༢༠༡༤ ཟླ་ ༡༡ ཚེས་ ༢༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༢༤ ཕྱེད་ཡོལ་ཆུ་ཚོད་ ༣།༢༥ ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནང་སྲིད་བཀའ་བློན་མཆོག་གིས་གསོལ་འདེབས་ཞུས་དོན་ལྟར། རྒྱ་གར་ནང་སྲིད་བློན་ཆེན་གཞོན་པ་སྐུ་ཞབས་ཀི་རེན་རི་ཇི་ཇུ་ Shri. Kiran Rijiju མཆོག་དང་རྒྱ་གར་ནང་སྲིད་ལས་ཁུངས་ཀྱི་ཟུང་དྲུང་སྐུ་ཞབས་ཀེ་ཀེ་པ་ཐག་ Shri, K.K Pathak མཆོག་བཅས་ལ་རྒྱལ་ས་ལྡི་ལིའི་ཏཱཇ་མན་སིངྒ་གསོལ་མགྲོན་ཁང་ Taj Mansingh Hotel དུ་མཇལ་ཁ་སྩལ་འདུག སྐབས་དེར་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་ནང་སྲིད་དྲུང་འཕར་དཔལ་ལྡན་དོན་གྲུབ་ལགས་ཀྱང་བཅར་འདུག དེ་ཡང་ཕྱི་ལོ་ ༢༠༡༤ ཟླ་ ༡༠ ཚེས་ ༢༠ ཉིན་རྒྱ་གར་གཞུང་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ ༢༠༡༤ Tibetan Rehabilitation Policy 2014 ཞེས་པ་གཏན་འབེབ་བྱུང་རྗེས་རྒྱ་གར་གཞུང་གིས་འབྲེལ་ཡོད་མི་སྣ་ཚོས་༸གོང་ས་༸སྐྱབས་མགོན་ཆེན་པོ་མཆོག་མཇལ་ཁ་ཞུ་བ་ཐོག་མ་ཆགས་ཡོད། དེར་བརྟེན་༸གོང་ས་མཆོག་གིས་སྐབས་དེར་རྒྱ་གར་ནང་སྲིད་ལས་ཁུངས་ཀྱིས་གཙོས་བོད་མིར་མཐུན་རྐྱེན་འབྱོར་སྤྲོད་བྱེད་ཕྱོགས་ཀྱི་སྲིད་བྱུས་གཏན་འབེབས་གནང་ཆེད་ཕྱག་ལས་གནང་མཁན་གྱི་འབྲེལ་ཡོད་ལས་བྱེད་ཚང་མར་ཐུགས་རྗེ་ཆེ་ཞུས་གནང་མཛད་འདུག
དེ་ཡང་ཐེངས་འདིར་རྒྱ་གར་གཞུང་གིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་བྱུས་ཕྱི་ལོ་ ༢༠༡༤ ཞེས་པ་གཏན་འབེབས་གནང་བའི་སྐབས་འདིར་རྒྱ་གར་གྱི་མངའ་སྡེ་སོ་སོས་བོད་མི་སྐྱབས་བཅོལ་བ་ཚོར་མཐུན་རྐྱེན་རོགས་རམ་གནང་སྟངས་ཐོག་ལ་ཆ་སྙོམས་ཀྱི་སྲིད་བྱུས་ཤིག་ལག་བསྟར་གནང་ཐུབ་ཀྱི་མེད་པ་རྒྱ་གར་གཞུང་གིས་མཁྱེན་རྟོགས་བྱུང་ཡོད། དེར་བརྟེན་རྒྱ་གར་གཞུང་གིས་འབྲེལ་ཡོད་མངའ་སྡེ་རྣམས་དང་ལྷན་བཀའ་བསྡུར་རིམ་པ་གནང་མཐར་སྲིད་བྱུས་འདི་འདྲ་ཞིག་གཏན་འབེབས་གནང་ཐུབ་པ་བྱུང་ཡོད། སྲིད་བྱུས་འདི་བརྒྱུད་ནས་བཙན་བྱོལ་བོད་མིའི་གནས་སྟངས་ཡར་རྒྱས་གཏོང་ཐབས་གནང་རྒྱུའི་རེ་བ་གནང་བཞིན་འདུག གཞན་ཡང་སྐབས་དེར་རྒྱ་གར་ནང་སྲིད་ལས་ཁུངས་ཀྱི་ཟུང་དྲུང་སྐུ་ཞབས་ཀེ་ཀེ་པ་ཐག་མཆོག་གིས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་འབྲེལ་ཡོད་ལས་བྱེད་བཅས་དང་ལྷན་ལ་དྭགས་བྱང་ཐང་གི་ས་གནས་བརྒྱད་ནང་གཟིགས་སྐོར་དུ་བསྐྱོད་ནས་བོད་མི་འབྲོག་པ་རྣམས་ཀྱི་གནས་སྟངས་སྤྱི་དང་ལྷག་པར་ཁོང་ཚོར་འཕྲད་བཞིན་པའི་དཀའ་ངལ་ཇི་ཡོད་དང་དཀའ་ངལ་དེ་དག་སེལ་ཐབས་ཆེད་ཐབས་ལམ་ཇི་དགེ་བཅས་ཀྱི་སྐོར་༸གོང་ས་མཆོག་ལ་སྙན་སྒྲོན་ཞུས་པར་མགོན་པོ་གང་ཉིད་མཆོག་གིས་ཐུགས་དགྱེས་ཚོར་ཆེན་པོས་གསན་བཞེས་མཛད་དེ་ལས་གཞི་དེ་དག་ལ་བསྔགས་བརྗོད་ཧ་ཅང་མཛད་འདུག
