༢༠༡༤ ཟླ་ ༡༢ ཚེས་ ༢༣ རེས་གཟའ་མིག་དམར།
༄༅། །དོལ་རྒྱལ་རྗེས་འབྲང་པ་ཁག་གཅིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་སྐད་ཅོར་ངོ་རྒོལ་བརྒྱབ་པ་དེར་ང་ཚོས་སྐྱོན་བརྗོད་དང་སྦྲགས་བསྒྲགས་གཏམ་འདི་སྤེལ་གྱི་ཡོད།
དོལ་རྒྱལ་རྗེས་འབྲང་པ་ཁྱོད་ཚོས་ནང་ཆོས་ཀྱི་དོན་སྙིང་གང་ཡང་མི་ཤེས་པར་ལྷ་གསོལ་རིང་ལུགས་ཀྱི་དར་རྟགས་འོག་གཡམ་རྒྱུག་བྱས་ཏེ་༸གོང་ས་༸སྐྱབས་མགོན་ཆེན་པོ་མཆོག་ལ་སྐད་ཅོར་ངོ་རྒོལ་བརྒྱབ་པ་དེ་ནི་བོད་མི་རིགས་ལ་ངོ་རྒོལ་བྱས་པ་ཞིག་ཡིན་པས། ང་ཚོས་བོད་མི་ས་ཡ་དྲུག་གི་ཚབ་མཚོན་ཞུས་ཏེ་ཁྱོད་ཚོའི་བྱེད་བབས་ལ་སྐྱོན་བརྗོད་བྱེད་ཀྱི་ཡོད། དེའི་ནང་ནས་ཕྱི་མི་དོལ་རྒྱལ་རྗེས་འབྲང་པ་ཁྱོད་ཚོས་ཤེས་དགོས་པ་ཞིག་ལ། དོལ་རྒྱལ་རྗེས་འབྲང་པ་ཚོས་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་ཡོད་པའི་སྐྱོན་བརྗོད་བྱས་པ་དེ་ནི་གཞི་རྩ་གང་ཡང་མེད་པ་དང་། དེ་བས་ནང་ཆོས་ངོ་མ་ཁས་ལེན་མཁན་ཞིག་ཡིན་ཚེ། ལས་ངན་གསོག་པའི་བྱ་བ་སྙིང་རྗེའི་ཡུལ་དུ་འགྱུར་བ་རང་རེད། སྤྱིར་དོལ་རྒྱལ་རྗེས་འབྲང་པ་ཚོའི་བྱ་སྤྱོད་དང་གཏམ་བརྗོད་ཡོངས་རྫོགས་ཆོས་ལུགས་དང་འབྲེལ་བ་གང་ཡང་མེད་པར་དེ་ནི་རྒྱ་ནག་གཞུང་གི་ཆབ་སྲིད་ཀྱི་བཀོལ་སྤྱོད་དང་། ཡང་ན་བོད་མི་ཁ་བྲལ་གཏོང་བའི་སིམ་འཛུལ་གྱི་ལག་ཆར་གྱུར་བ་ལས། འདི་འཇམ་མགོན་བླ་མའི་བསྟན་པར་ཤ་ཚ་བའི་རྒྱབ་སྐྱོར་ཞིག་གཏན་ནས་མ་རེད།
དངོས་གནས་འཇམ་མགོན་བླ་མར་སྙིང་ནས་ཤ་ཚ་ཡོད་ན་འཇམ་མགོན་བླ་མའི་གདན་ས་དགའ་ལྡན་དགོན་པ་བཤིག་གཏོར་བྱས་ནས་གྱང་ཧྲུལ་དུ་བཏང་བ་དང་། ལོ་ངོ་ལྔ་བརྒྱ་ལྷག་སོང་ཟིན་པའི་རྗེའི་སྐུ་གདུང་སོགས་རིན་ཐང་བྲལ་བའི་རིག་དངོས་གནའ་ཤུལ་མེད་པ་བཟོས་པ་སོགས། གང་ལྟར་བསམ་ཡུལ་ལས་འདས་པའི་གནོད་འཚེ་ཇི་སྙེད་ཅིག་རྒྱ་མིས་བཏང་ཡོད། འོན་ཀྱང་གནད་དོན་དེ་དག་ལ་དོལ་རྒྱལ་ཚོགས་པས་འགན་འཁུར་ཡོད་པའི་སྐད་ཆ་ཚིག་གཅིག་བཤད་པ་ཐོས་མྱོང་མེད། ད་དུང་དེ་ལས་ལྡོག་སྟེ་ཁ་རྐུབ་ངོ་མི་ཤེས་པར་བྱོལ་སོང་ལྟར་རང་གིས་རྩ་ཆེན་དུ་བརྩི་བའི་བླ་མའི་གདན་ས་གཏོར་མཁན་གྱི་དགྲ་ཕྱོགས་སུ་ལངས་ནས་སྐད་ཅོར་རྒྱག་བཞིན་ཡོད། དེར་བརྟེན་ཕྱི་མི་དོལ་རྒྱལ་རྗེས་འབྲང་པ་སོགས་ཁྱོད་ཚོ་ཁོང་ཚོའི་ལྷ་གསོལ་གྱི་དར་རྟགས་བསླུ་བྲིད་འོག་ཚུད་ཡོད་པས། ང་ཚོའི་རེ་བར་ཁྱོད་ཚོས་བོད་བརྒྱུད་ནང་བསྟན་གྱི་ཆོས་ལུགས་ཀྱི་དོན་སྙིང་ངོ་མ་དེ་ཤེས་ཐུབ་པའི་རེ་བ་ཡོད།
དེ་བས་ཁྱོད་ཚོས་ཤེས་དགོས་པ་ཞིག་ལ། དབུས་བོད་མིའི་སྒྲིག་འཛུགས་ཀྱིས་དོལ་རྒྱལ་རྗེས་འབྲང་པ་ཚོའི་ཆོས་དད་དང་རང་དབང་ཙམ་མ་ཟད། བོད་མིའི་ངོ་བོར་རྒྱ་གར་ནང་གནས་སྡོད་དང་ཕྱི་རྒྱལ་ཁག་ཏུ་སྐྱོད་ཆེད་ལག་ཁྱེར་སོགས་དབུས་བོད་མིའི་སྒྲིག་འཛུགས་མ་བརྒྱུད་པར་དེའི་ཡོད་ཚད་ཡོང་ཐབས་མེད་པས། ལམ་ཁ་འདི་༸གོང་ས་སྐྱབས་མགོན་ཆེན་པོས་དབུ་ཁྲིད་པའི་དབུས་བོད་མིའི་སྒྲིག་འཛུགས་ཀྱི་བཀའ་དྲིན་ཉག་ཅིག་ལས་བྱུང་བ་ཤེས་དགོས། ཁྱི་སྨྱོ་ཡང་བདག་པོ་ངོ་ཤེས་པའི་དཔེ་ལྟར། ཁྱི་སྨྱོན་ཞིག་གསོས་པ་ཡིན་ཡང་བདག་པོར་རྔ་མ་རིལ་རིལ་གྱིས་དགའ་སྣང་བྱེད་པ་ལས། རང་གི་བདག་པོར་སོ་རྒྱག་གི་མ་རེད། ཡིན་ནའང་ད་ལྟའི་དོལ་རྒྱལ་ཚོགས་པའི་བྱེད་ལས་འདི་ཆོས་ལུགས་ཀྱི་གནད་དོན་ཞིག་མིན་ལ། དེ་བས་ལྷ་གསོལ་ཆོག་མིན་གྱི་གནད་དོན་ཞིག་གཏན་ནས་མིན་པར། འདི་ནི་རྒྱ་ནག་གཞུང་གི་ཆབ་སྲིད་ཀྱི་ལག་ཆ་བོད་མི་ཁ་བྲལ་གཏོང་བའི་ལས་འགུལ་གྱི་ཆ་ཤས་ཤིག་རེད།
