༢༠༡༤ ཟླ་ ༡༢ ཚེས་ ༣༠ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༢ ཚེས་ ༢༧ ཉིན་མོན་གྷོ་གཞིས་ཆགས་སུ་རྟེན་གཞི་བྱས་པའི་དགའ་ལྡན་བྱང་རྩེ་གྲྭ་ཚང་གི་འདུ་ཁང་ནང་དུ་༧གོང་ས་༧སྐྱབས་མགོན་ཆེན་པོ་མཆོག་གིས་བྱང་ཆུབ་ལམ་རིམ་ཆོས་འབྲེལ་ཉིན་ལྔ་པའི་ཉིན་གུང་བཀའ་ཆོས་ལེགས་པར་གྲུབ་མཚམས། འདི་ག་ཕྱི་དྲིལ་བོད་ཡིག་ཚན་པའི་གསར་འགོད་པ་ངག་དབང་ཐོགས་མེད་ལགས་ཀྱིས་དགའ་ལྡན་ཤར་རྩེ་ཉག་རེ་ཁང་ཚན་གྱི་གཟིམ་ཤག་ཏུ་མདོ་ཁམས་བྲག་གཡབ་༧སྐྱབས་མགོན་བློ་ལྡན་ཤེས་རབ་རིན་པོ་ཆེ་མཆོག་ལ་བཅར་འདྲི་ཞུས་པའི་གནས་ཚུལ་ནང་འཁོད་དོན།
དྲི་བ། རིན་པོ་ཆེ་མཆོག་ཐོག་མར་ཁ་སེང་ཕྱི་ཚེས་ ༢༦ ཉིན་མདོ་ཁམས་སེར་སྐྱ་མང་ཚོགས་རྣམས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་པའི་སྐོར་མདོར་བསྡུས་ཤིག་འགྲེལ་བརྗོད་གནང་།
ལན། ང་ཚོ་བྲག་གཡབ་སེར་སྐྱ་མི་མང་ཚོས་ལོ་མང་རིང་ནས་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུའི་འཆར་གཞི་ཡོད་ཀྱང་ད་བར་དེའི་ཐོག་འཆར་གཞི་ཁ་གསལ་ཞིག་འདིང་མ་ཐུབ་ནས་ལུས་པ་རེད། འོན་ཀྱང་སྔ་ལོར་མ་གྲོས་བསམ་པ་གཅིག་མཐུན་གྱི་ཐོག་ནས་ང་ཚོས་༧རྒྱལ་བ་ཡིད་བཞིན་ནོར་བུར་བརྟན་བཞུགས་ཤིག་འབུལ་ཐུབ་ན་ཡག་པོ་འདུག ཅེས་བསམ་ཚུལ་བྱུང་བ་ལྟར་ཡར་སྙན་སེང་ཞུས། སྙན་སེང་ཞུས་མ་ཐག་དེ་ལྟར་འགྲིག་འཐུས་ཆོག་པའི་ཞལ་བཞེས་ཐོབ་བྱུང་། ཞལ་བཞེས་མཛད་པ་ཙམ་དུ་མ་ཟད། དུས་ཚོད་དེ་ཡང་རིང་པོར་མ་ཐོགས་པར་གཏན་འབེབས་མཛད་ནས་ཐེངས་འདིར་བྱང་ཆུབ་ལམ་རིམ་ཆེན་མོའི་བཀའ་ཆོས་ཀྱི་གོ་སྐབས་འདིའི་ཐོག་མོན་གྷོ་ས་གནས་འདི་གར་ཕུལ་ན་འགྲིག་འཐུས་ཆོག་པའི་བཀའ་འཁྲོལ་ཐོབ་པར་བརྟེན་ང་ཚོ་ཚང་མ་དགའ་དད་སྤྲོ་གསུམ་གྱི་ཐོག་ནས་གྲ་སྒྲིག་ཞུ་རྒྱུའི་འགོ་བཙུགས་པ་ཡིན། རྩ་བའི་མདོ་ཁམས་བྲག་གཡབ་བརྟན་བཞུགས་གོ་སྒྲིག་ཚོགས་ཆུང་འཛུགས་རྒྱུ་འདི་འདི་ལོའི་ཕྱི་ཟླ་ ༩ ནང་བཙུགས་ཡོད། དེ་བར་དུ་གྲ་སྒྲིག་ཞུ་རྒྱུའི་གོ་སྐབས་ཟླ་བ་དྲུག་བདུན་ཙམ་ལས་བྱུང་མེད། འོན་ཀྱང་ཚོགས་ཆུང་ནང་ཡོད་པའི་ལས་བྱེད་པ་རྒན་གཞོན་བར་གསུམ་ཚང་མས་ཧུར་ཐག་འབད་ཐག་བྱས་སོང་། རྩ་བའི་བྱེས་སུ་བྲག་གཡབ་མི་འབོར་རྒྱ་ཆེ་བ་དེ་ཙམ་མེད། འོན་ཀྱང་འཛམ་གླིང་ས་ཕྱོགས་གང་སར་བྲག་གཡབ་པ་མི་འབོར་ཕྲན་བུ་ཡོད་པ་རྣམས་ལ་འབྲེལ་བ་བྱས་ནས་ཚང་མས་གང་ཐུབ་ཅི་ཐུབ་ཀྱི་ཞལ་འདེབས་ཕུལ་ནས་དེ་རིང་ང་ཚོའི་བརྟན་བཞུགས་འདི་གྲ་སྒྲིག་པོ་བྱུང་སོང་བསམས་ནས་ང་རང་སེམས་གཏིང་ནས་རྗེས་སུ་ཡི་རང་བྱས་ནས་བསྡད་ཡོད།
དྲི་བ། ཐེངས་འདིའི་བརྟན་བཞུགས་ཀྱི་མནྜལ་བཤད་པའི་ནང་དོན་གཙོ་བོ་ཁག་འགྲེལ་བརྗོད་གནང་རོགས།
ལན། སྤྱིར་ང་ཚོའི་སྲོལ་རྒྱུན་འགྲོ་སྟངས་བྱས་ན་སྐུ་ཚེ་ཞབས་པད་བརྟན་རོགས། ཞེས་མནྜལ་འབུལ་སྐབས་མནྜལ་གཙོ་སྐྱོང་བྱེད་མཁན་དེས་མནྜལ་བཤད་པ། ཞེས་བཤད་པ་རྒྱག་རྒྱུའི་ལུགས་སྲོལ་ཡོད། བཤད་པ་དེ་སྔ་མོ་ཡིན་ན་ངག་ཐོག་ནས་མར་སྐྱོར་གྱི་ཡོད། བར་ལམ་ཞིག་ནས་ངག་ཐོག་ནས་མིན་པར་ཡིག་ཐོག་ནས་འབུལ་ལམ་ཞུ་རྒྱུའི་ལུགས་སྲོལ་ཞིག་དར་ཡོད་པ་དེ་ངས་ལྟ་སྐབས་ཧ་ཅང་ཡག་པོ་མཐོང་བྱུང་། དེར་བརྟེན་ངས་ཐེངས་འདིར་ཡིག་ཐོག་ལ་མར་ཕབ་ནས་གཙོ་བོ་༧རྒྱལ་བ་རིན་པོ་ཆེ་མཆོག་གི་སྐུ་གསུང་ཐུགས་ཀྱི་ཡོན་ཏན་རེད། ཡོན་ཏན་དྲན་པའི་ཐོག་ནས་སོ་སོའི་རྒྱུད་ལ་དད་པ་འཇགས་རྒྱུ་གཅིག་དང་། ༧རྒྱལ་བ་ཡིད་བཞིན་ནོར་བུ་ནི་སྤྱིར་བོད་མི་སྤྱི་བོ་གནམ་བསྟེན་ཙམ་མིན་པར་འཛམ་གླིང་འདིའི་གླིང་ཆེན་ལྔའི་ནང་གི་འགྲོ་བ་མང་པོ་ཞིག་གི་གང་ཅིའི་གནས་སྟངས་ཐོག་ལ་བཀའ་དྲིན་བསམ་