༢༠༡༥ ཟླ་ ༢ ཚེས་ ༢༥ རེས་གཟའ་མིག་དམར།

༄༅། །ལྷོ་ཨ་མི་རི་ཁའི་གླིང་ཆེན་ཁུལ་གྱི་རྒྱལ་ཁབ་རྣམས་ལ་འབྲེལ་སྐྱོང་བྱེད་པོར་ད་བར་བྱང་ཨ་རིའི་སྐུ་ཚབ་དོན་གཅོད་ལས་ཁུངས་ནང་ལྷོ་ཨ་མི་རི་ཁའི་འབྲེལ་མཐུད་པ་ཞེས་པའི་མིང་གནས་ཅན་གྱི་འགན་འཛིན་ལས་བྱེད་གཅིག་ཡོད་མུར། འདས་པའི་ལོ་གཉིས་ནང་ལྷོ་ཨ་མི་རི་ཁའི་སྐུ་ཚབ་དོན་གཅོད་ལས་ཁུངས་ཤིག་ཟུར་འཛུགས་གནང་རྒྱུའི་ཐོག་རྟོག་ཞིབ་དང་འཆར་འགོད་ལས་དོན་རིམ་པར་ཞུས་འབྲས་སུ།
ཕྱི་ལོ་ ༢༠༡༥ ཟླ་ ༤ ཚེས་ ༡ ནས་ལྷོ་ཨ་མི་རི་ཁའི་གླིང་ཆེན་ཁུལ་གྱི་རྒྱལ་ཁབ་དང་ས་ཁུལ་རྣམས་ཀྱི་ཆེད་སྦ་ར་ཛིལ་(Brazil) དུ་བོད་ཀྱི་རིག་གཞུང་ཁང་ (Tibet House Brazil) གི་ངོ་བོར་ལྷོ་ཨ་མི་རི་ཁའི་སྐུ་ཚབ་དོན་གཅོད་ལས་ཁུངས་ཤིག་གསར་འཛུགས་གནང་རྒྱུའི་ཐག་གཅོད་གནང་འདུག