༢༠༡༤ ཟླ་ ༡༡ ཚེས་ ༢༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༢༢ ཉིན་༸གོང་ས་མཆོག་གིས་སྔ་དྲོ་ཐོག་མར་སི་པི་རིང་ཌེལ་སློབ་གྲྭ་ Springdales School ཞེས་པ་དེར་ཆིབས་སྒྱུར་བསྐྱངས་ནས་དགེ་ལས་སློབ་ཕྲུག་ཚོར་འགྲོ་བ་མིའི་བཟང་སྤྱོད་ཀྱི་རིན་ཐང་གོང་མཐོར་གཏོང་ཐབས་སྐོར་བཀའ་སློབ་སྩལ། དེ་ཡང་མགོན་པོ་གང་ཉིད་མཆོག་སློབ་གྲྭའི་ནང་༸ཞབས་སོར་འཁོད་སྐབས་སློབ་སྤྱི་ལྕམ་སྐུ་ཨ་མི་ཏཱ་མུལ་ལ་ཝ་ཏལ་ Principal, Mrs Ameeta Mulla Wattalམཆོག་གིས་གཙོས་འབྲེལ་ཡོད་རྣམས་ནས་ཕེབས་བསུ་གཟབ་རྒྱས་ཞུས་འདུག དེ་རྗེས་སློབ་གྲྭ་དེ་ཐོག་མར་གསར་འཛུགས་གནང་མཁན་དགུང་གྲངས་ ༩༠ སོན་པའི་ལྕམ་སྐུ་རཱཇ་ནི་ཀུ་མཱར་ Mrs Rajni Kumar མཆོག་དང་འབྲེལ་ཡོད་སློབ་སྤྱི་གཞན་ཁག་བཅས་ལ་མཇལ་ཁ་སྩལ། དེ་ཡང་ལྕམ་སྐུ་རཱཇ་ནི་ཀུ་མཱར་མཆོག་གིས་ཕྱི་ལོ་ ༡༩༥༥ ལོར་སློབ་གྲྭ་དེ་ཐོག་མར་གསར་འཛུགས་གནང་། ཁོང་ནས་སློབ་གྲྭ་དེ་འདྲ་ཞིག་ཆེད་མངགས་གསར་འཛུགས་གནང་དགོས་དོན་གཙོ་བོ་ནི། སློབ་ཕྲུག་ཚོར་ཕྱོགས་ཡོངས་ཀྱི་གནས་ཚུལ་ཤེས་ནས་བློ་རིག་གོང་འཕེལ་གཏོང་ཐུབ་རྒྱུ་ཙམ་མ་ཟད།
རིས་མེད་ཀྱི་ལྟ་གྲུབ་གཞིར་བཞག་ཐོག་བྱམས་བརྩེ་དང་དྲང་བདེན་སོགས་འགྲོ་བ་མིའི་བཟང་སྤྱོད་གོང་འཕེལ་གཏོང་ཆེད་ཡིན་འདུག དེ་ནས་༸གོང་ས་མཆོག་སྡིངས་ཆའི་ཐོག་༸ཞབས་སོར་འཁོད་བསྟུན། ཆེ་བསྟོད་ཀྱི་གོས་རས་དང་རྩི་ཤིང་སྐྱེས་འཚར་བྱེད་བཞིན་པ་ཞིག་ཕྱག་རྟགས་སུ་འབུལ་ལམ་ཞུས། མགོན་པོ་གང་ཉིད་མཆོག་ནས་ཀྱང་ཕྱག་རྟགས་དེ་དག་ཐུགས་དགྱེས་ཚོར་ཆེན་པོས་དགྱེས་བཞེས་མཛད་པ་མ་ཟད། སྣང་གསལ་ཞལ་ཕྱེ་མཛད་ནས་མཛད་སྒོ་དབུ་འབྱེད་མཛད། སྐབས་དེར་སློབ་མ་ཁག་གཅིག་གིས་རིས་མེད་ཀྱི་གླུ་དབྱངས་བཏང་། སློབ་སྤྱི་མཆོག་ནས་གསུང་བཤད་གནང་སྐབས་སློབ་གྲྭ་དེའི་དགེ་ལས་སློབ་སྤྱི་དང་སློབ་ཕྲུག་བཅས་ཚང་མས་ཡུན་རིང་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སློབ་གྲྭར་གདན་འདྲེན་ཞུ་རྒྱུའི་འདོད་དོན་ཡོངས་སུ་གྲུབ་པར་བརྟེན་ཧ་ཅང་སྐལ་པ་བཟང་པོ་བྱུང་སོང་། ཞེས་གསུངས་པ་དང་སྦྲགས། ༸གོང་ས་མཆོག་ལ་བཀའ་སློབ་སྩལ་གནང་ཡོང་བའི་གསོལ་འདེབས་ཞུས་པར་མགོན་པོ་གང་ཉིད་མཆོག་ནས་ཀྱང་ལམ་སྟོན་བཀའ་སློབ་སྩལ་དོན། བཀུར་འོས་སློབ་སྤྱི་རྣམས་དང་དགེ་རྒན་རྣམ་པ། དེ་བཞིན་སྤུན་ཟླ་རྒན་གཞོན་རྣམས་ལ་ཐོག་མར་ངོས་ནས་འཚམས་འདྲི་ཞུ་རྒྱུ་ཡིན།