གྱིས་མི་ཁྱབ་པ་བསྐྱངས་ནས་ཞི་བདེའི་རླབས་ཆེན་གྱི་མཛད་པ་རྒྱ་ཆེན་པོ་དེ་འདྲ་བསྐྱངས་ཡོད་དུས་དེ་ཚོར་བཀའ་དྲིན་རྗེས་དྲན་ཞུ་རྒྱུའི་རྣམ་གཞག་མང་དག་གཅིག་ཡོད། དེར་བརྟེན་དེ་དག་ཚང་མ་ཡིད་ལ་དྲན་པའི་ཐོག་ནས་ང་ཚོས་༧རྒྱལ་བ་རིན་པོ་ཆེའི་དེ་སྔ་ཕན་ཆད་ཀྱི་མཛད་འཕྲིན་རྣམས་ལ་བཀའ་དྲིན་རྗེས་དྲན་གཅིག་དང་འབྱུང་འགྱུར་ཡང་སྐུ་ཚེ་ཞབས་པད་བརྟན་པའི་ཐོག་ནས་མཛད་པ་འཕྲིན་ལས་ཕྱོགས་མཐར་རྒྱས་པའི་རེ་འདུན་དང་སྲོལ་འདེབས་ཞུ་རྒྱུའི་སྙིང་པོ་དེ་འདྲ་ཞིག་ཆགས་ཡོད།
སྤྱིར་སྟངས་སྲོལ་རྒྱུན་ཐོག་ནས་བྱས་ན་མནྜལ་གསོལ་འདེབས་འདིའི་ནང་དུ་ཕ་སྤྲེ་རྒན་བྱང་ཆུབ་སེམས་པ་དང་། མ་བྲག་སྲིན་མོ་གཉིས་ནས་མར་བྱས་ནས་བོད་ཀྱི་ཆོས་རྒྱལ་རིམ་པ་དང་། ༧རྒྱལ་བ་སྐུ་ཕྲེང་ན་རིམ་གྱི་མཛད་པ་འཕྲིན་ལས་དེ་དག་ལ་བཀའ་དྲིན་དྲན་དགོས་རྒྱུ་གཅིག་ཡོད། འོན་ཀྱང་གཅིག་ནས་བཀའ་ཆོས་སྐབས་འཁེལ་སྟབས་དུས་ཚོད་མེད་ལ། གཉིས་ནས་ཡང་སྒོས་ལྷག་པར་ཅན་དུ་༧རྒྱལ་བ་ཡིད་བཞིན་ནོར་བུའི་སྐུ་ཚེ་འདིའི་མཛད་པ་འཕྲིན་ལས་ལ་ཆ་མཚོན་ན། ༧རྒྱལ་དབང་སྐུ་ཕྲེང་ཆ་ཚང་བསྡོམས་པ་ལས་སྐུ་ཚེའི་མཛད་འཕྲིན་ལྷག་པ་ཞིག་ང་ཚོས་དྲན་རྒྱུ་ཡོད་པ་གཅིག་དང་དེར་དད་པ་ཞུ་ཐུབ་རྒྱུའི་རྣམ་གཞག་གཅིག་ཡོད་སྟབས། དེ་དག་གང་ཐུབ་སྤྱི་ཐུབ་ཀྱིས་སོ་སོས་དྲན་པ་བྱས་ནས་ང་ཚོ་ད་ལྟ་ཡོད་པའི་མི་རབས་རེད། འབྱུང་འགྱུར་མི་རབས་ཚང་མར་ཕན་ཐོགས་ཡོང་རྒྱུ་རེད་བསམ་ནས་ངས་སྐུ་ཕྲེང་གོང་མ་ཡན་ཆད་སྐོར་ལ་གླེང་སློང་རྩ་བ་ནས་མ་ཞུས་པར་སྐུ་ཕྲེང་འདིའི་ཐོག་ང་རང་ཚོ་ཕལ་པའི་མིས་བློ་ཟིན་ཐུབ་པ་ཞིག་དང་བློས་དཔོག་ཐུབ་པ་གཞིར་བཞག་ནས་ཞུས་པ་ཞིག་ཡིན། ཡང་སྒོས་ལྷག་པར་ཅན་དུ་བྲག་གཡབ་པ་དང་༧རྒྱལ་བ་ཡིད་བཞིན་ནོར་བུ་འདི་ཙམ་མིན་པར་༧རྒྱལ་དབང་སྐུ་ཕྲེང་རིམ་པར་འབྲེལ་བ་ཞིག་ཡོད་སྟབས། འགྲེལ་བ་དེ་གང་འདྲ་བྱུང་མིན་སྐོར་མདོར་ཙམ་ཞུས་ན། ༧རྒྱལ་དབང་སྐུ་ཕྲེང་བཞི་པའི་སྐབས་ནས་བྲག་གཡབ་སྐྱབས་མགོན་སྐུ་ཕྲེང་དང་པོ་དང་འབྲེལ་བ་བྱུང་ཡོད། བྲག་གཡབ་སྐྱབས་མགོན་སྐུ་ཕྲེང་དང་པོ་དེ་གྲྭ་ཆས་དཀྱུས་མ་ཞིག་མཆོད་ནས་ཡོད། སྐབས་དེར་༧རྒྱལ་དབང་སྐུ་ཕྲེང་བཞི་པ་ཡོན་ཏན་རྒྱ་མཚོས་ཁྱེད་ཀྱི་འགྲོ་དོན་དེ་ཕ་ཡུལ་ལ་ཡོད། དེར་བརྟེན་ཕ་ཡུལ་རང་ལ་མར་ལོག་ཕེབས་ན་ཡག་པོ་ཡོད། ཅེས་བཀའ་ལུང་གནང་བ་བཞིན་མར་ཕེབས་ནས་བྲག་གི་གཡབ་འོག་གཅིག་ལ་སྒྲུབ་པ་གནང་ནས་ཡུན་རིང་བཞུགས་སྟབས་མི་ཚོས་བྲག་གཡབ་བླ་མ། ཞེས་མིང་དེ་དེ་འདྲ་བྱས་ནས་ཐོགས་པ་རེད།
དེ་རྗེས་མཛད་པ་འཕྲིན་ལས་རྒྱ་ཆེ་རུ་འགྲོ་སྐབས་མཛད་པ་འཕྲིན་ལས་སྤེལ་སའི་ལུང་པ་ལུང་ཚན་དེ་དག་ཕྱོགས་སྒྲིག་བྱས་ནས་བྲག་གཡབ་ཅེས་པའི་མིང་དེ་གསར་པ་ཆགས་པའི་ལོ་རྒྱུས་ཡོད། ད་བར་བྲག་གཡབ། ཅེས་པའི་མིང་དེ་ཆགས་ནས་ངས་ནོར་མེད་ན། ལོ་ངོ་ ༣༩༣ ཙམ་འགྲོ་ཡི་ཡོད་པ་བརྗོད་སྲོལ་ཞིག་ཡོད། གང་ལྟར་མདོར་བསྡུས་ནས་བརྗོད་ན་བྲག་གཡབ་སྡེ་དགོན་མི་མང་སྣོད་བཅུད་དང་བཅས་པའི་ཆོས་སྲིད། དཔལ་འབྱོར། ཆབ་སྲིད། གང་ཅིའི་གནས་སྟངས་འདི་༧རྒྱལ་བ་ཡིད་བཞིན་ནོར་བུའི་བཀའ་དྲིན་གྱི་འཚོ་བསྡད་པ་གཅིག་དང་། དེའི་སྐབས་ཀྱི་ཆབ་སྲིད་གནས་སྟངས་ཡིན་ནའང་རྒྱ་བོད་ཧོར་སོགས་མན་ཇུ་དང་བཅས་པར་འབྲེལ་བ་ཚུགས་ནས་ཡོད་དུས་དེ་འདྲའི་ཆ་ནས་ཕན་ཚུན་ཕར་རུབ་ཚུར་རུབ་བྱས་ནས་ང་ཚོ་བྲག་གཡབ་གནས་སྟངས་སྲ་ཚུགས་ནས་ད་ལྟའི་གནས་སྟངས་འདི་འདྲ་ཞིག་ཡོང་བའི་རྩ་བའི་ཆ་རྐྱེན་མང་པོ་ཞིག་ལ་བརྟེན་ནས་ཆགས་ཡོད་སྟབས། གོང་དུ་ཞུས་པ་ལྟར་གཙོ་ཆེ་ཤོས་༧རྒྱལ་བ་སྐུ་ཕྲེང་རིམ་པའི་རྒྱབ་སྐྱོར་དང་ཐུགས་རྗེའི་ལྕགས་ཐག་གིས་རྗེས་སུ་བཟུང་བའི་བཀའ་དྲིན་ལ་བརྟེན་ནས་འདི་འདྲ་ཞིག་བྱུང་བ་ཡིན་སྟབས། དེ་ཚོ་ང་ཚོས་ངེས་པར་དུ་གླེང་དགོས་པ་ཞིག་དང་། དྲན་དགོས་པ་ཞིག་ཡིན་པ་མ་ཟད། མ་འོངས་མི་རབས་ཚོར་ཡིན་ནའང་སློབ་གསོ་ཐེབས་ནས་དེའི་རྣམ་གཞག་གང་འདྲ་ཡིན་མིན་ངེས་པར་དུ་ཤེས་དགོས་པ་ཡིན་སྟབས་ངས་གླེང་སློང་རོབ་ཙམ་ཞུས་པ་འདི་འདྲ་ཡིན།
དྲི་བ། བརྟན་བཞུགས་སྐབས་༧གོང་ས་མཆོག་གིས་བཀའ་སློབ་གཙོ་བོ་གང་དང་གང་སྩལ་ཡོད།
ལན། བར་ལམ་ཕྱི་ལོ་ ༡༩༧༠ དོན་གྲངས་ནས་བྱས་༧རྒྱལ་བ་ཡིད་བཞིན་ནོར་བུ་འདིས་ང་ཚོ་སངས་རྒྱས་ཀྱི་བསྟན་པ་སྤྱི་དང་བྱེ་བྲག་ལ་དག་གཙང་མཛད་རྒྱུའི་མཛད་པ་འཕྲིན་ལས་མང་པོ་ཞིག་ཡོད་པའི་ཆ་ཤས་སུ་དོལ་ལམ་རྒྱལ་ཤུགས་ལྡན་འདི་བསྟན་གསོལ་བྱས་པ་ཡིན་ན། ཕན་ལས་གནོད་ཆེ་བ་དང་ཁེ་ལས་གྱོང་ཆེ་བ་གཟིགས་ནས་༧སྐྱབས་མགོན་༧རྒྱལ་བའི་ཡོངས་འཛིན་ཁྲི་བྱང་རྡོ་རྗེ་འཆང་མཆོག་ལ་བཀའ་བསྡུར་མཛད་མཐར་རང་གཞན་རོགས་གསུམ་ཚང་མར་གང་ལྟར་བོད་བརྒྱུད་ནང་བསྟན་གྱི་རྗེས་སུ་འཛིན་མཁན་ཚང་མར་ལམ་ནོར་ཟློག་ཤེས་བྱེད་ལུགས་བྱེད་སྟངས་དང་། བླང་དོར་རྣམ་གཞག་གང་འདྲ་ཡིན་མིན་གྱི་བཀའ་དྲིན་ལ་རྟེན་ནས་སྤྱིར་ང་ཚོ་བོད་མི་ཆོལ་ཁ་གསུམ་གྱི་བོད་མི་སྤྱི་བོ་གནམ་བསྟན་མང་ཆེ་བ་ཞིག་གིས་བཀའ་སློབ་གཞིར་བཟུང་ཐོག་ནས་སྤང་བླང་ཞུ་རྒྱུ་དེ་འདྲ་བྱུང་ཡོད། འོན་ཀྱང་གང་ཙམ་ཞིག་གིས་རང་གི་བསམ་ཚུལ་མ་འདྲ་བའི་ཐོག་ནས་འགྲོ་དང་འགྲོ་བཞིན་པ་དེ་འདྲ་ཆགས་ཡོད།དེ་འདྲ་ཡིན་དུས་རྩ་བའི་༧རྒྱལ་བ་ཡིད་བཞིན་ནོར་བུ་རང་གིས་ཚོད་ཚོད་བྱས་ནས་ཧོལ་རྒྱུགས་ཐོག་བཀའ་གནང་བཞག་པ་ཞིག་མིན། དེར་དཔྱད་པ་གསུམ་གྱི་དག་ཐེར་མཛད་པའི་གྲུབ་འབྲས་ལ་བརྟེན་ནས་བྱུང་བའི་གྲུབ་ཆ་ཞིག་ཡིན་སྟབས། ཁ་སེང་ངས་མནྜལ་བཤད་པ་བརྒྱབ་པ་ལྟར་མནྜལ་བཤད་པའི་དེབ་ནང་འཁོད་ཡོད།
