༢༠༡༤ ཟླ་ ༡༢ ཚེས་ ༤ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཆི་ཁ་གོའི་བོད་རིགས་རྣམས་ལ་གསུང་བཤད་གནང་སྐབས་བོད་མི་རྣམས་ནས་སོ་སོའི་མདུན་ལམ་ཁོ་ནའི་ཆེད་མིན་པར་བོད་ཀྱི་རྩ་དོན་ཆེད་སློབ་སྦྱོང་བྱེད་དགོས་སྐོར་གསུངས་འདུག སྐབས་དེར་བོད་པའི་བུད་མེད་གཅིག་གི་དྲི་བར་ལན་འདེབས་གནང་སྐབས་སྲིད་སྐྱོང་མཆོག་གིས་གསུང་དོན།
མི་རབས་གཞོན་པ་ཚོས་སོ་སོའི་དོ་དབྱིངས་ཡོད་པའི་ལས་དོན་ཐོག་འབད་བརྩོན་གནང་གལ་ཆེ། གལ་ཏེ་རྒྱལ་སྤྱིའི་གནད་དོན་ལ་དོ་དབྱིངས་ཡོད་ཚེ་ཨ་རིའི་ཕོ་བྲང་དཀར་པོ་དང་ཕྱི་སྲིད་ལས་ཁུངས། གྲོས་ཚོགས་གོང་མ་དང་འོག་མའི་ཕྱི་འབྲེལ་ལས་དོན་ཚོགས་ཆུང་ནང་ལས་ཀ་བྱེད་དགོས། གལ་ཏེ་རྒྱལ་སྤྱིའི་ཡར་རྒྱས་ཐེབས་རྩ་ཁག་གི་ལས་དོན་ལ་དོ་དབྱིངས་ཡོད་ན་ཨ་རིའི་རོགས་རམ་ཐེབས་རྩ་ཁང་ USAID ནང་ལས་ཀ་བྱས་པའམ་ཡང་ན། གཏོང་ཕོད་ཅན་གྱི་ཐེབས་རྩ་ཁང་དཔེར་ན། གེ་ཊི་ Gates དང་ཕོ་ཌི་ཐེབས་རྩ་ཁང་ Ford Foundation ལྟ་བུའི་ནང་ལས་ཀ་བྱས་ནས་གཞིས་བྱེས་བོད་མི་རྣམས་ལ་ཞབས་འདེགས་བསྒྲུབ་ཐུབ་དགོས། ཚོང་གི་སྒྲིག་འཛུགས་ནང་ལས་ཀ་བྱེད་མཁན་ཞིག་ཡིན་ནའང་བོད་ཀྱི་རྩ་དོན་ལ་ཞབས་ཞུ་བསྒྲུབ་ཐུབ། དཔེར་ན། རྒྱ་གར་ནང་མེས་པོ་དམ་པ་གྷན་དྷི་ཇི་མཆོག་གིས་དབུ་ཁྲིད་པའི་རང་བཙན་འཐབ་རྩོད་ཀྱི་ལས་འགུལ་སྤེལ་སྐབས་བཟོ་ཚོང་ཁག་ནང་ལས་ཀ་བྱེད་མཁན་རྒྱ་གར་བ་མི་སྒེར་པ་ཚོས་འཐབ་རྩོད་ཆེད་ཞལ་འདེབས་ཧ་ཅང་ཕུལ་ཡོད། དེ་གྲས་གཅིག་ནི་དེང་སྐབས་རྒྱ་གར་གྱི་ཚོང་པ་སྙན་གྲགས་ཅན་སྦིར་ལ་ (Birla) ནང་མི་ཚོ་ཡིན་འདུག དེར་བརྟེན་བོད་མི་ཚོས་ལས་དོན་གང་འདྲ་ཞིག་གཉེར་ཡང་བོད་ཀྱི་རྩ་དོན་ལ་ཞབས་འདེགས་བསྒྲུབ་རྒྱུའི་གོ་སྐབས་དུས་རྟག་ཏུ་ཡོད། ཅེས་གསུངས།
