༢༠༡༤ ཟླ་ ༡༢ ཚེས་ ༢༣ རེས་གཟའ་མིག་དམར།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༡༢ ཚེས་༢༢ ཉིན་གྱི་བོད་ནང་གི་ཕྱི་དྲོའི་ཆུ་ཚོད་ ༤ པ་ཡོལ་ཙམ་ལ་རྔ་བ་རྫོང་རྨེའུ་རུ་མ་ཡུལ་ཚོའི་སྲང་ལམ་སྨད་ཕྱོགས་ནས་རང་ལོ་ ༡༩ ཡིན་པའི་བུ་མོ་ཚེ་པེ་ལགས་ཀྱིས་རྒྱ་གཞུང་གིས་བོད་ཐོག་འཛིན་པའི་སྲིད་བྱུས་ལ་ངོ་རྒོལ་ཆེད་རང་ལུས་མེར་སྲེག་བཏང་སྟེ་ས་གནས་དེ་ག་རང་དུ་འདས་གྲོངས་སུ་གྱུར་ཡོད་ཅིང་། དེ་མ་ཐག་ཉེན་རྟོག་པས་ཁོང་མོའི་སྐུ་ཕུང་བཙན་འཁྱེར་བྱས་ཡོད་འདུག
ཁོང་མོ་ནི་རྔ་བ་ཁུལ་རྔ་བ་རྫོང་རྨེའུ་རུ་མ་ཡུལ་ཚོའི་རུ་ཆེན་བཞི་པའི་འཆི་རྡོར་ཚང་གི་ཕ་འཆི་རྡོར་༼འཆི་མེད་རྡོ་རྗེ་༽དང་། མ་ཅེན་དཔའ་གཉིས་ལ་བུ་བུ་མོ་དྲུག་ཡོད་པའི་ནང་གི་བཞི་པ་ཡིན་ཞིང་། ཆུང་ཆུང་སྐབས་ནས་སློབ་གྲྭར་འགྲོ་མྱོང་མེད་པར་ཕ་མ་མཉམ་དུ་འབྲོག་པའི་འཚོ་བ་བསྐྱལ་ནས་འཚར་ལོངས་བྱུང་བ་ཞིག་དང་། ཀུན་གྱིས་བསྟོད་བསྔགས་བྱེད་སའི་གཞུང་དྲང་གཤིས་འཇམ་གྱི་བུ་མོ་ཡ་རབས་ཤིག་ཡིན་འདུག
ད་དུང་གནས་ཚུལ་ཡོང་ཁུངས་ནས་བཤད་པར་ལོ་ན་ ༦༠ ཡོལ་བའི་བུ་མོའི་ཕ་འཆི་རྡོར་དང་ལོ་ན་ལྔ་བཅུ་ང་གྲངས་ཡིན་པའི་མ་ཅེན་དཔའ་གཉིས་དང་གཅེན་པོ་ཡི་མེ་བཅས་ཉེན་རྟོག་པས་ཁྲིད་ཡོད་ཀྱང་དངོས་སུ་བཀག་ཉར་བྱས་ཡོད་མེད་སོགས་གསལ་པོ་ཤེས་རྟོགས་བྱུང་ཐུབ་མེད་པ་བཅས།།