ང་ཚོས་བསྐྱར་དུ་དཔྱད་པ་ཐེ་ཚོམ་བྱེད་མི་དགོས་པར་བཀའ་དེ་རང་བླང་དོར་ཞུ་ཀྱང་བྱས་ནའང་འགྲིག་པའི་གནས་སྟངས་ཞིག་ཆགས་ཡོད་ཀྱང་། ང་ཚོ་བྲག་གཡབ་ཁུལ་ལ་ཆ་བཞག་ནའང་ཆ་ཤས་གཅིག་གིས་དེ་སྔ་ཕན་ཆད་བླང་དོར་ཞུ་ཕྱོགས་ཐད་ཡང་དག་པ་མ་བྱུང་ཟེར་ན་མིན་འདུག ཅི་གསུང་བཀའ་སྒྲུབ་མ་ཞུས་པའི་གནས་སྟངས་འདི་འདྲ་ཞིག་ཆགས་ཡོད།རྩ་བའི་གོང་དུ་མནྜལ་བཤད་པའི་ནང་བྲིས་པ་བཞིན། བྲག་གཡབ་ནང་དོལ་རྒྱལ་བསྟེན་གསོལ་བྱུང་ནས་ལོ་བཞི་བཅུ་ཡས་མས་ཤིག་རེད་མ་གཏོགས། མི་རབས་ནས་མི་རབས་ལ་ཡོད་པའི་རྣམ་གཞག་ཅིག་མ་རེད། དེ་འདྲ་ཡིན་དུས་ང་ཚོ་ཚང་མས་མ་འོངས་པའི་མདུན་ལམ་ཐོག་ལ་བསམ་ཤེས་བྱེད་དགོས། ལྷག་པར་ཡང་སྒོས་སུ་བྲག་གཡབ་ནང་སྤྱི་ཚོགས་བདེ་འཇགས་ཐོག་ལ་ཚང་མས་བསམ་བློ་གཏོང་རྒྱུ་གལ་ཆེན་པོ་ཆགས་ཀྱི་ཡོད། སྤྱི་ཚོགས་བདེ་འཇགས་ལ་གནོད་སྐྱོན་གང་ནས་ཡོང་མིན་ལ་དཔྱད་པ་བྱས་ཚེ་ལུང་དང་རིག་པ་མང་པོ་ཞིག་གིས་བཤད་དགོས་པ་མེད། ང་ཚོས་གསལ་པོ་བྱས་ནས་ཉན། གསལ་པོ་བྱས་ནས་བལྟས་ན་ཤེས་ཀྱི་རེད། དོལ་རྒྱལ་བསྟེན་གསོལ་ལ་བརྟེན་ནས་སྤྱི་ཚོགས་ནང་ལ་འཆམ་མཐུན་མེད་པ་དེ་འདྲ་མང་པོ་ཞིག་ཡོང་གི་ཡོད། དེ་འདྲ་ཡིན་དུས་དེ་ཚོར་བསམ་ཤེས་བྱས་ནས་གུང་ཕྲན་ཏང་གཞུང་ཡིན་ནའང་སྤྱི་ཚོགས་བདེ་འཇགས་དགོས་གསུང་གི་ཡོད། ང་རང་ངོས་ནས་ཀྱང་དེ་སྔ་ཕན་ཆད་ལ་སྤྱི་ཚོགས་བདེ་འཇགས་དེ་གལ་ཆེན་རེད། ཅེས་རྒྱབ་སྐྱོར་བྱས་ནས་ཡིག་ངག་གཉིས་ཐོག་ནས་བར་བར་ལ་གསལ་འདེབས་ཞུ་བཞིན་ཡོད། དེ་རིང་དོལ་རྒྱལ་བསྟེན་གསོལ་བྱས་པ་དེས་༧རྒྱལ་བ་ཡིད་བཞིན་ནོར་བུར་མཚན་སྨད་ཞུ་རྒྱུའི་གནས་སྟངས་ཤིག་ཡོང་བཞིན་ཡོད། ༧རྒྱལ་བ་ཡིད་བཞིན་ནོར་བུར་མཚན་སྨད་ཞུས་ཟེར་བ་དེ་ངས་མནྜལ་བཤད