ཕྱི་ལོ་ ༢༠༡༥ ཟླ་ ༢ ཚེས་ ༦ རེས་གཟའ་ཕུར་བུ།
༄༅། །ཕྱི་ལོ་ ༢༠༡༥ ཟླ་ ༢ ཚེས་ ༥ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བར་བརྒལ་གྱི་གནས་སྟངས་འོག་གི་སྤྱི་ཚོགས་ཁག་གི་འཛུགས་བསྐྲུན་ཞེས་པའི་ཚོགས་པས་གདན་ཞུས་ལྟར། ཧ་ཡཏ་མགྲོན་ཁང་ ParkHyatt གི་ཚོགས་ཁང་དུ་ཨ་རིའི་ཁ་ཆེའི་སྤྱི་ཚོགས་ཀྱི་འགོ་ཁྲིད་གནད་ཡོད་ཁག་གཅིག་དང་ལྷན་དུ་༼བྱ་སྤྱོད་ངོ་མའི་ཐོག་གི་ཞབས་ཞུ།༽ཞེས་པའི་བརྗོད་གཞིའི་ཐོག་མཁས་པའི་བགྲོ་གླེང་གི་ཚོགས་མགོན་དུ་ཆིབས་སྒྱུར་བསྐྱངས་ཡོད།
དེ་ཡང་བགྲོ་གླེང་གཙོ་སྐྱོང་བས་༸གོང་ས་མཆོག་ལ་ཁ་ཆེའི་ཆོས་དད་པ་གཙོ་བོར་གྱུར་བའི་མི་མང་ཚོས་སྤྱི་ཚོགས་ཞབས་ཞུའི་ལས་དོན་བྱེད་ཕྱོགས་སྐོར་ལ་བཀའ་སློབ་ལམ་སྟོན་གནང་རོགས་ཞེས་ཞུས་པར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། སྐབས་རེ་ཁ་ཆེའི་ཁྲོད་མི་ངན་འགའ་ཤས་ཀྱིས་སྤྱོད་པ་ངན་པ་བྱས་པའི་དོན་རྐྱེན་ལ་བརྟེན་ནས་འཛམ་གླིང་མི་མང་གིས་
ཁ་ཆེའི་ཆོས་ཀྱི་ལྟ་གྲུབ་དེ་དྲག་སྤྱོད་ཀྱི་རང་བཞིན་ཅན་ཞིག་རེད་བསམས་པ་ནི་ནོར་འཁྲུལ་གྱི་ལྟ་སྟངས་ལས་བདེན་པ་མ་རེད། ཅེས་དང་། དེང་སང་སི་རི་ཡ་དང་ཨི་རག་ནང་ཁ་ཆེ་བས་དྲག་སྤྱོད་སྤེལ་བཞིན་ཡོད་པ་དེས་ཁ་ཆེའི་ཆོས་ལ་མཚན་ཤས་བཟོ་བཞིན་ཡོད། མི་ངན་དེ་ཚོ་འཇི་ཧཏ་རེད་ཅེས་བརྗོད་ཀྱི་ཡོད་ཀྱང་། འཇི་ཧཏ་ཡི་དོན་དག་དངོས་མ་ནི་དེ་འདྲ་མ་རེད། ངོས་ནས་དེ་སྔ་འཇི་ཧཏ་ཞེས་པའི་ཐོག་ལ་རྒྱ་གར་གྱི་གྲོགས་པོ་དང་། ཁ་ཆེའི་ཆོས་ལུགས་རིག་པ་བ་ཅིག་ལ་བཀའ་འདྲི་ཞུས་པ་ཡིན། དེའི་དོན་ནི་སོ་སོའི་ཉོན་མོངས་དུག་གསུམ་བཅོམ་པའི་དོན་ཡིན་སྟབས་ཆོས་ལུགས་ཉམས་ལེན་པ་ཚོས་ཉིན་ལྟར་ཉོན་མོངས་རྩ་མེད་བཟོ་བའི་བྱ་སྤྱོད་ལག་བསྟར་བྱེད་ཀྱི་ཡོད་པ་རེད།
དེང་སང་ང་ཚོས་མཐོང་བའི་དྲག་སྤྱོད་ལག་བསྟར་བྱེད་བཞིན་པའི་སྤྱི་ཚོགས་ཀྱི་དཀའ་ངལ་དེ་དག་སེལ་ཐབས་ལ་བསམ་བློ་གཏོང་དགོས། དྲག་སྤྱོད་ལག་བསྟར་བྱས་པའི་ངན་སྤྱོད་ཀྱི་དཀའ་ངལ་ལ་དྲག་སྤྱོད་ཀྱིས་ལན་སློག་ན་འཕྲལ་གྱི་དཀའ་ངལ་སེལ་ཐུབ་ཀྱང་། ཕུགས་ལ་ཕན་ཐོགས་མེད། ཅེས་སོགས་ཀྱི་བཀའ་སློབ་སྩལ་ནས་ཐེངས་འདིའི་ཨ་རིའི་ཁུལ་གྱི་མཛད་འཕྲིན་ཁག་ལེགས་པར་གྲུབ་སྟེ། ཕྱི་ཚེས་ ༦ ཉིན་སུད་སིར་ཆིབས་ཞལ་བསྒྱུར་ཡོད་པ་དང་། ཕྱི་ཚེས་ ༧ དང་ ༨ བཅས་ཉིན་གྲངས་གཉིས་ཀྱི་རིང་སུད་སི་དང་ལིཀ་ཏེན་སིཌ་ཡན་བོད་རིགས་མི་མང་ནས་ཇི་ལྟར་གསོལ་བ་བཏབ་པ་ལྟར། གྲོང་ཁྱེར་བྷ་སེལ་ནང་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་དང་། དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་གསུང་ཆོས། སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་དང་། ཕྱི་ཚེས་ ༨ ཉིན་དེང་རབས་འཛམ་གླིང་གི་ཆེད་དུ་ཆོས་དང་མ་འབྲེལ་བའི་བཟང་སྤྱོད་སྐོར་བཀའ་སློབ་སྩལ་རྒྱུ་ཡིན་འདུག