སྤྱིར་དེ་ཉིན་སྲིད་སྐྱོང་མཆོག་ཆི་ཁ་གོར་མ་ཕེབས་གོང་ཝི་སི་ཀོན་སིན་ Wisconsin བོད་རིགས་ཚོར་གསུང་བཤད་གནང་འདུག སྐབས་དེར་ཁོང་གིས་གསུང་དོན། རྒྱལ་སྤྱིའི་ཐོག་བོད་ཀྱི་གནད་དོན་ལ་རྒྱབ་སྐྱོར་ཚད་མཐོ་པོ་འདི་འདྲ་ཞིག་ཐོབ་པ་ནི་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེའི་བཀྲིན་དང་། བོད་མིའི་སྙིང་སྟོབས་དང་རྡོག་རྩ་ཆིག་སྒྲིལ། ཉམ་ཆུང་ཚུལ་ལྡན་སོགས་ལ་བརྟེན་ནས་ཐོབ་ཡོད། དེར་བརྟེན་རིན་ཐང་དེ་དག་ང་ཚོས་མ་བརླག་པ་བྱེད་དགོས། ཞེས་གསུངས་པ་མ་ཟད། སྲིད་སྐྱོང་མཆོག་གིས་ཝི་སི་ཀོན་སིན་གཙུག་ལག་སློབ་གྲྭའི་ University of Wisconsin ནང་། བོད་དོན་སེལ་རྒྱུའི་ཐབས་ལམ། ཞེས་པའི་བརྗོད་གཞིའི་ཐོག་གསུང་བཤད་གནང་འདུག སྐབས་དེར་སྲིད་སྐྱོང་མཆོག་གིས་བོད་རྒྱ་གཉིས་དབར་བྱུང་རབས་ལོ་རྒྱུས་ཐོག་ནས་འབྲེལ་བ་ཡོད་པ་མ་ཟད། དེང་སྐབས་བོད་མི་རྣམས་རྒྱ་ནག་གི་དབང་བསྒྱུར་འོག་སྡུག་སྦྱོངས་མནར་གཅོད་མྱོང་བཞིན་ཡོད། ཅེས་སོགས་ཀྱི་གསུང་བཤད་གནང་།
སྐབས་དེར་རྒྱ་རིགས་ཚོགས་བཅར་བ་ཤེས་ཡོན་མི་སྣ་ཁག་གཅིག་གིས་སྲིད་སྐྱོང་མཆོག་ལ་དྲི་བ་བཏང་འདུག དྲི་བ་དེ་དག་ནང་བོད་ཅེས་པའི་ངེས་ཚིག་གང་ཡིན། ཞེས་དང་། བོད་ཀྱི་གནད་དོན་སེལ་རྗེས་བོད་ནང་གནས་སྡོད་བྱེད་མཁན་རྒྱ་རིགས་ཚོའི་གནས་སྟངས་ཇི་འདྲ་ཆགས་མིན་སོགས་ཀྱི་དྲི་བར་སྲིད་སྐྱོང་མཆོག་གིས་ལན་འདེབས་ཞིབ་ཕྲ་གནང་ནས་གསུང་དོན། དབུ་མའི་ལམ་གྱི་སྲིད་བྱུས་ནི་བོད་རྒྱ་མི་རིགས་གཉིས་སྨན་གྱི་ཐབས་ལམ་ཞིག་ཡིན། བོད་ཀྱི་ཁོར་ཡུག་འདི་འཛམ་གླིང་ནང་ཧ་ཅང་གལ་ཆེན་པོ་ཡིན་པ་མ་ཟད། ལྷག་པར་ཨི་ཤི་ཡའི་ས་ཁུལ་ཁག་ནང་རྒྱལ་ཁབ་མང་པོ་ཞིག་བོད་ཀྱི་རྒྱུག་ཆུ་ཁག་ལ་བརྟེན་ནས་འཚོ་གནས་བྱེད་བཞིན་ཡོད། ཅེས་གསུངས་པ་དང་སྦྲགས། མཁས་པ་ཁག་གཅིག་གིས་ལུང་བསྟན་བྱས་པ་ལུང་འདྲེན་གནང་དོན། དེ་སྔ་མི་ཚོས་སའི་དོན་དམག་བརྒྱབ་ཡོད་པ་དང་། ད་ཆ་ནུས་ཤུགས་དང་། འབྱུང་འགྱུར་ཆུའི་ཐོག་དམག་རྒྱག་རྒྱུ་རེད། ཅེས་གསུངས། སྲིད་སྐྱོང་མཆོག་གི་ཨ་རིའི་ནང་གཞུང་འབྲེལ་ལས་དོན་གྱི་ཉིན་མཐའ་མའི་སྐབས་ནིའུ་མེཀ་སི་ཀོའི་ New Mexico རྒྱལ་ས་སན་ཏ་ཕེ་ Santa Fe ཞེས་པ་དེར་ཕེབས། སྲིད་སྐྱོང་མཆོག་གནམ་ཐང་དུ་ཕེབས་འབྱོར་སྐབས་སན་ཏ་ཕེ་ Santa Fe དང་ཨལ་བྷུ་ཀར་ཁི་ Albuquerque བཅས་རྒྱལ་ས་གཉིས་ཀྱི་སྤྱི་ཁྱབ་འགན་འཛིན་མཆོག་དང་ས་གནས་དེར་བོད་མི་ཉུང་ཤས་ཤིག་ཡོད་པ་ཁོང་རྣམས་ནས་ཕེབས་བསུ་གཟབ་རྒྱས་ཞུས་འདུག
