བློ་བཟང་འཕྲིན་ལས་ལགས།
༄༅། །འདི་གར་བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་ལགས་དང་ཀ་ཉག་ཚེ་རིང་ལགས་གཉིས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། ཕྱི་ལོ་ ༢༠༡༤ ཟླ་ ༡༢ ཚེས་ ༢༦ ཉིན་གྱི་བོད་ནང་གི་ཆུ་ཚོད་ ༤ ཙམ་ལ་བོད་མདོ་སྨད་རྔ་བ་ཀིརྟི་དགོན་པའི་རང་ལོ་ ༢༡ ཡས་མས་ལ་སོན་པའི་གྲྭ་བློ་བཟང་འཕྲིན་ལས་ལགས་ཀྱིས་༸གོང་ས་མཆོག་གི་སྐུ་པར་དང་བོད་ཀྱི་རྒྱལ་དར་མཉམ་སྦྱར་བྱས་པའི་འདྲ་པར་ཆེན་པོ་ཞིག་མཐོ་སར་བཏེགས་ཏེ་གཞུང་ལམ་དཀྱིལ་ནས། (རྒྱལ་དབང་བསྟན་འཛིན་རྒྱ་མཚོ་སྐུ་ཚེ་ཁྲི་ལོ་ནས་ཁྲི་ལོར་བརྟན་པར་ཤོག བོད་ལ་རང་དབང་དགོས་) ཞེས་སྐད་འབོད་གནང་བཞིན་རྒྱ་ནག་གཞུང་གིས་བོད་ལ་འཛིན་པའི་སྲིད་བྱུས་ལ་ངོ་རྒོོལ་གནང་ཡོད་ཅིང་། སྐར་མ་ཁ་ཤས་ལས་མ་སོང་བར་ཉེན་རྟོག་པ་འབྱོར་ཏེ་གཅར་རྡུང་གཏོང་བཞིན་བཙན་ཁྲིད་བྱས་འདུག་ལ།
གནས་ཚུལ་དེ་བྱུང་མ་ཐག་ས་གནས་དེ་གར་ཡོད་པའི་བོད་མི་རྣམས་ཀྱིས་དེར་མཐུད་ནས་སྐད་འབོད་བྱས་ཡོད་ཀྱང་དྲག་ཆས་དམག་དཔུང་སོགས་ཀྱིས་གང་བྱུང་གཅར་རྡུང་གཏོང་བཞིན་མི་མང་ཁ་གཏོར་བཏང་ཡོད་པར་མ་ཟད། མིང་སོགས་གསལ་པོ་ཤེས་རྟོགས་མ་བྱུང་ནའང་བོད་མི་རེ་ཟུང་ཉེན་རྟོག་པའི་ལག་ཏུ་ཤོར་ཏེ་བཙན་ཁྲིད་བྱས་ཚུལ་ཡང་འདུག རྔ་བ་རྫོང་མཁར་གྱི་གཞུང་ལམ་ཁག་ལ་དྲག་ཆས་དམག་དཔུང་དང་ཉེན་རྟོག་པ་འགྲེམས་འཇོག་བྱས་ཏེ་དམ་བསྒྲགས་ནན་པོ་བྱས་ཡོད་འདུག
བློ་བཟང་འཕྲིན་ལས་ལགས་ཀྱི་ཕ་ཡུལ་རྔ་བ་རྫོང་རྨེའུ་རུ་མའི་རུ་ཆེན་བཞི་པ་ནས་ཡིན་ཞིང་། ཕ་ནོར་ལྡན་དང་། མ་མཆོག་གསུམ་གཉིས་ཀྱི་བུ་ཡིན་པ་དང་། ཆུང་ཆུང་སྐབས་ནས་རྔ་བ་ཀིརྟི་དགོན་པར་ཆོས་ཞུགས་བྱས་ཏེ་དེང་སྐབས་བློ་རིག་འཛིན་གྲྭ་ཡིན་འདུག་པ་བཅས།།
