ཕྱི་ལོ་ ༢༠༡༥ ཟླ་ ༡ ཚེས་ ༡༣ རེས་གཟའ་མིག་དམར།
༄༅།།འདི་གར་བལ་ཡུལ་སྤོག་ར་གློ་སྒྲིག་ས་གནས་འཐུས་ཚོགས་ནས་བཏང་གནས་ནང་འཁོད་དོན། དགོངས་པར་མངའ་གསལ་བཞིན་བོད་ཆོལ་ཁ་གསུམ་གྱི་ནང་རྒྱ་ནག་གཞུང་གིས་བཙན་གནོན་འོག་འགྲོ་བ་མིའི་ཐོབ་ཐང་དང་། ཆོས་དད་རང་མོས། མི་རིགས་འདྲ་མཉམ། འགྲོ་སྡོད་རང་དབང་མེད་པ་མ་ཟད། དཔལ་འབྱོར་ཐོབ་ཐང་དབྱེ་འབྱེད་དང་། ལས་ཀའི་ཐོབ་ཐང་ཕྱོགས་རིས་སོགས་ཀྱིས་རང་ཡུལ་དུ་རང་དབང་མེད་པའི་ཛ་དྲག་གནས་སྟངས་ལ་མ་བཟོད་པར་ཞི་རྒོལ་དང་། ༸གོང་ས་༸སྐྱབས་མགོན་ཆེན་པོ་མཆོག་བོད་ལ་གདན་ཞུ་དགོས་པའི་དགོས་འདུན་ཁག་དང་བཅས་ཕྱི་ལོ་ ༢༠༠༩ ནས་ཕྱི་ལོ་ ༢༠༡༤ བར་བོད་ནང་སེར་སྐྱ་ཕོ་མོ་ ༡༣༥ བརྒལ་བས་རང་ལུས་མེར་སྲེག་བཏང་བ་དང་། དེ་ཡང་ཕྱི་ལོ་ ༢༠༡༤ ལོ་གཅིག་པུར་བོད་མི་གྲངས་ ༡༡ གིས་རང་ལུས་མེར་སྲེག་བཏང་བ།
ལྷག་པར་ཕྱི་ཟླ་ ༡༢ པའི་ཟླ་མཇུག་ནང་བོད་མི་ ༣ གྱིས་རང་ལུས་མེར་སྲེག་བཏང་བ་རྣམས་ཀྱི་རྗེས་ཤུལ་ནང་མི་ཉེ་འབྲེལ་རྣམ་པར་གདུང་སེམས་མཉམ་སྐྱེ་ཞུ་བ་དང་། ཁོང་རྣམས་ཀྱིས་གཙོས་ད་བར་བོད་བསྟན་པ་ཆབ་སྲིད་དང་མི་རིགས། རང་དབང་གི་སླད་དུ་གཅེས་པའི་སྐུ་སྲོག་དོར་བའི་དམ་པ་དེ་དག་གིས་སྔོན་བསགས་ལས་ངན་སྡིག་ལྟུང་ཇི་ཡོད་བྱང་ཞིང་དག་ནས་བོད་གངས་ཅན་གྱི་ལྗོངས་སུ་དལ་རྟེན་རིམ་པར་བརྒྱུད་དེ་མཐར་ཐུག་རྣམ་མཁྱེན་༸རྒྱལ་བའི་གོ་འཕང་ཐོབ་པ་དང་། བོད་སྤྱི་པའི་དོན་དུ་ཚོགས་གཉིས་གསོག་ཕྱིར་བལ་ཡུལ་སྤོག་ར་གློ་སྒྲིག་ས་གནས་འཐུས་ཚོགས་ནས་གོ་སྒྲིག་གིས་ཕྱི་ལོ་ ༢༠༡༥ ཟླ་ ༡ ཚེས་ ༡༡ རེས་གཟའ་ཉི་མའི་ཉིན་རྒྱབ་ཆུ་ཚོད་ ༡་༣༠ ཐོག་བྱམས་པ་གླིང་བཀའ་འགྱུར་ལྷ་ཁང་མདུན་མཆོད་སྤྲིན་སྣ་ལྔ་དང་། མར་མེ་སྟོང་ཚར་འབུལ་བཤམས་ཐོག ། སྟག་ལུང་དགོན་པའི་མཁན་རིན་པོ་ཆེ་དབུ་བཞུགས་ཐོག་སེར་སྐྱ་མི་མང་བརྒྱ་ཕྲག་འདུ་འཛོམས་ཐོག་ཆུ་ཚོད་གསུམ་རིང་བཟང་སྤྱོད་སྨོན་ལམ་གྲངས་གསོག་ཐོག་སྨོན་ལམ་རྣམ་དགུ་དང་། མ་ཎི་གྲངས་བསགས་གནང་ཡོད་པ་བཅས།།