་པའི་ནང་བྲིས་པ་ལྟར་ང་རང་ཚོ་བོད་མི་ཚོའི་སྙིང་ལ་དུག་མདའ་ཕོག་པ་ལྟར་མི་བདེ་བ་དང་ན་ཟུག་ཆེན་པོ་བཏང་བ་དེ་འདྲ་ཡོང་དུས་༧རྒྱལ་བ་ཡིད་བཞིན་ནོར་བུ་ནི་བོད་མི་སྤྱི་བོ་གནམ་བསྟན་ཡོངས་ཀྱི་བླ་ན་མེད་པར་གཙུག་ཏུ་བཀུར་བའི་ང་ཚོའི་མགོན་གཅིག་དང་གཉེན་གཅིག སྐྱབས་གཅིག དེ་འདྲ་རེད། གནས་ཚུལ་ཛ་མ་ཚོས་པར་གང་བྱུང་ཤོད་སྐབས་སྤྱི་ཚོགས་བདེ་འཇགས་ལ་གནོད་ཀྱི་ཡོད་པ་དེ་འདྲ་ཡིན་དུས་དེ་ཚོར་ཕྲན་བུའི་ལམ་ནོར་ཟློག་ཤེས་ཀྱི་ཐོག་ནས་མ་འོངས་པར་ལྷིང་འཇགས་དང་བདེ་འཇགས་ཡོང་རྒྱུའི་ཆ་རྐྱེན་གཅིག་བསྐྲུན་ཐུབ་པའི་རེ་བ་དེ་འདྲ་ཞིག་བྱེད་ཀྱི་ཡོད།
ཁ་བྲལ་ཟེར་བ་དེ་ང་ཚོར་མི་དགོས་པ་ཞིག་རེད། དོལ་རྒྱལ་བསྟེན་གསོལ་བྱེད་པའི་རྣམ་གཞག་དེས་ང་ཚོ་བོད་མི་ནང་ཁུལ་ལ་ཁ་བྲལ་གཏོང་གི་ཡོད། ང་ཚོར་དགོས་རྒྱུ་འདི་ཆིག་སྒྲིལ་ཡིན། ཆིག་སྒྲིལ་འདི་༧རྒྱལ་བ་ཡིད་བཞིན་ནོར་བུས་ལམ་ནོར་ཟློག་ཤེས་དང་སྤྱི་དང་བྱེ་བྲག་གི་བཀའ་སློབ་ལམ་སྟོན་གཟབ་ཅིང་རྒྱ་ཆེ་བ་དེ་འདྲ་ཞིག་གནང་བ་དེ་བདུད་རྩི་མཉམ་བསྟེན་བྱས་ན། ང་ཚོར་ཆིག་སྒྲིལ་ཡོང་རྒྱུར་འགལ་ཟླ་དང་འགོག་རྐྱེན་གང་ཡང་ཡོང་གི་མེད། ཚང་མས་བདེ་འཇགས་ཐོག་ལ་བསམ་བློ་གཏོང་རོགས་གནང་། ཆོས་ཀྱི་ཐོག་ལའང་བསམ་བློ་གཏོང་རྒྱུ་གལ་ཆེན་པོ་རེད།ང་ཚོ་འཇིག་རྟེན་འདིའི་ཐོག་བདེ་འཇགས་ཐོག་ཧ་ཅང་གལ་ཆེན་པོ་ཡིན་སྟབས་ངས་རྩ་དོན་གལ་ཆེ་བ་གཅིག་འདི་བཟུང་ནས་ཁ་སང་མནྜལ་བཤད་པའི་ནང་དེ་ལྟར་བྲིས་ཡོད། དེར་བརྟེན་ང་ཚོ་ཚང་མ་རྡོག་རྩ་ཆིག་སྒྲིལ་དང་འཕྱར་གྲུ་མཉམ་འདེགས་ཐོག་ནས་མ་འོངས་པར་ཡག་པོ་ཡོང་བ་དང་སྔ་མོ་ང་ཚོའི་སྐད་ཆ་ཤོད་སྟངས་ཀྱི་བགྲོས་ཤིག་ཡོད་པ་ལྟར་བདེ་སྐྱིང་རྫོགས་ལྡན་གྱི་དཔལ་ལ་ལོངས་སྤྱོད་ཐུབ་རྒྱུར་ཞབས་འདེགས་ཕྲན་བུ་བསྒྲུབ་ཐུབ་རྒྱུར་ངས་རེ་བ་དང་གདེང་འཇོག་བྱེད་ཀྱི་ཡོད། བརྟན་བཞུགས་གྲུབ་རྗེས་༧རྒྱལ་བ་ཡིད་བཞིན་ནོར་བུས་ང་ཚོར་གཟིགས་པ་ཆེན་པོ་གནང་ནས་སྤྱིར་མགོན་པོ་གང་ཉིད་མཆོག་ཧ་ཅང་མཛད་བྲེལ་ཆེན་པོ་ཡོད་པ་མ་ཟད། བརྟན་བཞུགས་འབུལ་མཁན་གཞན་མང་དག་གཅིག་ཡོད་ཀྱང་། ང་ཚོ་ཁེ་གཙང་ལ་དུས་ཚོད་གསོལ་རས་སྩལ་བ་དེ་ནི་ཧ་ཅང་དཀའ་དྲིན་ཆེན་པོ་བྱུང་། ངས་མནྜལ་བཤད་པའི་མཇུག་ཏུ་མ་འོངས་པར་༧རྒྱལ་བ་ཡིད་བཞིན་ནོར་བུ་སྤྱིར་བོད་དང་ལྷག་པར་བྲག་གཡབ་ལུང་པར་ཆིབས་སྒྱུར་བསྐྱངས་ཐུབ་པ་གཅིག་དང་། ཆིབས་སྒྱུར་བསྐྱངས་ནས་བཀའ་གདམས་གཞུང་དྲུག་གི་གསུང་ཆོས་ཤིག་གནང་རོགས་གནང་། ཞེས་ངས་གསོལ་འདེབས་དེ་འདྲ་ཞུས་ཡོད། དེའི་བཀའ་ལན་དུ། ༧རྒྱལ་བ་རིན་པོ་ཆེ་ཡོང་བ་ལ་ཡོང་སྟངས་རེད། ཕ་གིར་དམ་ཚིག་གཙང་མ་ཞིག་དང་། སྐུ་མདུན་གྱིས་བཀའ་གང་གནང་བ་དེར་བརྩི་མཁན་མེད་ན། ཞེད་ས་མ་ཞུས་ན། ཁ་ལ་མ་ཉན་ན་ཕྱིན་པས་དགོས་པ་གང་ཡང་མེད། ཅེས་བཀའ་སློབ་འདི་འདྲ་ཕེབས་བྱུང་། བཀའ་སློབ་དེ་དག་རིན་ཐང་ཅན། སྙིང་པོ་ལྡན་པ། བཀའ་མོལ་ཧ་ཅང་ལྗིད་ཁོག་ཆེན་པོ་རེད། དེ་འདྲ་ཡིན་དུས་ང་ཚོ་ཕྱི་ནང་གང་དུ་གནས་པའི་བྲག་གཡབ་ཁོངས་སུ་གཏོགས་པ་ཚང་མས་དེ་ཚོའི་ཐོག་ལ་བསམ་བློ་གཏོང་རྒྱུ་ཧ་ཅང་གལ་ཆེན་པོ་རེད་བསམ་གྱི་འདུག རང་གཞན་རོགས་སུ་དང་སུ་ཡིན་ནའང་༧རྒྱལ་བ་ཡིད་བཞིན་ནོར་བུ་ང་རང་ཚོའི་ཕ་ཡུལ་ལ་ཕེབས་ཐུབ་པ་ཞིག་དང་ཕེབས་པ་ཙམ་དུ་མིན་པར་ཟབ་རྒྱས་ཆོས་ཀྱི་འཁོར་ལོ་བསྐོར་ནས་དམ་པའི་ཆོས་ཀྱི་ཐོག་ནས་ང་ཚོར་མ་ནོར་བའི་ལམ་བཟང་པོ་ཡང་དག་པ་སྟོན་ཐུབ་པའི་ང་ཚོ་ཚང་མས་རེ་བ་ཞུ་བཞིན་ཡོད། ཞུ་དགོས་པ་ཞིག་ཀྱང་རེད།དེར་བརྟེན་དེའི་ཐོག་ཚང་མས་འབྱུང་འགྱུར་དགོངས་པ་བཞེས་རྒྱུ་གལ་ཆེན་པོ་རེད་བསམ་བཞིན་འདུག
་
