༄༅། །འདི་གར་ཁུངས་ལྡན་གནས་ཚུལ་འབྱོར་གསལ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ཤར་ཙམ་ལ་བོད་ཆབ་མདོ་ས་ཁུལ་ཚ་བ་མཛོ་སྒང་དགོན་པའི་ལོ་ན་ ༦༠ ཙམ་ཡིན་པའི་དབུ་ཡག་སྤྲུལ་སྐུའམ་བློ་བཟང་བསྟན་འཛིན་ལགས་སུ་ཆབ་མདོ་ས་ཁུལ་ཚ་བ་མཛོ་སྒང་མི་དམངས་ཁྲིམས་ཁང་གིས་ཏཱ་བླའི་རུ་ཚོགས་པའི་རྗེས་འབྲང་དང་མི་མང་ལ་དོལ་རྒྱལ་བསྟེན་རྒྱུ་མེད་པའི་ངན་བསྐུལ་བྱས་པའི་ཉེས་མིང་འོག་མི་ལོ་བཅུའི་བཙོན་འཇུག་ཁྲིམས་ཐག་བཅད་འདུག
དབུ་ཡག་སྤྲུལ་སྐུ་བློ་བཟང་བསྟན་འཛིན་ལགས་ནི། ཆུང་དུས་ནས་གཞུང་གི་ཕྱག་ལས་གནང་སྟེ། སྟོད་མངའ་རིས་ཕྱོགས་སུ་ཡུལ་སྐོར་སྤྲོ་འཆམ་པའི་སྣེ་ཤན་པ་དང་། ཁ་ལོ་བའི་ཕྱག་ལས་གནང་ཡོད་པ་དང་། ལོ་ཤས་རྗེས་བགྲེས་ཡོལ་ཞུས་ཏེ་ལྷ་སར་གནས་སྡོད་བྱས་ཏེ། མཛོ་སྒང་དགོན་དུ་ཕེབས་ནས་དགོན་གྲོང་གཉིས་ཀྱི་སེར་སྐྱ་མི་མང་རྣམས་ལ་༸གོང་ས་མཆོག་གི་བཀའ་དགོངས་ལྟར་དོལ་རྒྱལ་བསྟེན་གསོལ་བྱས་པ་ཡིན་ན། བོད་ཀྱི་རྩ་དོན་ལ་འཕྲལ་ཕུགས་རྒྱང་གསུམ་གནོད་ཀྱི་ཡོད་པ་མ་ཟད། ༸གོང་ས་མཆོག་གི་སྐུ་ཚེ་ལ་གནོད་པ། རང་གཞན་སུ་ལའང་གནོད་པ་མ་གཏོགས་ཕན་པ་རྩ་བ་ཉིད་ནས་མེད་པའི་སྐོར་ལམ་སྟོན་གནང་བ་དང་། ལྷག་པར་རང་རང་སོ་སོའི་མི་རིགས་རིག་གཞུང་དང་། ཡུལ་སྲོལ་གོམས་གཤིས་སོགས་མ་བརླག་པ་བྱེད་དགོས་པའི་ལམ་སྟོན་གསུང་བཤད་གནང་བཞིན་ཡོད་པར་བརྟེན། སེར་སྐྱ་མི་མང་རྣམས་ཀྱི་དད་གུས་ཆེན་པོ་ཞུ་བཞིན་ཡོད།
དེ་ཡང་ཕྱི་ལོ ༢༠༡༤ ཕྱི་ཟླ་ ༩ ནང་ཆབ་མདོ་ས་ཁུལ་མཛོ་སྒང་རྫོང་གི་མང་ཚོགས་ལམ་ཕྱོགས་སློབ་གསོ་ལས་འགུལ་ཟེར་བ་ཞིག་སྤེལ་ཏེ། དབུ་ཡག་སྤྲུལ་སྐུ་བློ་བཟང་བསྟན་འཛིན་ལགས་སོགས་གཙོ་བོ་བྱས་པའི་ཁྲིམས་འགལ་བ་དང་ཁྲིམས་འགལ་ཚོགས་པ་ཕྱོགས་ཡོངས་ནས་རྩ་མེད་བཟོས་ཡོད་པའི་ཁྱབ་བསྒྲགས་སྤེལ་ཡོད་པ་མ་ཟད། རྫོང་ཡོངས་ཀྱི་ཁྱབ་ཁོངས་སུ་ཏཱ་ལའི་སྐྱེ་ཕྲེང་བཅུ་བཞི་པར་མི་ཚང་མས་མིང་བཏོན་ནས་ཐེར་འདོན་དགག་རྒྱག་གི་མཐོ་རླབས་འཕྱུར་ཡོད། ཅེས་སོགས་ཁྱབ་བསྒྲགས་བྱས་ཡོད།
