༢༠༡༥ ཟླ་ ༡ ཚེས་ ༢༩ རེས་གཟའ་ཕུར་བུ།

༄༅། །ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་རྒྱ་གར་ལྷོ་ཕྱོགས་ཏ་མིལ་ན་ཌུ་མངའ་སྡེའི་ཅི་ནའི་གྲོང་ཁྱེར་གྱིས་གཙོས་ལྷོ་ཕྱོགས་མངའ་ཁུལ་མཐོ་སློབ་འགྲིམ་བཞིན་པའི་བོད་རིགས་སློབ་མ་གནས་ཡོད་ས་གནས་ཁག་གཅིག་ཏུ་གཞུང་འབྲེལ་ཕྱོགས་ཕེབས་གནང་བཞིན་ཡོད་འདུག

དེ་ཡང་ཕྱི་ཚེས་ ༢༥ ཉིན་བཀའ་བློན་མཆོག་གིས་ཅི་ནའི་གྲོང་ཁྱེར་དུ་ཕེབས་འབྱོར་གྱིས་ཕྱི་ཚེས་ ༢༦ ཉིན་ཁུལ་དེར་རྟེན་གཞི་བྱས་པའི་ལོ་ཡོ་ལ་མཐོ་རིམ་སློབ་གཉེར་ཁང་གི་ནང་འགྲིམ་བཞིན་པའི་བོད་རིགས་སློབ་མ་ཚོ་ཐུག་འཕྲད་ཀྱིས་ཁོང་རྣམས་ལ་གཉིས་སྨན་དབུ་མའི་ལམ་གྱི་སྲིད་བྱུས་དང་བོད་མིའི་སྒྲིག་འཛུགས་ཀྱི་སྒྲོམ་གི་སོགས་ཀྱི་སྐོར་གསུང་བཤད་དང་། སློབ་ཕྲུག་ཁག་གཅིག་གིས་དྲི་བར་ལན་འདེབས་གནང་ཡོད་འདུག ཕྱི་ཚེས་ ༢༧ ཉིན་ཕྱི་དྲིལ་བཀའ་བློན་མཆོག་གིས་མ་ཌ་ར་སི་གཙུག་ལག་སློབ་གཉེར་ཁང་གི་རྒྱ་གར་སློབ་མ་རྣམས་ལ་རྒྱ་དཀར་ནག་གཉིས་ཀྱི་འབྲེལ་ལམ་ནང་བོད་ཀྱི་གལ་གནད་ Tibet: Core Issue in Sino-India Relations ཞེས་པའི་བརྗོད་གཞི་ཐོག་གསུང་བཤད་གནང་ཡོད་འདུག

ཕྱི་ཚེས་ ༢༨ ཉིན་མེང་ལོར་དུ་ཕེབས་འབྱོར་གྱིས་ཁུལ་དེར་ལས་རིམ་ཁག་གྲུབ་རྗེས། ཕྱི་ཚེས་ ༢༩ ཉིན་སྦེང་ལོར་དུ་རྟེན་གཞི་བྱས་པའི་སེན་ཇོ་སེཕ་ St. Joseph’s evening college ཕྱི་དྲོའི་མཐོ་སློབ་ཏུ་ཕེབས་འབྱོར་སྐབས་ལྷོ་སྤྱི་ལས་ཁུངས་དང་། ཧིན་བོད་མཛའ་འབྲེལ་ཚོགས་པ། མཐོ་སློབ་དེའི་ལས་སྣེ་རྣམ་པས་སྣེ་ལེན་ཞུ་རྒྱུ་ཡིན་འདུག དེ་ཉིན་བཀའ་བློན་མཆོག་གིས་རྒྱ་དཀར་ནག་གཉིས་ཀྱི་འབྲེལ་ལམ་ནང་བོད་ཀྱི་གལ་གནད་ཞེས་པའི་བརྗོད་གཞིའི་ཐོག་གསུང་བཤད་གནང་རྒྱུ་དང་། ཕྱི་ཚེས་ ༣༠ ཉིན་ Sri Sarvajna College of Education ཞེས་པའི་མཐོ་སློབ་ཏུ་གོང་གསལ་བརྗོད་གཞིའི་ཐོག་གསུང་བཤད་གནང་རྒྱུ་ཡིན་འདུག