༢༠༡༤ ཟླ་ ༡༢ ཚེས་ ༢༧ རེས་གཟའ་སྤེན་པ།
བློ་བཟང་ལུང་རིགས་ལགས།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་གནས་ཚུལ་མཁོ་སྤྲོད་གནང་དོན། ཕྱི་ལོ་ ༢༠༡༤ ཟླ་ ༡༢ ཚེས་ ༢༧ ཉིན་ཤེས་རྟོགས་བྱུང་བར། ཕྱི་ཚེས་ ༢༦ ཉིན་བོད་ནང་གི་དགོང་མོའི་དུས་ཚོད་ལ་རྔ་བ་ཀིརྟི་དགོན་པའི་རང་ལོ་ ༢༠ ཡས་མས་ཡིན་པ་གྲྭ་བློ་བཟང་ལུང་རིགས་ལགས་རྒྱ་གཞུང་གི་ཉེན་རྟོག་པས་དགོན་པའི་ནང་ནས་འཛིན་བཟུང་གིས་བཙན་ཁྲིད་བྱས་ཡོད་ཀྱང་ས་གནས་གང་དུ་བཀག་ཉར་བྱས་ཡོད་མེད་དང་། རྒྱུ་མཚན་ཅི་ཞིག་ཡིན་སོགས་ཞིབ་ཕྲ་ཤེས་རྟོགས་ཐུབ་མེད།
ཁོང་ནི་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་ལྔ་པའི་ཕ་རས་རས་དང་མ་ལྷ་མོ་སྒྲོན་གཉིས་ཀྱི་བུ་ཡིན་ཞིང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་གྲྭ་པ་བྱས་ཏེ་དེང་སྐབས་བློ་རིག་འཛིན་གྲྭ་ཡིན་འདུག་པ་བཅས།།
