༢༠༡༤ ཟླ་ ༡༢ ཚེས་ ༢༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༢༣ ཉིན་ཁམས་རྟའུ་ནང་རང་ལུས་མེར་སྲེག་གནང་མཁན་སྐལ་བཟང་ཡེ་ཤེས་ལགས་དགེ་འདུན་པ་དང་ས་གནས་བོད་མི་ཚོས་བདག་པོ་རྒྱག་རྩིས་བྱེད་སྐབས་རྒྱ་ནག་གཞུང་གི་ཉེན་རྟོག་པས་མེ་མདའ་བརྒྱབ་ནས་བོད་མིར་རྨས་སྐྱོན་བཟོས་པའི་གནས་ཚུལ་ཐོན་འདུག
དེ་ཡང་བརྒྱུད་ལམ་ཁག་ནང་གནས་ཚུལ་སྤེལ་གསལ་ལྟར་ན། སྐལ་བཟང་ཡེ་ཤེས་ལགས་ཀྱིས་རང་ལུས་མེར་སྲེག་གནང་སྐབས་ལག་པར་བོད་ཀྱི་རྒྱལ་དར་འཁྱེར་ཡོད་པ་དང་། ཁོང་གི་གཟིམ་ཤག་ཏུ་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་ཆེན་པོ་ཞིག་གི་ཐོག་ལ་བོད་མི་ས་ཡ་དྲུག་གི་ཁྱེད་ལ་རེ་སྒུག་བྱས་ཡོད། ཅེས་འཁོད་འདུག རེས་གཟའ་མིག་དམར་ཉིན་རང་ལུས་མེར་སྲེག་གི་གནས་ཚུལ་དེ་བྱུང་སྐབས་དེ་མ་ཐག་ཉེན་རྟོག་པ་དང་དམག་མི་འབྱོར་ནས་བོད་མིའི་སྟེང་གང་བྱུང་མེ་མདའ་རྒྱག་སྐབས་ཉུང་མཐར་བོད་མི་གཉིས་ལ་རྨས་སྐྱོན་བཟོས་པ་དང་། སྐལ་བཟང་ཡེ་ཤེས་ལགས་ཉེན་རྟོག་པས་རྫོང་སྨན་ཁང་བཅས་སུ་བཙན་ཁྲིད་བྱེད་སྐབས་ལམ་བར་ནས་སྐུ་གྲོངས་ཡོད་འདུག ཁོང་གི་ནང་མི་དང་འབྲེལ་ཡོད་དགོན་པ། ས་གནས་བོད་མི་རྒན་གྲས་བཅས་ཀྱིས་སྐུ་ཕུང་རག་ཐབས་ཀྱིས་བོད་པའི་སྲོལ་རྒྱུན་འགྲོ་སྟངས་ལྟར་བསྔོ་སྨོན་སོགས་བྱེད་རྒྱུའི་རེ་འདུན་བྱས་ཀྱང་། རྒྱ་ནག་གི་འབྲེལ་ཡོད་ཚན་པས་སྐུ་ཕུང་དར་རྩེ་མདོར་ཞུགས་འབུལ་བྱས་ཚར་ཡོད་པ་བརྗོད་ཡོད་འདུག དེ་བཞིན་ད་ཆ་མེ་མདས་རྨས་སྐྱོན་ཕོག་པའི་བོད་མི་ཚོ་འཛིན་བཟུང་བྱས་ཡོང་བསམས་པའི་ཞེ་སྣང་འོག་ཚད་ལྡན་སྨན་ཁང་ནང་དུ་སྨན་བཅོས་བྱེད་པར་བསྐྱོད་མ་འཕོད་པར་གནས་ཡོད་འདུག
