ཕྱི་ལོ་ ༢༠༡༥ ཟླ་ ༢ ཚེས་ ༦ རེས་གཟའ་པ་སངས།
༄༅། །ཕྱི་ལོ་ ༢༠༡༥ ཟླ་ ༢ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཨ་རིའི་རྒྱལ་ས་ཝ་ཤིང་ཊོན་ཌི་སིར་རྒྱལ་ཡོངས་སྨོན་ལམ་གསོལ་སྟོན་དུ་གདན་ཞུ་ལྟར་ཆིབས་སྒྱུར་བསྐྱངས་ཡོད།
དེ་ཡང་རྒྱལ་ཡོངས་སྨོན་ལམ་གསོལ་སྟོན་ཐོག་ཨ་རིའི་སྲིད་འཛིན་ཨོ་བྷ་མ་མཆོག་གིས་ངས་དམིགས་བསལ་དགའ་བསུ་ཞུ་འདོད་པ་གཅིག་ནི་ངའི་སྙིང་ཉེ་བའི་གྲོགས་པོ་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་ཡིན། ཁོང་ནི་བྱམས་བརྩེ་ཉམས་ལེན་གནང་མཁན་གྱི་དཔེ་མཚོན་རྩེ་ཕུད་ཅིག་ཡིན་པ་མ་ཟད། ང་ཚོར་འགྲོ་བ་མིའི་རང་དབང་དང་
ཆེ་མཐོང་གི་ཆེད་དུ་གླེང་སློང་བྱ་རྒྱུར་བློ་སྤོབས་སྐྱེ་གི་ཡོད། དེ་སྔོན་༸གོང་ས་མཆོག་ཕོ་བྲང་དཀར་པོའི་ནང་ལ་གདན་འདྲེན་ཞུ་རྒྱུའི་གོ་སྐབས་བཟང་པོ་ཐེངས་ཁ་ཤས་བྱུང་ལ། དེ་རིང་༸གོང་ས་༸སྐྱབས་མགོན་ཆེན་པོ་མཆོག་རྒྱལ་ཡོངས་སྨོན་ལམ་གྱི་མཛད་སྒོར་ལྷན་ཞུགས་མཛད་པར་དགའ་ཚོར་ཆེན་པོ་བྱུང་། ཞེས་སོགས་ཀྱི་གསུང་བཤད་གནང་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཨ་རིའི་སྲིད་འཛིན་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཆེས་བསྟོད་དང་དགའ་བསུ་ཞུས་པར་བསྔགས་བརྗོད་དང་སྦྲགས། ༸གོང་ས་༸སྐྱབས་མགོན་ཆེན་པོ་མཆོག་གིས་འཛམ་གླིང་ནང་ཆོས་ལུགས་མཐུན་སྒྲིལ་དང་། ཆོས་ལུགས་དང་མ་འབྲེལ་བའི་བཟང་སྤྱོད་གོང་མཐོར་གཏོང་ཆེད་རླབས་ཆེན་གྱི་མཛད་འཁུར་བཞེས་བཞིན་པ་དེས་འགྲོ་བ་མིར་བཟང་ཕྱོགས་ཀྱི་ཤུགས་རྐྱེན་ཞིག་ཐེབས་ངེས་ཡིན་པ་ཡིད་ཆེས་ཡོད་ཅེས་དང་། ལྷན་འཛོམས་དེས་ཨ་རིའི་གཞུང་མང་གཉིས་ནས་རང་དབང་དང་མང་གཙོའི་སྲུང་སྐྱོབ་ཐད་དམ་བཅའ་མུ་མཐུད་རྒྱུན་འཛིན་བྱེད་བཞིན་པ་མཚོན་གྱི་ཡོད་ཅེས་གསུངས་འདུག
སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དང་། ཨ་རིའི་སྲིད་འཛིན་ཨོ་བྷ་མ་མཆོག་རྣམ་གཉིས་དབར་དེ་སྔ་ཕྱི་ལོ་ ༢༠༡༠ དང་། ༢༠༡༡། ༢༠༡༤ ། བཅས་ལ་མཇལ་འཕྲད་མཛད་ཡོད།།
