༢༠༡༥ ཟླ་ ༣ ཚེས་ ༩ རེས་གཟའ་ཟླ་བ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་རཱཇ་པུར་བོད་ཀྱི་བུད་མེད་མཉམ་ལས་བཟོ་གྲྭ་དབུ་བརྙེས་ནས་ལོ་ངོ་ ༥༠ འཁོར་བའི་དུས་སྟོན་ཐོག་གསུང་འཕྲིན་སྩལ་དོན། རཱ་ཇ་པུར་བུད་མེད་མཉམ་ལས་བཟོ་གྲྭ་ཐོག་མར་ཕྱི་ལོ་ ༡༩༦༥ ལོར་བཙུགས་ནས་ད་ལམ་མི་ལོ་ ༥༠ འཁོར་བའི་དུས་དྲན་ལ་འགོ་ལས་ཚང་མར་བཀྲ་ཤིས་བདེ་ལེགས་ཡོད།
ཕྱི་ལོོ་ ༡༩༦༥ ཟླ་ ༡ ཚེས་ ༡ ཉིན་ཁྱིམ་ཚང་ ༡༧ ལས་གྲུབ་པའི་མཉམ་ལས་བཟོ་གྲྭ་ཞིག་ཕྲེང་རིང་རིན་ཆེན་སྒྲོལ་མ་དང་། ས་སྐྱའི་རྗེ་བཙུན་འཆི་མེད་ལགས། ནོར་ཡོན་བདེ་དབང་། རྒྱས་སྟོང་ཕུན་ཚོགས་སྒྲོལ་མ། ཟླ་སྒྲོན་སོགས་གཙོ་གྱུར་བུད་མེད་ཚོགས་པའི་རྒྱུན་ལས་ཁག་གཅིག་ནས་གཙོ་འགན་བླངས་ཏེ་འཛུགས་གཉེར་བྱས་ནས་ཐོག་མར་བསང་ཁུག་དང་། བོད་ལྷམ། བལ་གྱི་སྟོད་གོས་སོགས་ལག་ཤེས་བཟོ་ལས་གྱི་ཐོན་སྐྱེད་ཚོང་བསྒྱུར་བྱས་པ་དང་། རིམ་པས་བཟོ་ལས་པ་མང་དུ་སོང་བ་དང་བསྟུན་རུམ་གདན་འཐག་ལས་དང་། འཚེམ་བཟོའི་ཐོན་སྐྱེད་འགོ་བཙུགས་ཏེ་ད་བར་གནས་སྟངས་མི་དམན་ཙམ་བྱུང་ཡོད་པ་ནི་འབྲེལ་ཡོད་རོགས་ཚོགས་ཁག་གི་མཐུན་འགྱུར་རྒྱབ་སྐྱོར་དང་། འགོ་ལས་ཚང་མས་ཁུར་མཉམ་ལེན་གྱིས་འབད་བརྩོན་བྱས་པའི་གྲུབ་འབྲས་ཡིན་པས་ཚང་མར་ལེགས་སོ་བརྗོད་རྒྱུ་ཡིན།
སླད་ཀྱང་ད་ཡོད་ཀྱི་རྨང་གཞིའི་ཐོག་ཐོན་སྐྱེད་ཡར་རྒྱས་ཡོང་ཐབས་དང་། ལས་དོན་གང་ཅི་ཕར་ཁག་ཚུར་དཀྲི་མ་བྱས་པར་ཚང་མས་ཁུར་འགན་སྔར་ལྷག་མཉམ་ལེན་དང་འབྲེལ་རང་ཁོངས་བཟོ་མི་རྒས་གཅོང་ཉམ་ཐག་རིགས་ལ་ལྟ་སྐྱོང་མི་ལྷོད་པ་དགོས་གལ། སྐྱབས་སྨོན་བཅས། ཤཱཀྱའི་དགེ་སྦྱོང་ཆོས་སྨྲ་བ་ཏཱ་ལའི་བླ་མ་བསྟན་འཛིན་རྒྱ་མཚོས། རབ་བྱུང་བཅུ་བདུན་པའི་ཤིང་ལུག་ཟླ་ ༡ ཚེས་ ༡༢ ཕྱི་ལོ་ ༢༠༡༥ ཟླ་ ༣ ཚེས་ ༢ ལ།།
