང་ཐག་རང་གཅོད་ཀྱི་ཐོབ་ཐང་དགོས་པའི་གྲོས་ཆོད་རིམ་འཇོག་ཐུབ་པ་དང་། བཙན་བྱོལ་གཞུང་གི་སྒྲིག་འཛུགས་མ་ལག་དང་བཅས་པ་བཀོད་སྒྲིག་དང། བོད་ཀྱི་ཆོས་དང་རིག་གཞུང། གོམས་གཤིས་བཅས་མི་ཉམས་རྒྱུན་འཛིན་དང། བོད་མིའི་ནུས་པ་ཆིག་སྒྲིལ་ཆེད་བོད་མི་རྣམས་གནས་ངེས་མེད་དུ་ཁ་ཐོར་འགྲོ་མི་དགོས་པར་ས་གནས་ཁག་ཏུ་གཞིས་ཆགས་ཀྱི་མཐུན་རྐྱེན་གསར་འཛུགས་མཛད་པ་དང། རྒྱལ་བསྟན་དར་སྤེལ་ཐད་མགོན་པོ་གང་གི་དབུ་ཁྲིད་ལམ་སྟོན་འོག་ཆོས་བརྒྱུད་ཁག་གི་བླ་ཆེན་རྣམ་པ་དང། བླ་སྤྲུལ་མཁན་པོ་དགེ་བཤེས་བཅས་ཞུགས་པའི་ཆོས་ཚོགས་ཐེངས་ ༡༡ པའི་བར་ཚོགས་པ་སོགས་ཀྱིས་རྒྱ་བལ་འབྲུག་གསུམ་དང། ཕྱི་རྒྱལ་ཡུལ་གྲུ་གཞན་གང་སར་རྒྱལ་བསྟན་རིན་པོ་ཆེའི་དབུ་འཕང་དགུང་དུ་བཏེགས་ཤིང་དར་ཞིང་རྒྱས་པར་མཛད་དེ་བོད་བརྒྱུད་ནང་བསྟན་པ་རྣམས་སྔར་ལྷག་དམ་ཚིག་འོ་ཆུ་གཅིག་འདྲེས་དང་། ཕན་ཚུན་དག་སྣང་ནོར་བུའི་འོད་ཀྱིས་ཁྱབ་པར་མཛད་ཅིང་། རྒྱལ་སྤྱིའི་ཆོས་ལུགས་གཞན་ཁག་ལའང་མཛའ་འབྲེལ་གསེར་གྱི་ཟམ་པ་ཉེ་བར་བཙུགས།
མ་འོངས་བོད་ཀྱི་སོན་རྩ་བོད་མི་ན་གཞོན་རྣམས་ལ་བོད་མི་རིགས་ཀྱི་རིག་གཞུང་དང་ངོ་བོ་མ་བརླག་པའི་ཐོག་ནས་དེང་དུས་ཤེས་ཡོན་སློབ་སྦྱོང་སྤྲོད་ཐབས་རྒྱ་གར་གཞུང་ལ་བཀའ་མོལ་མཛད་དོན་བཞིན་གཏན་ཉིན་སློབ་གྲྭ་ཁག་རིམ་འཛུགས་ཀྱིས་ཡིག་རྨོངས་ཀྱི་གནས་ལས་གཙང་མ་གྲོལ་བས་མ་ཚད། ད་ཆ་བོད་མིའི་ཤེས་ཡོན་རིག་གནས་ཆུ་ཚད་འཛམ་གླིང་སྤྱི་འགྲོས་གདན་གྲལ་དུ་འཁོད་ཐུབ་པ།
དཔལ་འབྱོར་ཐད་ལའང་བཟོ་ལས་དང་། ཚོང་ལས། སྤྱི་ཚོགས་བདེ་རྩ་བཅས་ཀྱི་སྡེ་ཚན་ཇེ་མང་རིམ་འཛུགས་སོགས་འདུ་འགོད་ཀྱི་ལས་གཞི་རྒྱ་མི་ཆུང་བ་དང་ཆབས་ཅིག་བོད་ཀྱི་ཐུན་མོང་མ་ཡིན་པའི་ལག་རྩལ་རྣམས་རྒྱུན་འཛིན་དང་ཁྱབ་སྤེལ།
འཕྲོད་བསྟེན་ཆེད་ཐོག་མར་སྨན་རྩིས་ཁང་གསར་འཛུགས་བསྐྱངས་ཏེ་ད་ལྟའི་རང་ལུགས་དང་ཕྱི་ལུགས་ཀྱི་དབུས་དང་ས་གནས་ཀྱི་ལས་ཁུངས་དང་། སྨན་ཁང་བཅས་བརྒྱ་ཕྲག་བརྒལ་བ་འཕེལ་རྒྱས་སུ་ཕྱིན་ཏེ་བོད་མི་ཙམ་མ་ཟད་རྒྱལ་སྤྱིའི་ནང་ཕན་རླབས་ཅི་ཆེ་བྱུང་དང་འབྱུང་བཞིན་པ།
