༢༠༡༤ ཟླ་ ༡༡ ཚེས་ ༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༢ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་མཁས་དབང་བློ་བཟང་སེང་གེ་མཆོག་གིས་རྒྱ་གར་འབྲས་ལྗོངས་མངའ་སྡེའི་ནང་ཉིན་གསུམ་གྱི་གཞུང་འབྲེལ་འཚམས་གཟིགས་དབུ་འཛུགས་གནང་ཡོད། སྲིད་སྐྱོང་མཆོག་རེས་གཟའ་སྤེན་པའི་ཉིན་རྒྱབ་ཐད་འཕུར་གནམ་གྲུ་བརྒྱུད་སྒང་ཏོག་ཏུ་ཕེབས་འབྱོར་གནང་སྐབས།
གནམ་ཐང་དུ་ཤར་ཕྱོགས་བོད་མིའི་ས་གནས་ཁྲིམས་ཞིབ་པ་དང་། སྒང་ཏོག་དང་ར་ཝང་ལ་གཉིས་ཀྱི་ས་གནས་འགོ་འཛིན་གྱིས་གཙོས་དགོན་སྡེ་དང་གཞུང་འབྲེལ་དང་གཞུང་འབྲེལ་མིན་པའི་ཚོགས་སྐྱིད་ཁག་གི་ལས་སྣེ་ཡོངས་ཀྱིས་ཕེབས་བསུ་གཟབ་རྒྱས་ཞུས་འདུག དེ་རྗེས་སྒང་ཏོག་བོད་ཀྱི་གསོལ་མགྲོན་ཁང་དུ་ཕེབས་འབྱོར་སྐབས་ས་གནས་མང་ཚོགས་རྣམས་ཀྱིས་ཕེབས་བསུ་དང་བཅས་དེ་ཉིན་སྒང་ཏོག་ནས་ར་ཝང་ལར་རླངས་འཁོར་བརྒྱུད་ཕེབས་ཐོན་གནང་། སྲིད་སྐྱོང་མཆོག་ཕྱེད་ཡོལ་ར་ཝང་ལར་ཕེབས་འབྱོར་སྐབས་མང་ཚོགས་རྣམས་ཀྱིས་ཕེབས་སུ་གཟབ་རྒྱས་ཞུས།
སྲིད་སྐྱོང་མཆོག་གིས་ཐེངས་འདིར་ར་ཝང་ལ་ཀུན་ཕན་གླིང་བོད་མིའི་གཞིས་ཆགས་ཀྱི་སློབ་གྲྭ་དང་། དགོན་སྡེ། ཚོགས་སྐྱིད་ཁག སྨན་རྩིས་ཁང། མཉམ་འབྲེལ་རུམ་བཟོ། ས་གནས་ཁྲིམས་ཞིབ་ལས་ཁང་སོགས་ལ་འཚམས་གཟིགས་གནང་བ་མ་ཟད། དེ་ཉིན་འབྲས་ལྗོངས་ National Institue of Technology Sikkim (NIT Sikkim) ཞེས་པས་མགྲོན་འབོད་ལྟར་ཆེད་ཕེབས་ཀྱིས་དགེ་ལས་སློབ་ཕྲུག་ཚོར་གསུང་བཤད་གནང་། ཉིན་རྒྱབ་གཞིས་ཆགས་ཀྱི་རྒྱལ་ཡུམ་ཆེན་མོའི་དྲན་རྟེན་ཚོགས་ཁང་ནང་ར་ཝང་ལ་མང་ཚོགས་ཚོར་འཚམས་འདྲི་དང་། བཀའ་ཤག་སྐབས་བཅུ་བཞི་པས་འདས་པའི་ལོ་གསུམ་རིང་གི་ལས་དོན་ཇི་ཞུས་སྐོར་དང།
རྒྱལ་སྤྱིའི་ནང་བོད་དོན་ཐོག་ལ་རྒྱབ་སྐྱོར་གྱི་གནས་སྟངས། དབུ་མའི་ལམ། བཀའ་ཤག་གི་བལྟ་གྲུབ་གསུམ། ཤེས་རིག་ལས་ཁུངས་ཀྱི་སློབ་ཡོན་ལས་གཞི་ཁག་སོགས་ངོ་སྤྲོད་གསུང་བཤད་གནང་འདུག
ཕྱོགས་མཚུངས་སྲིད་སྐྱོང་མཆོག་གིས་སྐབས་དེར་བོད་མིའི་སྤྱི་ཚོགས་ལ་ཤེས་ཡོན་ནི་ཧ་ཅང་གི་གལ་ཆེན་པོ་ཡིན་པ་དང་། 
ཕ་མ་ཚོའི་ངོས་ནས་ཕྲུ་གུ་ཚོར་གང་ཐུབ་ཤེས་ཡོན་ཡག་པོ་སྤྲོད་རྒྱུ་གལ་ཆེན་པོ་ཡིན། ང་ཚོ་བོད་མི་ས་ཡ་དྲུག་གི་ནུས་པ་ཆ་ཚང་ཞིག་སྟོན་རྒྱུར་ཤེས་ཡོན་ཐོག་ལ་འབད་བརྩོན་བྱེད་རྒྱུ་དེ་ཧ་ཅང་གི་གལ་ཆེན་པོ་རེད། ཤེས་ཡོན་ཐོག་ནས་ང་ཚོས་བོད་ནང་གི་བོད་མི་ཚོའི་མངོན་འདོད་དང་རེ་བ་བསྒྲུབ་ཐུབ་ཀྱི་རེད་གསུང་ཡོད། དེ་བཞིན་དུ་བོད་མི་ཚང་མ་ནང་ཁུལ་མཐུན་སྒྲིལ་ཡག་པོ་བྱེད་དགོས་སྐོར་དང་།
རྒྱ་གར་གཞུང་མང་གཉིས་བོད་མི་ཚོར་བཀྲིན་ཆེན་པོ་ཡིན་པའི་སྐོར། དོལ་རྒྱལ་རྗེས་འབྲང་པས་རྒྱ་ནག་གཞུང་གི་ངན་ཇུས་འོག་ནས་༸གོང་ས་མཆོག་ལ་མཚན་སྨད་ཞུ་བཞིན་པ་དེ་དག་གཞི་མེད་ཡིན་པ་སོགས་འབྲེལ་བརྗོད་གནང་འདུག
མི་མང་ཚོགས་ཆེན་གྲུབ་མཚམས་ས་གནས་ཀྱི་ལས་ཀྱི་སྣེ་མོ་བ་ཚོ་དང་ལྷན་དུ་བཞུགས་མོལ་ཚོགས་འདུ་གནང་ཡོད་ཅིང་། དེ་ཉིན་ཕྱི་དྲོར་སྲིད་སྐྱོང་མཆོག་ར་ཝང་ལའི་འཚམས་གཟིགས་ཁག་གྲུབ་ནས་སྒང་ཏོག་ཕྱོགས་སུ་ཕེབས་གནང་བ་བཅས།།
