ཕྱི་ལོ་ ༢༠༡༥ ཟླ་ ༡ ཚེས་ ༨ རེས་གཟའ་ཕུར་བུ།
༄༅།།སྟོད་དིང་རི་རྫོང་ཁུལ་ནས་ཡིན་པའི་བོད་མི་ན་གཞོན་སྟོབས་རྒྱལ་ལགས་རྒྱ་ནག་ཉེན་རྟོག་པས་འཛིན་བཟུང་བྱས་ཡོད་འདུག
དེ་ཡང་བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ ༢༦ ཉིན་བོད་ནང་གི་ཕྱེད་ཡོལ་ཆུ་ཚོད་ ༡།༥༠ ཙམ་ལ་བོད་ཀྱི་རྒྱལ་ས་ལྷ་སའི་ཉེན་རྟོག་པས་རང་ལོ་ ༢༣ ཡིན་པའི་བོད་མི་སྟོབས་རྒྱལ་ལགས་འཛིན་བཟུང་བྱས་ཡོད་ཀྱང་། ད་ལྟའི་ཆར་ཁོང་ས་གནས་གང་དུ་བཙན་འཁྲིད་བྱས་ཡོད་པ་དང་། ཅིའི་ཕྱིར་འཛིན་བཟུང་བྱས་པ། འཆི་གསོན་གྱི་གནས་སྟངས་སོགས་ཞིབ་ཕྲ་གང་ཡང་ཤེས་རྟོགས་ཐུབ་མེད།
ས་གནས་བོད་མི་དང་ཁོང་གི་ངོ་ཤེས་ཚོས་ཁོང་གིས་བོད་ཀྱི་གནད་དོན་དང་འབྲེལ་བའི་རྩོམ་ཡིག་དང་། བོད་དོན་དྲིལ་བསྒྲགས་ཀྱི་གནས་ཚུལ་ཁྱབ་སྤེལ་བྱས་པ་སོགས་ཀྱི་ཉེས་མིང་འོག་འཛིན་བཟུང་བྱས་པའི་སྐོར་གླེང་སློང་དང་དོགས་གཞི་བྱེད་བཞིན་ཡོད་འདུག
སྟོབས་རྒྱལ་ལགས་ནི། དིང་རི་རྫོང་བྲག་རྩེ་གྲོང་ཚོའི་ཕ་ཚེ་དབང་བསྟན་འཛིན་དང་། མ་ངག་དབང་གཉིས་ཀྱི་བུ་ཡིན་པ་དང་། ལྷ་སའི་ནང་ཨར་ལས་ཀྱི་ལས་ཀ་བྱེད་བཞིན་པའི་སྐབས་འཛིན་བཟུང་བྱས་པ་ཞིག་ཡིན་འདུག
འདས་ལོའི་ཕྱི་ཟླ་ ༡ ཚེས་ ༡༧ ཉིན་ཁོང་གི་གཅེན་པོ་ཚེ་དབང་དོན་ལྡན་ལགས་ཀྱང་རྒྱ་ནག་ཉེན་རྟོག་པས་འཛིན་བཟུང་བྱས་ཏེ་གཅར་རྡུང་འདྲི་བརྩད་ཕོག་མྱོང་ཡོད་འདུག