ངོས་རང་རྒྱུན་དུ་མི་སུ་དང་ཐུག་སྐབས་ང་ཚོ་ཚང་མ་འགྲོ་མིའི་འདུ་ཤེས་འཛིན་མཁན་གཅིག་མཚུངས་ཆགས་ཡོད་བསམ་པ་དྲན་བཞིན་འདུག ང་ཚོ་ཚང་མར་མིའི་ཀླད་པ་ཡོད་མཁན་གཅིག་གྱུར་ཡིན་སྟབས། རྣམ་དཔྱོད་ཀྱང་ཡོད་པ་གཅིག་མཚུངས་ཆགས་ཡོད། འོན་ཀྱང་སྐབས་རེ་རྣམ་དཔྱོད་དེས་རྙོག་གྲ་བཟོ་བཞིན་ཡོད། འོན་ཀྱང་གཞི་རྩའི་འགྲོ་བ་མིའི་རང་བཞིན་འདི་བྱམས་བརྩེ་ལྡན་པ་ཞིག་ཡིན། ཚན་རིག་པས་ཉམས་ཞིབ་བྱས་འབྲས་སུ་བྱིས་པ་ཆུང་ངུ་ཚོས་ཀྱང་གཞན་ལ་གནོད་བསྐྱལ་རྒྱུ་ལས་ཕན་ཐོགས་བྱེད་རྒྱུར་དགའ་བ་བྱེད་བཞིན་ཡོད་པ་ཚོད་ལྟའི་ལམ་ནས་རྙེད་ཤེས་རྟོགས་བྱུང་བར་བརྟེན། དེ་ནི་འགྲོ་བ་མིའི་རིགས་ནི་སྤྱི་ཚོགས་ལ་རྟེན་ནས་འཚོ་དགོས་པའི་སེམས་ཅན་ཞིག་ཡིན་པ་དང་ཡོངས་སུ་མཐུན་ཡོད་པ་དང་། ང་ཚོ་སྤྱི་ཚོགས་ལ་རྟེན་ནས་འཚོ་དགོས་སྟབས་སྤྱི་ཚོགས་ནི་ཕན་ཚུན་ཡི་ཆེས་དང་བྱམས་བརྩེ་ལ་རྟེན་ནས་སྤྱི་ཚོགས་ཆགས་ཐུབ་རྒྱུ་ལས་ཁོང་ཁྲོ་དང་ཕྲག་དོག་སོགས་ཀྱིས་ཕན་ཚུན་འབྲེལ་བ་རིང་དུ་བཏང་ནས་མཐུན་ལམ་ཡོང་གི་མེད།
གཞན་གྱི་བདེ་སྡུག་ལ་བསམ་བློ་གཏོང་ཐུབ་པ་ཞིག་བྱུང་ན་ང་ཚོའི་རྣམ་དཔྱོད་དེ་ཡང་མཐུན་ཕྱོགས་སུ་བཀོལ་ཐུབ། དེང་རབས་ཤེས་ཡོན་ལམ་ལུགས་ནང་གཙོ་བོ་ཕྱི་དངོས་པོར་དམིགས་པར་བརྟེན་དེས་བྱམས་བརྩེའི་བསམ་བློ་གོང་སྤེལ་གཏོང་རྒྱུར་འདང་གི་མེད། ཤེས་ཡོན་ལམ་ལུགས་ནང་བཟང་སྤྱོད་སྐོར་ཡོད་ཀྱང་ཆོས་ལུགས་ལ་རྟེན་ནས་ཡོད། ལྟ་གྲུབ་འདྲ་མིན་ཡོད་ཀྱང་གཞི་རྩའི་ཆོས་ལུགས་གཙོ་གྲས་ཚང་མས་བྱམས་བརྩེའི་ཉམས་ལེན་སྐོར་གསུང་བཞིན་ཡོད། བྱམས་བརྩེ་ཉམས་ལེན་བྱས་པར་བཟོས་སྲན་དང་འདོད་ཆུང་ཆོག་ཤེས། གནོད་པ་ལ་ཇི་མི་མཉམ་པའི་བཟོད་པ། རང་ཁྲིམས་སྲུང་རྒྱུ་སོགས་ལག་བསྟར་བྱེད་དགོས། བཟང་སྤྱོད་དེ་དག་ཉམས་ལེན་བྱ་རྒྱུའི་དམིགས་ཡུལ་གཙོ་བོ་ནི་བྱམས་བརྩེ་གོང་འཕེལ་གཏོང་རྒྱུ་ཡིན། ཞེས་སོགས་ཀྱི་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་སྩལ།
དེ་རྗེས་ཉིན་རྒྱབ་ཏུ་༸གོང་ས་མཆོག་གིས་ཨཱ་ནནྡཱ་ཨས་པེན། Ananta Aspen Centre ཞེས་པའི་ཉམས་ཞིབ་བསྟི་གནས་ཁང་ཞིག་ཡོད་པ་དེར་ཆིབས་སྒྱུར་བསྐྱངས་ནས་ཚོང་པ་དང་གསར་འགོད་པ། དེ་བཞིན་ཆབ་སྲིད་པ་དང་མཁས་པ་སོགས་འདུས་ཐོག་མགོན་པོ་གང་ཉིད་མཆོག་གིས་འགྲོ་བ་མིའི་བཟང་སྤྱོད་དང་ཆོས་ལུགས་མཐུན་སྒྲིལ་གོང་འཕེལ་གཏོང་ཐབས་དང་བོད་ཀྱི་ཐུན་མིན་རིག་གཞུང་སྲུང་སྐྱོབ་བཅས་སྐུ་ཚེའི་རླབས་ཆེན་གྱི་མཛད་འགན་གཙོ་བོ་གསུམ་སྐོར་བཀའ་སློབ་སྩལ་རྗེས་དྲི་བ་རྣམས་ལ་བཀའ་ལན་ཡང་སྩལ་འདུག
