༢༠༡༤ ཟླ་ ༡༡ ཚེས་ ༡༠ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༩ ཉིན་ཨ་རིའི་མི་སེར་ཉེན་སྲུང་དང་། མང་གཙོ། འགྲོ་བ་མིའི་ཐོབ་ཐང་བཅས་ཀྱིདྲུང་ཆེ་གཞོན་པ་དང་། བོད་དོན་དམིགས་བསལ་འབྲེལ་འཐུད་པ་ལྕམ་སྐུ་ས་རཱ་སི་ཝལ་ (Sarah Sewall) མཆོག་བལ་ཡུལ་དུ་ཕེབས་འབྱོར་གནང་ཡོད་འདུག
དེ་ཡང་བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། ལྕམ་སྐུ་ས་རཱ་སི་ཝལ་མཆོག་བལ་ཡུལ་དུ་བཞུགས་རྒྱུན་རིང་བལ་ཡུལ་གྱི་སྲིད་བློན་སྐུ་ཞབས་སུ་ཤཱིལ་ཀོཡི་རཱ་ལ་ (Sushil Koirala) མཆོག་དང་། ཕྱི་སྲིད་བློན་ཆེན་སྐུ་ཞབས་མཱ་ཧིན་རྡ་ར་བྷ་རྡུར། (Mahendra Bahadur Pandey) མཆོག་སོགས་གནད་ཡོད་མི་སྣ་ཁག་གཅིག་དང་མཇལ་འཕྲད་ཀྱིས་བལ་ཡུལ་ནང་ཡོད་པའི་བོད་མིའི་གནད་དོན་སྐོར་གླེང་སློང་གནང་རྒྱུ་ཡིན་འདུག
གཞན་ཡང་ཁོང་གིས་བལ་ཡུལ་གྱི་རྒྱལ་ས་ཀཐ་མན་གྲུ་དང་། སྤོཀ་ར་ཁུལ་དུ་ཡོད་པའི་བོད་མིའི་སྡོད་སྒར་ཁག་ཏུ་གཟིགས་སྐོར་ཁག་ལེགས་པར་གྲུབ་རྗེས་རྒྱ་གར་གྱི་རྒྱལ་ས་ལྡི་ལིར་ཕེབས་ཏེ། འདི་ལོའི་ནོ་བེལ་ཞི་བདེའི་གཟེངས་རྟགས་ཐོབ་མཁན་སྐུ་ཞབས་ཀེ་ལཤ་སཏ་ཡར་ཐི་ (Kailash Satyarthi) ལགས་དང་མཇལ་འཕྲད་གནང་རྗེས་རྡ་སར་ཆེད་ཕེབས་ཀྱིས་བོད་མིའི་སྒྲིག་འཛུགས་ཀྱི་དབུ་ཁྲིད་ཁག་དང་མཇལ་འཕྲད་གནང་སྟེ། བཙན་བྱོལ་བོད་མིའི་གནད་དོན་སྐོར་བཀའ་མོལ་གནང་རྒྱུ་དང་། ལྷག་པར་རྒྱ་གར་དང་བལ་ཡུལ་ནང་ཡོད་པའི་བཙན་བྱོལ་བོད་མིའི་འཕྲོད་བསྟེན་གྱི་མཐུན་རྐྱེན་བཟང་དུ་གཏོང་ཆེད་ཨ་སྒོར་ས་ཡ་ ༣་༢ གནང་རྒྱུའི་གསལ་བསྒྲགས་ཀྱང་གནང་རྒྱུ་ཡིན་ལུགས་ཨ་རི་ཕྱི་སྲིད་ལས་ཁུངས་ཀྱི་མགྲིན་ཚབ་པས་གསུངས་འདུག
