༢༠༡༤ ཟླ་ ༡༡ ཚེས་ ༥ རེས་གཟའ་ལྷག་པ།
༄༅། །བོད་མིའི་སྒྲིག་འཛུགས་ཕྱི་དྲིལ་འགྲེམས་སྟོན་ཚན་པས་ཕྱི་ལོ་ ༢༠༡༤ ཟླ་ ༡༠ ཚེས་ ༣༠ དང་ ༣༡ བཅས་ཉིན་གཉིས་རིང་རྒྱ་གར་བྱང་ཕྱོགས་ཨུཏྟར་ཁནྜ་ Uttarkhand མངའ་སྡེའི་གྲོང་སྡེ་མ་སུ་རིར་རྟེན་གཞི་བྱས་པའི་ཝུ་ཌི་སི་ཊོཀ་རྒྱལ་སྤྱིའི་Woodstock International School སློབ་གྲྭའི་ནང་༸གོང་ས་མཆོག་དང་། བོད་དོན་སྐོར་གྱི་པར་རིགས་འགྲེམས་སྟོན་གནང་འདུག
དེ་ཡང་ཝུ་ཌི་སི་ཊོཀ་རྒྱལ་སྤྱིའི་སློབ་གྲྭའི་ཆོས་དགེ་སྐུ་ཞབས་བྷ་ར་ཡེན་ཌན་Mr. Brian Dunn ལགས་ཀྱིས་མགྲོན་འབོད་ལྟར་ཁུལ་དེར་པར་རིགས་འགྲེམས་སྟོན་གནང་འདུག སྐབས་དེར་རྒྱལ་ཁབ་ཁག་ ༦༠ ཙམ་གྱི་དགེ་ལས་སློབ་ཕྲུག་གྲངས་ ༤༠༠ བརྒལ་བ་རྣམས་ཀྱིས་འགྲེམས་སྟོན་དེར་ཧ་ཅང་དོ་སྣང་ཆེན་པོ་གནང་འདུག ཕྱེད་ཡོལ་བོད་དོན་དང་འབྲེལ་བའི་དངོས་བྱུང་གློག་བརྙན་བསྟན་འདུག པར་རིགས་དང་གློག་བརྙན་གྱི་ལམ་ནས་སློབ་ཕྲུག་རྣམས་ལ་བོད་ཀྱི་ལོ་རྒྱུས་དང་། ཐུན་མིན་རིག་གཞུང་། ད་ལྟའི་བོད་ནང་གི་ཛ་དྲག་གནས་སྟངས། རྒྱ་གར་ནང་བཙན་བྱོལ་བོད་མིའི་གནས་སྟངས་སོགས་ངོ་སྤྲོད་གནང་ཡོད། གཞན་ཡང་སྐབས་དེར་ཕྱི་དྲིལ་འགྲེམས་སྤེལ་ཚན་པས་འགྲེམས་སྤེལ་གནང་བའི་བོད་དོན་སྐོར་གྱི་དབྱིན་ཡིག་དུས་དེབ་ Tibetan Bulletin དང་། བོད་མིའི་སྒྲིག་འཛུགས་དང་དབུ་མའི་ལམ་གྱི་སྲིད་བྱུས་དང་འབྲེལ་བའི་ངོ་སྤྲོད་སོགས་འགྲེམས་སྤེལ་གནང་ཡོད། སྐབས་དེར་སློབ་ཕྲུག་ཚོས་པར་རིགས་དེ་དག་གི་འགྲེལ་བཤད་རྣམས་སོ་སོ་སྒེར་གྱི་གློག་ཀླད་ནང་ཟིན་བྲིས་བཀོད་པ་སོགས་དོ་སྣང་ཧ་ཅང་ཆེན་པོ་གནང་འདུག གཞན་ཡང་ཕྱི་དྲིལ་འགྲེམས་སྟོན་ཚན་པས་ཕྱི་ཟླ་ ༡༡ ཚེས་ ༡༡།༡༤ བར་མངའ་སྡེའི་ནེ་ནི་ཏཱལ་Nainital ཞེས་པའི་ཡུལ་སྐོར་སྤྲོ་འཆམ་བྱེད་ས་གྲགས་ཅན་དེར་སྟོན་ཀའི་དུས་ཆེན་དང་སྟབས་བསྟུན་པར་རིགས་འགྲེམས་སྟོན་གནང་རྒྱུ་ཡིན་འདུག