ཕྱི་ལོ་ ༡༩༩༠ ཐམ་པ་ལོར་དམིགས་བསལ་ཚོགས་ཆེན་བསྡུ་བསྐོང་གནང་ཐོག་བཀའ་བློན་དང་སྤྱི་འཐུས་བསྐོ་འདེམས་འོས་བསྡུའི་ལམ་ནས་བྱེད་རྒྱུ་དང། སྤྱི་འཐུས་ཀྱི་གྲངས་ཚད་ཀྱང་སྤར་ཆ་གནང་ཞིང། ༡༩༩༡ ལོར་བཙན་བྱོལ་དུ་གནས་རིང་མང་གཙོའི་ལམ་སྲོལ་དང་མཐུན་པའི་བཅའ་ཁྲིམས་གཏན་འབེབས་དགོས་པའི་ལམ་སྟོན་གསལ་པོར་གནང་བ་བཞིན། ད་ལྟ་བཙན་བྱོལ་བ་འདྲ་འདྲའི་ནང་ནས་མི་འདྲ་བ་མང་གཙོའི་ཀ་བ་གསུམ་ལྡན་གྱི་སྒྲིག་འཛུགས་སྲ་བརྟན་ཕྲ་ཚུགས་སུ་མཛད།
ལྷག་པར་བོད་དོན་བདེན་མཐའ་མྱུར་གསལ་ཡོང་བར་འཚེ་མེད་ཞི་བའི་ཐབས་ལམ་གཞི་རྩར་བཟུང་སྟེ། རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ད་ལྟའི་གནས་སྟངས་ལྟར་གཞིས་ལུས་རྒྱ་ཆེའི་མི་མང་རྣམས་བྲན་བཀོལ་མ་ཡིན་པར། ཆོལ་གསུམ་ཡོངས་རྫོགས་རང་སྲིད་རང་སྐྱོང་ཆོག་པ་བཅས་གནས་དུས་ཁོར་ཡུག་བཅས་ཀྱི་དངོས་ཡོད་གནས་སྟངས་དང་བསྟུན་པའི་ཕན་ཚུན་གཉིས་ཕན་དང། གུ་ཡངས་བཅས་ཀྱི་སྒོ་ནས་འགྲིག་འཇགས་ཡོང་ཐབས་གཙོར་བཟུང་གི་དབུ་མའི་ལམ་གྱི་བཞེངས་ཕྱོགས་སྲིད་བྱུས་ལ་བོད་རྒྱ་ཆེའི་མི་མང་མ་ཟད། འཛམ་གླིང་སྤྱི་ཡོངས་ནས་བསྔགས་བརྗོད་དང་རྒྱབ་སྐྱོར་ཤུགས་ཆེ་འཐོབ་པ། རིམ་བཞིན་བོད་ཆོལ་ཁ་གསུམ་ཁྱོན་ལ་གཟིགས་སྐོར་སྐུ་ཚབ་ཚོགས་པ་སྔ་རྗེས་རིམ་པ་དང། རྒྱ་ནག་ཏུ་བོད་རྒྱ་ཞི་མོལ་གྱི་ཆེད་འབྲེལ་མོལ་གྱི་སྐུ་ཚབ་ཚོགས་ཆུང་རིམ་པ་གཏོང་གནང་མཛད་པ།
ཡུལ་དུས་གནས་སྐབས་ཀྱི་སྐུ་ངལ་མཐའ་དག་ཁྱད་དུ་བསད་ནས་བོད་འབངས་སྐྱེ་དགུའི་བདེ་ཐབས་ལ་ཉིན་མཚན་དུས་དྲུག་ཏུ་ཐུགས་འཁུར་འབད་བརྩོན་སྐྱོང་བཞེས་མཛད་པ་དང། ལྷག་པར་སྟོན་པ་ཐུགས་རྗེ་ཅན་གྱིས་གསུངས་པའི་དམ་པའི་ཆོས་ཀྱི་སྙིང་པོ་སྟོང་ཉིད་སྙིང་རྗེ་ཟུང་དུ་འཇུག་པའི་ལམ་བཟང་ཆེས་ཆེར་གསལ་བར་མཛད་དེ་དུས་རྟག་ཏུ་འཚེ་མེད་ཞི་བའི་མཛད་ཐབས་འབའ་ཞིག་ཉམས་བཞེས་ཀྱིས་བོད་དོན་ལྟ་ཅི་འཛམ་གླིང་ཞི་བདེའི་ཆེད་རྨད་དུ་བྱུང་བའི་མཛད་རྗེས་རླབས་པོ་ཆེ་འཇོག་གནང་མཛད་པ་རྣམས་ཀྱི་འགོག་ཏུ་མེད་པའི་ནུས་མཐུ་ལས་འཛམ་གླིང་ཐོག་དཔལ་དང་གཟི་བརྗིད་ཀྱི་མངོན་པར་མཐོ་ཞིང་སྙན་གྲགས་ཅན་གྱི་ནོ་སྦེལ་ཞི་བདེའི་གཟེངས་རྟགས་ཀྱི་ཆེ་བསྟོད་དེ་བཞིན་རྒྱལ་ཁར་འབུལ་བཞེས་ཀྱིས་གཙོས་གཟེངས་རྟགས་དང་མཚན་གནས་སོགས་ཕྱག་ཁྱེར་བརྒྱ་ཕྲག་དུ་མས་ཆེ་བསྟོད་ཞུས་ཏེ་ཞི་བདེའི་སློབ་དཔོན་ཆེན་པོ་ཏཱ་ལའི་བླ་མ་ཞེས་པའི་མཚན་སྙན་གྱི་གྲགས་པ་ཡངས་པའི་ས་ཆེན་པོ་ལ་རླུང་ལྟར་ཁྱབ།
མགོན་པོ་གང་གིས་འཛམ་གླིང་སྐྱེ་འགྲོ་ཡོངས་ལ་བྱམས་བརྩེ་དང། བཟོད་སེམས། འཇིག་རྟེན་ཀུན་ཁྱབ་འགན་འཁུར་བཅས་ཀྱི་བཀའ་སློབ་ལམ་སྟོན་ཐོག་ནས་འགྲོ་བ་མིའི་རིགས་ཀུན་ལ་ཞི་བདེ་སྤེལ་བའི་ཐུགས་འགན་རླབས་པོ་ཆེ་བཞེས་དང་བཞེས་བཞིན་པ་དང་། ད་དུང་ཆོས་ལ་ཡིད་ཆེས་ཡོད་མེད་ལ་མ་ལྟོས་པར་བཟང་སྤྱོད་ཀྱི་བསླབ་བྱ་ལས་འགྲོ་བ་མི་སྤྱི་དང་། འཛམ་གླིང་ཁོར་ཡུག་དང་བཅས་པར་ཕན་རླབས་ལྡན་པ། དེ་བཞིན་ཆོས་ལུགས་ནང་ཕན་ཚུན་འཆམ་མཐུན་ཡོང་ཐབས་སུ་འཛམ་གླིང་ཆོས་ལུགས་དབུ་འཁྲིད་རྣམ་པའི་ལྷན་དུ་རྒྱ་ཆེ་གུ་ཡངས་ཀྱི་བགྲོ་གླེང་མཛད་དེ་ཕན་ཚུན་དོགས་པ་དང་འགལ་བ་སེལ་ཐབས་ཀྱི་ཐུགས་འགན་བསྐྱེད་བཞེས་ཀྱི་བཀའ་དྲིན་བསྐྱངས་དང་སྐྱོང་བཞིན་པ་སོགས་དམིགས་བསལ་ཐུགས་ཁུར་བསྐྱེད་བཞེས་མཛད་འགན་གསུམ་གྱི་འཕྲིན་ལས་དབྱར་གྱི་ཆུ་བོ་བཞིན་དར་ཞིང་རྒྱས་པ་དང་།
དེང་འཛམ་གླིང་སྤྱི་འགྲོས་མང་གཙོའི་ལམ་སྲོལ་དང་ཡོངས་སུ་མཐུན་ཞིང། བོད་མི་ཡོངས་ཀྱི་འཕྲལ་ཕུགས་བདེ་ཐབས་ཁོ་ནར་ཐུགས་བརྩེའི་དགོངས་བཞེས་བླ་མེད་ཀྱིས་དུས་བབ་ཀྱི་དངོས་ཡོད་གནས་སྟངས་དང་། དགག་དགོས་དུ་མ་དང་བཅས་མ་འོངས་སྔོན་གཟིགས་ཀྱིས་མི་ལོ་བཞི་བརྒྱར་ཉེ་བའི་ལོ་རྒྱུས་ལྡན་པའི་ཆབ་སྲིད་ཀྱི་སྐུ་དབང་ཡོངས་རྫོགས་བོད་ཀྱི་ཡུལ་མི་མང་ཚོགས་རང་ཁོངས་ནས་འོས་འདེམས་བྱས་པའི་འགོ་འཁྲིད་རྣམས་ལ་གསོལ་སྩལ་ལམ་རྩིས་སྤྲོད་མཛད་དེ་བོད་མིའི་སྒྲིག་འཛུགས་ཀྱི་གནས་བབ་དང་། ལྷག་པར་བོད་མིའི་བདེན་དོན་འཐབ་རྩོད་ཀྱི་རྨང་གཞི་དང་མ་འོངས་མདུན་ལམ་བཅས་སྲ་བརྟན་དུ་མཛད་པ་སོགས་མདོར་ན་བོད་གངས་ཅན་པའི་ཆོས་དང་། རིག་གཞུང་། ཆབ་སྲིད། མི་རིགས་བཅས་པར་རང་དབང་དང་། ཞི་བདེ། མཉམ་གནས་བཅས་ཀྱི་དར་རྒྱས་ཡུན་གནས་ཡོང་ཐབས་སོགས་རླབས་ཆེན་མཛད་འཕྲིན་བསྐྱངས་དང་སྐྱོང་བཞིན་པ་ནི། རང་ཅག་བོད་མི་ཡིན་ནོ་ཅོག་གིས་བཀའ་དྲིན་གསབ་ཐབས་བྲལ་བ་དང་། དུས་ནམ་ཡང་བརྗེད་མི་སྲིད་པར་བཀའ་དྲིན་བསམ་ཤེས་ཞུ་དགོས་པ་ཞིག་ཆགས་ཡོད། འདས་མ་ཐག་པའི་ཕྱི་ལོ་ ༢༠༡༤ ལོ་དེ་བཞིན་བོད་མིའི་སྒྲིག་འཛུགས་བཀའ་ཤག་གི་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་བརྩི་སྲུང་ཞུས་ཡོད་ལ། ད་ལམ་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་འདི་ཐོག་ནས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་མགོན་པོ་གང་ཉིད་ཀྱིས་བསྟན་འགྲོའི་དོན་དུ་རླབས་ཆེན་གྱི་མཛད་འཕྲིན་བསྐྱངས་གནང་མཛད་པ་སྤྱི་དང་། བྱེ་བྲག་རང་ཅག་ཁ་བ་རི་པའི་བསྟན་འགྲོའི་དོན་དུ་སྐུ་གསུང་ཐུགས་ཀྱི་མཛད་འཕྲིན་རྒྱ་ཆེ་རྒྱུན་མི་ཆད་པར་སྐྱོང་བཞེས་མཛད་པའི་བཀའ་དྲིན་རྣམས་སྙིང་དབུས་སུ་བཅངས་ཏེ་ཐུགས་རྗེ་དང་། བཀའ་དྲིན་བླ་ན་མེད་པ་ཆེ་ཞེས་ཞུ་རྒྱུ་མ་ཟད། ད་དུང་བསྐལ་པ་རྒྱ་མཚོའི་བར་དུ་ཕ་མས་བུ་ཚ་ཇི་བཞིན་བརྩེ་ཆེན་ཐུགས་རྗེའི་ཀློང་ནས་དུས་ནམ་ཡང་འདོར་བ་མེད་པར་རྗེས་སུ་གཟུང་དུ་གསོལ་ཞེས་ཞུ་རྒྱུའི་གྲོས་ཆོད་ཅིག་འཇོག་དགོས་པ་གལ་ཆེ་དོན་ཆེན་དུ་མཐོང་།
གྲོས་ཆོད།