ད་དུང་ཁྱོད་ཚོས་ཤེས་དགོས་པ་ཞིག་ལ། དོལ་རྒྱལ་ཚོགས་པས་ཕྱི་ལོ་ ༡༩༩༧ ལོར་དྷ་རམ་ས་ལའི་མཚན་ཉིད་རིགས་ལམ་སློབ་གྲྭའི་འགན་འཛིན་བློ་བཟང་རྒྱ་མཚོ་དང་། ཁོང་གི་དགེ་ཕྲུག་གཉིས་གྲི་བརྒྱབ་ནས་དམར་གསོད་བཏང་བ་རེད། དེས་ཚད་ཀྱི་མ་རེད། རྒྱ་གར་ལྷོ་ཕྱོགས་ཀྱི་བོད་མིའི་གཞིས་འགོ་དང་། དགོན་པའི་མཁན་པོ་རྡུང་ནས་རྨས་སྐྱོན་ཚབས་ཆེ་ཕོག་པ་དང་། དགའ་ལྡན་བྱང་རྩེའི་ཕྱུགས་ཟོག་གི་རྩྭ་གཟན་མེར་སྲེག་སོགས་གང་ལྟར་ཁོང་ཚོས་ལས་པའི་བྱ་སྤྱོད་ལ་ཁྱོད་ཚོས་ཕྱིར་མིག་གིས་ཞིབ་དཔྱད་ཅིག་བྱེད་ཀྱི་ཡིན་ན་གཞི་ནས་ཧང་སང་གི་རེད།
འཇམ་མགོན་བླ་མ་ཙོང་ཁ་པ་ཆེན་པོས་མཛད་པའི་གསུང་རྟེན་པོད་བཅོ་བརྒྱད་ཡོད་པ་ནི་དགེ་ལྡན་སྙན་བརྒྱུད་ཀྱི་མན་ངག་རེད། དེའི་ནང་མི་བསད་ཁྲག་སྦྱོར་གྱིས་བྱ་བ་ནང་ཆོས་ཀྱི་སྙིང་པོ་ཡིན་པ་གསུང་ཡོད་མ་རེད། ཁྱོད་རང་ཚོ་ཡང་རྗེ་ཙོང་ཁ་པའི་རྗེས་འཇུག་ལྷད་མེད་ཅིག་བྱེད་སེམས་ན། དེའི་གསུང་པོད་བཅོ་བརྒྱད་ལ་སློབ་སྦྱོང་དང་། ཡང་ན་ཉམས་ལེན་བྱས་ཏེ་དགེ་ལྡན་སྙན་བརྒྱུད་ཀྱི་དོན་སྙིང་ངོ་མ་དེ་རྟོགས་ཐུབ་ན། གཞི་ནས་ཟས་ལ་བྲོ་བ་རྙེད་པ་ལྟར་ཁྱོད་ཚོ་རྨོངས་གཉིད་ལས་བསད་ཀྱི་རེད།
འདིར་ནན་གྱིས་བརྗོད་དགོས་པ་ཞིག་སྟེ། དོལ་རྒྱལ་ཚོགས་པས་ཆོས་ལུགས་ལ་ཁ་གཡར་ནས་གཟུགས་མེད་གྲིབ་བཟོའི་གནད་དོན་བཟོས་ཏེ། ཐ་ན་བོད་ནང་གི་ཕྲུ་གུ་ཆུང་ཆུང་ཡན་ཆད་ཁོང་ཚོའི་གཡོ་འོག་ཏུ་ཁྲིད་ཐབས་ལ་རྩོལ་པ་བྱེད་བཞིན་ཡོད། མདོར་བསྡུས་ནས་བཤད་ན། བོད་ཀྱི་ཕྱི་ལོག་ཏུ་གནས་པའི་བོད་པ་ཞིག་ཡིན་ཕྱིན་༸གོང་ས་སྐྱབས་མགོན་ཆེན་པོ་མཆོག་གི་དབུ་འཁྲིད་པའི་བོད་བཙན་བྱོལ་སྒྲིག་འཛུགས་དང་འབྲེལ་བ་མེད་པར་རང་མགོ་ཐོན་པ་གཅིག་ཀྱང་མེད་པས། དབྱེ་འབྱེད་ཟེར་བ་ནི་གཞི་མེད་ཀྱི་སྟོང་གཏམ་ཞིག་ཡིན་པ་ངེས་པར་དུ་ཤེས་དགོས་སོ། ཞེས་བསྒྲགས་གཏམ་འདི་སྤེལ་ཡོད།། །།
ཨ་རིའི་མི་ཎི་སོ་ཊ་མངའ་སྡེའི་བོད་རིགས་སྤྱི་མཐུན་ཚོགས་པའི་རྒྱུན་ལས་ཐུན་མོང་ནས།
ཕྱི་ལོ་ ༢༠༡༤ ཟླ་ ༡༢ ཚེས་ ༢༠ ཉིན།།
