༢༠༡༤ ཟླ་ ༡༢ ཚེས་ ༢༢ རེས་གཟའ་མིག་དམར།

༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༡ ནས་ ༡༧ བར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག འབིར་བོད་མིའི་གཞིས་ཆགས་ཀྱི་འཕྲོད་བསྟེན་སྨན་ཁང་དུ་སོ་ནད་བཅོས་སྟངས་དང་འབྲེལ་བའི་ཟབ་སྦྱོང་གནང་འདུག

དེ་ཡང་ཐེངས་འདིའི་ཟབ་སྦྱོང་འདི་བཞིན་དེ་སྔོན་ཕྱི་ཟླ་བདུན་པའི་ནང་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། ཐེ་ཝན་སོའི་སྨན་པའི་ལྷན་ཚོགས། ཁ་ཐེའི་སྨན་ཁང་ (Cathy’s hospital) དེ་བཞིན་ཐེ་ཝན་འཕྲོད་བསྟེན་མཉམ་འབྲེལ་ཚོགས་པ་ (Taiwan health CO_OP organisation) ཐུན་མོང་ཐོག་སྨན་ཞབས་པ་དང་འཕྲོད་ལས་པ་རྣམས་ལ་གནང་བའི་ཟབ་སྦྱོང་དེ་རྒྱུན་མཐུད་པ་ཞིག་ཡིན་འདུག

ཟབ་སྦྱོང་ཐོག་བོད་མིའི་སློབ་གྲྭ་དང་གཞིས་ཆགས་ཁུག་ཀྱོག་ཁག་གི་སྨན་ཞབས་པ་དང་། སོའི་སྨན་ཞབས་པ་བཅས་ཁྱོན་མི་གྲངས་ ༡༤ ཙམ་ལ་སུ་ཇ་བོད་ཁྱིམ་གྱི་སོའི་སྨན་ཁང་དང་འབིར་འཕྲོད་བསྟེན་སྨན་ཁང་དུ་སོ་གཙང་བཟོ་དང་འབུད་སྟངས་སྐོར་ཟབ་ཁྲིད་གནང་ཡོད་འདུག

ཟབ་སྦྱོང་མཇུག་བསྡོམས་སྐབས་ཐེ་ཝན་ནས་ཕེབས་པའི་ཟབ་ཁྲིད་པ་ཚོགས་ཁག་གིས་ཟབ་སྦྱོང་བ་རྣམས་ལ་ལག་འཁྱེར་གནང་ཡོད་པ་མ་ཟད། སོ་འབུད་ཆེད་ཀྱི་འཕྲུལ་ཆས་ལྔ་ཞལ་འདེབས་གནང་འདུག འཕྲུལ་ཆས་དེ་དག་མ་སུ་རི་དང་སིམ་ལ་གཏན་སློབ། མེས་དབོན་གཙུག་ལག་དཔེ་སྟོན་སློབ་གྲྭ ཧོན་སུར་བོད་མིའི་གཞིས་ཆགས་ཀྱི་ཕན་བདེ་སྨན་ཁང་། བསྟན་སྒང་འཕྲོད་བསྟེན་སྨན་ཁང་བཅས་ལ་འབིར་ས་གནས་འགོ་འཛིན་གྱིས་བགོ་འགྲེམས་གནང་འདུག