དེ་ཡང་སྲིད་སྐྱོང་མཆོག་གིས་བོད་མི་རྣམས་ལ་གསུང་བཤད་མ་གནང་གོང་གྲོང་སྡེའི་སྤྱི་ཁྱབ་པ་སྐུ་ཞབས་ཇ་ཝི་ཡར་གོན་ཛ་ལེ་སི་ Mr. Javier Gonzales མཆོག་གིས་མཇལ་འཕྲད་གནང་བ་མ་ཟད། ཕྱི་ཟླ་ ༡༢ ཚེས་ ༢ ཉིན་མོ་དེ་བཞིན་སྲིད་སྐྱོང་བློ་བཟང་སེང་གེའི་ཉིན་མོར་སྲུང་བརྩི་ཞུ་རྒྱུ་ཡིན། ཞེས་བསྒྲགས། དེ་རྗེས་སྲིད་སྐྱོང་མཆོག་གིས་བོད་མི་རྣམས་ལ་བཀའ་ཤག་སྐབས་བཅུ་བཞི་པའི་བཙན་བྱོལ་བོད་མིའི་ཤེས་ཡོན་ཐོག་འཛིན་བཞིན་པའི་སྲིད་བྱུས་ལངས་ཕྱོགས་ཀྱི་དགོས་དམིགས་དང་གྲུབ་འབྲས་སོགས་གསལ་བཤད་གནང་བ་དང་སྦྲགས། བོད་ཀྱི་ལོ་རྒྱུས་ཐོག་དཀའ་ངལ་ཧ་ཅང་འཕྲད་བཞིན་པའི་དུས་སྐབས་འདིར་བོད་ཀྱི་ཐུན་མིན་ཆོས་དང་རིག་གཞུང་སྲུང་སྐྱོབ་བྱ་རྒྱུ་བོད་མི་སྤྱི་བོ་གནམ་བསྟན་ཚང་མའི་སྐབས་བབ་ལས་འགན་ཡིན་སྐོར་དང་། སྲིད་སྐྱོང་མཆོག་གིས་མུ་མཐུད་གསུང་དོན།
ང་ཚོར་ལོ་ངོ་ཉིས་སྟོང་ལྷག་གི་རིག་གཞུང་ཕྱུག་པོ་ཡོད་པ་དེ་དག་ངེས་པར་དུ་བདག་གཉེར་བྱེད་དགོས། བོད་མི་རིགས་ནི་ཧུར་བརྩོན་ཅན་གྱི་མི་རིགས་ཤིག་ཡིན་སྟབས་ང་ཚོས་དཀའ་ངལ་གང་འདྲ་ཞིག་ལའང་གདོང་ལེན་བྱེད་ཐུབ་རྒྱུ་རེད་བསམ་པའི་སྤོབས་པ་དགོས། ཞེས་སོགས་ཀྱི་གསུང་བཤད་གནང་བ་མ་ཟད། སྲིད་སྐྱོང་མཆོག་གིས་རྒྱལ་སྤྱིའི་སློབ་གྲྭ་ United World College ཞེས་པའི་སློབ་ཕྲུག་རྣམས་ལ་གསུང་བཤད་གནང་འདུག སྐབས་དེར་རྒྱ་རིགས་སློབ་ཕྲུག་ཁག་གཅིག་སེ་ལ་ཀུ་བོད་ཁྱིམ་སློབ་གྲྭ་ TCV Selakui ཐོན་པའི་བོད་རིགས་ཤིག་དང་ལྷན་བསླེབས་འདུག ཁུལ་དེར་ལས་དོན་རྣམས་ཡོངས་སུ་ལེགས་གྲུབ་རྗེས་སྲིད་སྐྱོང་མཆོག་དེ་ཉིན་རྒྱ་གར་རྒྱལ་ས་ལྡི་ལིར་ཕེབས་ཐོན་གནང་ནས་ཕྱི་ཚེས་ ༥ སྔ་དྲོ་རྒྱལ་ས་ལྡི་ལིར་ཕེབས་འབྱོར་གནང་རྒྱུ་ཡིན་འདུག