༡། མགོན་པོ་མཆོག་ཉིད་ཀྱིས་སྐུ་ན་ཤིན་ཏུ་ཕྲ་བའི་དུས་ནས་བོད་བསྟན་སྲིད་ཀྱི་ཐུགས་འགན་བདག་གིར་བཞེས་པ་ནས་ད་ཆ་ཕྱི་ལུགས་དགུང་གྲངས་ ༨༠ བརྒལ་བར་ཕེབས་ཀྱང་སྐྱེ་འགྲོ་སྤྱི་དང་བྱེ་བྲག་བོད་མི་རྣམས་ལ་འཕྲལ་དང་ཡུན་གྱི་བདེ་སྐྱིད་ཕུན་སུམ་ཚོགས་པ་འབྱུང་སླད་སྐུ་ངལ་བརྒྱ་ཕྲག་ལྷུར་བཞེས་ཀྱིས་གསང་གསུམ་མཛད་འཕྲིན་བཟང་པོ་མུ་མཐའ་མེད་པ་བསྐྱངས་དང་སྐྱོང་བཞིན་པ་རྣམས་ལ་གུས་ཅག་བོད་མི་སྤྱི་བོ་གནམ་བསྟན་ཡོངས་ཀྱིས་ཐུགས་རྗེ་དང་བཀའ་དྲིན་བླ་ན་མེད་པ་ཆེ་ཆེ་ཆེ་ཞེས་ཞུ་རྒྱུ་དང་། དེ་ལྟའི་བཀའ་དྲིན་རྣམས་དུས་རྟག་ཏུ་བརྗེད་མེད་སྙིང་བཅངས་ཞུ་རྒྱུ།
༢། བདག་ཅག་བོད་མི་རྣམས་ཀྱི་བདེ་སྐྱིད་དང་། བསྟན་འགྲོའི་དགེ་ལེགས་ཀྱི་ཆ་ཕྲ་མོ་ཚུན་ཆད་མགོན་པོ་མཆོག་ཉིད་ཀྱི་སྐུ་ཡི་གསང་བ་གསུམ་གྱི་མཛད་འཕྲིན་དང་རྗེས་སུ་འགྲོ་ལྡོག་གྲུབ་པས་གངས་ཅན་ལྷ་མི་ཡོངས་ཀྱི་བསོད་ནམས་ཀྱི་ཞིང་དུ་གང་སྐུ་བསྐལ་པ་རྒྱ་མཚོར་རྟག་ཏུ་བརྟན་ཅིང་། མཛད་འཕྲིན་མུ་མཐའ་མེད་པ་སྐྱོང་བཞེས་ཡོང་བའི་གསོལ་འདེབས་རྩེ་གཅིག་ཏུ་ཞུ་རྒྱུ།
༣། དེང་སྙིགས་ལྔའི་རང་མདངས་ཆེས་ཆེར་བདོ་བའི་དུས་འདིར་མི་ཡི་བསམ་སྤྱོད་གཅུན་མི་ཐུབ་པའི་ངང་ཚུལ་འདི་ལྟར་ལགས་ཀྱང་། ཐུགས་བརྩེ་བ་ཆེན་པོས་དགོངས་ཏེ་སྐྱེ་འགྲོ་སྤྱི་དང་། བྱེ་བྲག་གངས་ཅན་ཁ་བ་རི་པའི་སྐྱེ་འགྲོ་རྣམས་ཚེ་རབས་ནས་ཚེ་རབས་བར་རྗེས་སུ་འཛིན་ཅིང་། བླང་དོར་གྱི་ཕེབས་སྒོ་ནམ་ཡང་གཡེལ་བ་མེད་པར་བཀའ་དྲིན་སྐྱོང་བཞེས་ཡོང་བའི་གསོལ་བ་ཕུར་ཚུགས་སུ་འདེབས་རྒྱུ།
༤། བདག་ཅག་གཞིས་བྱེས་བོད་མི་ཡོངས་ཀྱིས་དམ་ཚིག་འོ་ཆུ་གཅིག་འདྲེས་ངང་མགོན་པོ་གང་གི་ཐུགས་བརྩེའི་བཀའ་སློབ་ལམ་སྟོན་རྣམས་དུས་རྟག་ཏུ་སྙིང་བཅངས་ཀྱིས་ལག་བསྟར་ཉམས་ལེན་ཞུ་རྒྱུ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༥ ཟླ་ ༣ ཚེས་ ༡༧ ལ།།
གོང་གསལ་བཀའ་དྲིན་རྗེས་དྲན་གྱི་གཞུང་འབྲེལ་གྲོས་ཆོད་འདི་བཞིན་སྐབས་ ༡༥ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༩ པའི་ཐོག་སྤྱི་མོས་ཀྱིས་གཏན་འབེབས་གནང་། ཕྱི་ལོ་ ༢༠༡༥ ཟླ་ ༣ ཚེས་ ༡༧ ལ།།
