༢༠༡༤ ཟླ་ ༡༡ ཚེས་ ༡༧ རེས་གཟའ་ཟླ་བ།
༄༅། །བྱ་མདའ་དགོན་པ་ནི་བོད་ས་མ་ཤོར་གོང་ཁམས་རྒྱལ་སྟོན་རྫོང་གི་ཁོངས་གཏོགས་ཡིན་འདུག་ལ། ད་ལྟ་འབྲི་རུ་རྫོང་ཁོངས་སུ་ཡོད་པ་དང་། རྒྱ་གཞུང་གི་ཆོག་མཆན་ཡོད་པའི་བཙུན་མ་ ༡༤༠ ཡོད་འདུག དེ་བཞིན་དགོན་དེར་ཆོག་མཆན་མ་རག་པའི་བཙུན་མ་མང་པོས་སློབ་གཉེར་བྱེད་ཀྱི་ཡོད་པ་དང་། རྒྱུན་དུ་རྒྱ་གཞུང་གི་ལས་དོན་རུ་ཁག་ཡོང་སྐབས་ཐོ་དེབ་ནང་མ་འཁོད་པའི་བཙུན་མ་དེ་དག་རི་མགོར་སོགས་ལ་གབ་དགོས་པའི་གནས་སྟངས་བྱུང་འདུག
ད་ལོའི་ཕྱི་ཟླ་ ༩ ནས་བཟུང་ལས་དོན་རུ་ཁག་ཆེས་མང་པོ་དགོན་དུ་ཡོང་ནས། ༸གོང་ས་མཆོག་ལ་མཚན་སྨད་བྱེད་དགོས་པའི་བཙན་བཀའ་བཏང་ཡང་། བཙུན་མ་དེ་དག་གི་ཁ་གཅིག་གྲག་གིས་ཁས་ལེན་མ་བྱས་པས། བཅའ་སྡོད་ལས་བྱེད་དེ་ཚོས་ཞིབ་བཤེར་བྱས་ནས་ཐོ་དེབ་ནང་མ་མཁོད་པའི་དགོན་དེའི་བཙུན་མ་༢༦ ཙམ་ཕྱིར་འབུད་བཏང་འདུག དགོན་དེའི་བཙུན་མ་ཁག་གཅིག་ཆགས་ས་བརྟེན་ས་མེད་པ་ཆགས་ནས་ངུ་བཞིན་འདུག་ཅེས་འགྲེལ་བརྗོད་བྱས་བྱུང་།
བྱ་མདའ་དགོན་པ་ནི་དགེ་ལུགས་པའི་ཆོས་བརྒྱུད་འཛིན་པའི་བཙུན་མའི་དགོན་སྡེ་ཞིག་ཡིན་པ་དང་། འཛིན་རིམ་དགུ་པ་བར་དུ་སློབ་སྦྱོང་བྱེད་ཆོག རྒྱུན་དུ་བན་དཀར་ཡུལ་ཚོའི་བཙུན་མ་དང་། ཉེ་འཁོར་གྱི་རྒྱལ་སྟོན། ཁྲི་རྡོ། ནགས་ཤོད། སོག་རྫོང་བཅས་ཀྱི་བཙུན་མ་མང་པོ་སློབ་གཉེར་བྱེད་བཞིན་ཡོད་པ་མ་ཟད། མདོ་དབུས་ཁམས་གསུམ་གང་ས་ནས་བཙུན་མ་མང་པོ་སློབ་གཉེར་བྱེད་དུ་སླེབས་ཡོད་འདུག
ཡེ་ཤེས་མཁའ་འགྲོ་བསོད་ནམས་དཔལ་འདྲེན་གྱི་སྲས་དྲུང་ཆེན་བསོད་ནམས་དོན་གྲུབ་ཀྱིས་ ༡༤༨༨ ལོར་ཕྱག་བཏབ། ཐོག་མར་བཀའ་བརྒྱུད་པའི་དགོན་པ་ཡིན་པ་དང་། ཕྱིས་སུ་སྟག་ཕུ་མཐུ་ཆེན་བློ་བཟང་འཇམ་དཔལ་གྱིས་དགེ་ལྡན་པའི་དགོན་པར་བསྒྱུར་ཡོད་འདུག རིག་གསར་སྐབས་བོད་སྤྱིའི་དགོན་སྡེ་ལྟར་གོད་ཆག་བྱུང་ཡང་། རྗེས་སུ་ ༡༩༨༤ ལོ་ཙམ་ནས་བཙུན་མ་ཆོས་འཛོམས་ཀྱིས་གཙོས་བཙུན་མ་དག་གི་ཉམས་གསོ་བྱས་ཡོད་འདུག
