༢༠༡༥ ཟླ་ ༢ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༥ ཟླ་ ༢ ཚེས་ ༢༣ ཉིན་བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་སུད་སི་གྲོང་ཁྱེར་ཇི་ནི་ཝའི་ནང་། ཇི་ནི་ཝའི་ལྷན་ཚོགས་ ༢༠༡༥ ཞེས་པའི་ནང་ཕེབས་ནས་འགྲོ་བ་མིའི་ཐོབ་ཐང་དང་མང་གཙོ། ཞེས་པའི་བརྗོད་གཞིའི་ཐོག་གི་ལྷན་ཚོགས་ཉིན་དང་པོ་དབུ་འབྱེད་སྐབས་བོད་ནང་གི་ཛ་དྲག་གནས་སྟངས་སྐོར་གསལ་བཤད་ཞིབ་ཕྲ་གནང་འདུག དེ་ཡང་སྐབས་དེར་བཀའ་བློན་མཆོག་གིས་གསུང་བཤད་གནང་དོན།
རྣམ་པ་ཚོའི་ཁྲོད་དུ་ཕྱི་ལོ་ ༢༠༠༩ ནས་ད་བར་བོད་ནང་དུ་བོད་མི་ ༡༣༥ རང་ལུས་མེར་སྲེག་བཏང་བའི་གནས་ཚུལ་སྐོར་ཤེས་མཁན་ག་ཚོད་ཡོད་དམ། བོད་མི་དེ་དག་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་བོད་མིའི་ཐོག་དམ་བསྒྲགས་ཅན་གྱི་སྲིད་བྱུས་ལག་བསྟར་བྱས་པ་དེར་ངོ་རྒོལ་རྔམ་སྟོན་ཆེད་བོད་མི་དེ་དག་གིས་རང་ལུས་མེར་སྲེག་བཏང་ནས་ཞི་རྒོལ་བྱས་ཡོད། རང་ལུས་མེར་སྲེག་བཏང་ཟེར་ན་རང་གི་ལུས་པོ་མེར་བསྲེག་རྒྱུ་དེ་རེད། བོད་མི་དེ་དག་བོད་ཆོལ་ཁ་གསུམ་ནས་ཡིན་པ་མ་ཟད། ལོ་ན་རྒན་དར་གཞོན་གསུམ་གྱི་དགེ་འདུན་པ་དང་བཙུན་མ། འབྲོག་པ། ཞིང་པ། སློབ་ཕྲུག ཤེས་ལྡན་མི་སྣ་སོགས་ཕོ་མོ་ཁྱད་མེད་ཡོད། རྒྱ་ནག་གཞུང་གིས་ད་བར་བོད་ནང་བཙན་འཛུལ་བྱས་ནས་མི་ལོ་ ༥༠ ཕྱིན་ཡོད་ཀྱང་། བོད་འདིས་འཛམ་གླིང་ནང་རང་དབང་དང་དྲང་བདེན། དེ་བཞིན་སོ་སོའི་ཆེས་མཐོང་གི་དོན་དུ་འཚེ་མེད་ཞི་བའི་ལམ་ནས་འཐབ་རྩོད་ཀྱི་ལས་འགུལ་སྤེལ་མཁན་ཞིག་མཚོན་བཞིན་ཡོད་པ་མ་ཟད།
བོད་མིའི་འཐབ་རྩོད་ནི་འཚེ་བ་མེད་པའི་ལམ་ལ་བརྟེན་ནས་འཐབ་རྩོད་བྱེད་མཁན་དུས་ཡུན་རིང་ཤོས་གྲས་ཤིག་ཆགས་ཡོད། དེ་ཡང་རྒྱ་ནག་གཞུང་གིས་གང་ཟག་སྒེར་གྱི་འགྲོ་བ་མིའི་ཐོབ་ཐང་བརྡལ་བཤིག་བཏང་བའི་གནས་ཚུལ་དེ་འདྲ་ཧ་ཅང་མང་པོ་ཡོད་པའི་ཁྲོད་པཎ་ཆེན་དགེ་འདུན་ཆོས་ཀྱི་ཉི་མའི་གནས་སྟངས་སྐོར་ལ་གཟིགས་སྐབས་བོད་ནང་དེང་སྐབས་ཆོས་དད་རང་དབང་ཇི་ཙམ་ཡོད་མེད་ཤེས་རྟོགས་ཐུབ་རྒྱུ་རེད། པཎ་ཆེན་དགེ་འདུན་ཆོས་ཀྱི་ཉི་མ་ཁོང་ནི་འཛམ་གླིང་ནང་གི་ཆབ་སྲིད་བཙོན་པ་ལོ་ན་ཆུང་ཤོས་ཤིག་ཡིན། ཁོང་གི་སྐོར་ཞིབ་ཕྲ་ངས་གསང་ཉིན་ཞུ་རྒྱུ་ཡིན། སྤྱིར་ཁོང་དགུང་གྲངས་དྲུག་ལ་སོན་སྐབས་༸གོང་ས་ཏཱ་ལའི་བླ་མ་མཆོག་གིས་པཎ་ཆེན་སྐུ་ཕྲེང་ ༡༡ པར་ངོས་འཛིན་མཛད་ནས་ཉིན་ཤས་ལས་མ་སོང་བར་གར་སོང་ཆ་མེད་དུ་གྱུར་ཡོད། ཁོང་ནི་བོད་བརྒྱུད་ནང་བསྟན་གྱི་བླ་ཆེན་མཐོ་ཤོས་གྲས་ཤིག་ཡིན། འདི་ལོ་ཕྱི་ལོ་ ༢༠༡༥ ལོ་འདི་ནི་ཁོང་གར་སོང་ཆ་མེད་དུ་གྱུར་ནས་ད་བར་མི་ལོ་ ༢༠ འཁོར་བའི་དུས་དྲན་ལ་སྲུང་བརྩི་ཞུ་རྒྱུ་རེད། ཁོང་དང་འདྲ་བའི་བོད་མི་གཞན་གར་སོང་ཆ་མེད་དུ་གྱུར་བ་དང་འཛིན་བཟུང་བཀག་ཉར་བྱས་པ། རྡུང་བརྡེག་མནར་གཅོད་ཕོག་པའི་གནས་ཚུལ་གཏུད་མར་འབྱོར་སྐབས་རྒྱ་ནག་གཞུང་གིས་བོད་མིའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་ཇི་ཙམ་གཏོང་བཞིན་ཡོད་པ་ང་ཚོར་དྲན་སྐུལ་ཡང་ཡང་གཏོང་བཞིན་འདུག ངས་བོད་མིའི་སྒྲིག་འཛུགས་ཀྱི་ཚབ་ཞུས་ནས་འདིར་བཅར་སྐབས་ངས་རང་དབང་ལྡན་པའི་འཛམ་གླིང་ས་ཕྱོགས་གང་སར་བོད་མིའི་མགྲིན་ཚབ་ཞུ་བཞིན་ཡོད། ངས་ལོ་ལྟར་རྒྱལ་ཁབ་འགའ་ཤས་ནང་བསྐྱོད་ནས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་དྲིལ་བསྒྲགས་བྱེད་བཞིན་ཡོད།
བརྙན་འཕྲིན་གཟིགས་ཆེད་འདིར་གནོན།
དེ་བས་གལ་ཆེ་བའི་གནད་དོན་ཞིག་ནི་བོད་མི་ཚོས་འཚེ་མེད་ཞི་བ་དང་གྲོས་མོལ་གྱི་ལམ་ནས་བོད་ཀྱི་གནད་དོན་སེལ་ཐབས་ཆེད་དབུ་མའི་ལམ་གྱི་སྲིད་བྱུས། ཞེས་པ་དེ་ཡིན། དབུ་མའི་ལམ་གྱི་སྲིད་བྱུས་སྐོར་དེ་འཛམ་གླིང་མི་མང་ཚོས་མ་ཤེས་ན་བསམས་ནས་དེའི་སྐོར་རྒྱ་ནག་གཞུང་ཕྱོགས་ནས་གསང་རྒྱ་བྱེད་བཞིན་ཡོད། དེར་བརྟེན་མི་མང་པོ་ཞིག་གིས་དབུ་མའི་ལམ་གྱི་སྲིད་བྱུས་སྐོར་མཁྱེན་གྱི་མེད། སྲིད་བྱུས་འདི་ནི་༸གོང་ས་ཏཱ་ལའི་བླ་མ་མཆོག་གིས་ལམ་སྟོན་མཛད་པ་བཞིན་དཀའ་རྙོག་དེ་དག་འཚེ་མེད་ཞི་བ་དང་གྲོས་མོལ་གྱི་ཐབས་ལམ་བརྒྱུད་ཕྱོགས་གཉིས་ལ་ཕན་པའི་ཐབས་ལམ་ཞིག་ཆགས་ཡོད། བོད་ཀྱི་གནད་དོན་ནི་དྲང་བདེན་དང་དྲག་པོའི་སྟོབས་ཤུགས་དབར་གྱི་འཐབ་རྩོད་གཅིག་ཆགས་ཡོད། ང་ཚོས་རྒྱ་ནག་གཅིག་བསྡུས་དབང་འཛིན་གྱི་རིང་ལུགས་ཡ་ང་རྙིང་རྗེ་མེད་མཁན་དང་འབྲེལ་བ་བྱེད་དགོས་ཀྱི་ཡོད། ཁོ་པ་ཚོར་འཁྱོག་བཤད་ཀྱི་དྲིལ་བསྒྲགས་ལོག་པ་སྤེལ་རྒྱུའི་ནུས་པ་ཧ་ཅང་ཆེན་པོ་ཡོད། ཁོ་པ་ཚོས་བོད་ཀྱི་གནད་དོན་སྐོར་དུས་རྟག་ཏུ་གསང་བ་བྱས་ནས་སྦས་ཐབས་བྱེད་བཞིན་ཡོད། དེར་བརྟེན་ཕྱི་ཕྱོགས་ནས་བོད་ནང་གནས་ཚུལ་འགྲོ་མ་ཐུབ་པ་མ་ཟད། བོད་ནང་གི་གནས་ཚུལ་ཕྱི་ལ་འབྱོར་ཐུབ་ཀྱི་མེད། ངས་མཐར་ཁྱེད་རྣམ་པར་རེ་འདུན་ཞིག་ཞུ་རྒྱུ་ཡོད་པ་ནི། འཛམ་གླིང་ནང་དཀའ་སྡུག་མྱོང་བཞིན་པའི་མི་མང་རྣམས་མ་བརྗེད་པ་བྱས་ནས་ཁོང་ཚོར་གདུང་སེམས་མཉམ་སྐྱེའི་རྒྱབ་སྐྱོར་ཞུ་རྒྱུ་ཧ་ཅང་གལ་ཆེན་པོ་ཆགས་ཡོད། ལྷག་པར་ལོ་ངོ་ལྔ་བཅུ་ལྷག་སོང་ཟིན་པའི་བོད་དོན་འཐབ་རྩོད་ལྟ་བུ་འཐབ་རྩོད་ཧ་ཅང་ཡུན་རིང་སོང་བར་སྣང་ཆུང་དུ་མ་བཏང་བར་རྒྱབ་སྐྱོར་གནང་རྒྱུ་དེ་བས་གལ་ཆེ་བ་ཆགས་ཡོད།
དེ་རིང་ཚོགས་འདུ་གྲོལ་རྗེས་ཁྱེད་ཚོས་དོ་སྣང་གནང་རོགས་ཞེས་ངས་འབོད་སྐུལ་ཞུ་རྒྱུའི་གནད་དོན་གཙོ་བོ་གཅིག་ནི། རྒྱ་ནག་གཞུང་གིས་དུས་རྟག་ཏུ་འཛམ་གླིང་ཕྱི་ཕྱོགས་ནས་ཤེས་རྟོགས་མེད་པར་གསང་ཉར་བྱ་འདོད་པའི་དབུ་མའི་ལམ་གྱི་སྲིད་བྱུས་སྐོར་དེ་ཡིན། ང་ཚོས་དབུ་མའི་ལམ་གྱི་སྲིད་བྱུས་འོག་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་འོག་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་གི་གནས་བབ་གཅིིག་ཐོབ་ཐབས་བྱེད་བཞིན་ཡོད། དེ་འདྲ་བྱུང་ན་བོད་མིའི་རིག་གཞུང་གི་ངོ་བོ་དང་ཆེས་མཐོང་སླར་གསོ་ཡོང་ངེས་ཡིན། ཞེས་གསུངས་ཡོད། སྤྱིར་ཇི་ནི་ཝའི་ལྷན་ཚོགས་ ༢༠༡༥ ཞེས་པ་ (Geneva Summit 2015) འདི་རིང་མིན་སུད་སི་གྲོང་ཁྱེར་ཇི་ནི་ཝའི་ནང་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་གི་ལོ་འཁོར་ཚོགས་ཆེན་ (United Nations Human Rights Council) མ་འཚོགས་སྔོན་དུ་ཚོགས་འདུག་པ་དང་། སྐབས་དེར་ཕྱི་དྲིལ་བཀའ་བློན་མཆོག་གིས་གཙོས་འགྲོ་བ་མིའི་ཐོབ་ཐང་རྩོད་ལེན་པ་དང་། གསར་འགོད་པ། སློབ་ཕྲུག་ཚོགས་པའི་ཚོགས་གཙོ། དེ་བཞིན་མང་གཙོ་དོན་གཉེར་བ་སོགས་མི་གྲངས་བརྒྱ་ཕྲག་འདུ་འཛོམས་བྱུང་འདུག ལྷན་ཚོགས་འདི་ནི་གཞུང་འབྲེལ་མིན་པའི་འགྲོ་བ་མིའི་ཐོབ་ཐང་རྩོད་ལེན་པའི་ཚོགས་པ་ ༢༠ མཉམ་རུབ་ཐོག་གོ་སྒྲིག་གནང་བ་ཞིག་ཡིན་འདུག
