༢༠༡༤ ཟླ་ ༡༡ ཚེས་ ༣ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༡ ཚེས་ ༢ ཉིན་གྱི་ཕྱེད་ཡོལ་དུ་སྲིད་སྐྱོང་བློ་བཟང་སེང་གེ་མཆོག་གིས་ར་ཝང་ལ་ཀུན་ཕན་གླིང་གཞིས་ཆགས་ཀྱི་རྒྱལ་ཡུམ་ཆེན་མོའི་དྲན་རྟེན་ཚོགས་ཁང་ནང་མང་ཚོགས་ལ་འཚམས་འདྲི་དང་སྦྲགས་གསུང་བཤད་གནང་དོན། ངས་སྐབས་ ༡༤ བོད་མིའི་སྒྲིག་འཛུགས་བཀའ་ཤག་གི་ལས་འཁུར་ཞུས་ནས་ལོ་གསུམ་ལྷག་རིང་སྤྱི་ཚོགས་ནང་ལྷིང་འཇགས་པོ་བྱུང་སོང་། གཙོ་ཆེ་ཤོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་མཛད་རྗེས་ང་ཚོས་ཆབ་སྲིད་ཀྱི་འགན་འཁྱེར་ཐུབ་ཀྱི་ཡོད་མེད་ཐོག་གཞིས་བྱེས་གཉིས་ཀྱི་བོད་མིར་ཧ་ཅང་བློ་འཚབ་ཆེན་པོ་བྱུང་ཡོད།
ཕྱི་ལོ་ ༢༠༡༡ ལོར་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་རྩིས་སྤྲོད་མཛད་རྗེས་བོད་མི་རྒན་པ་མང་པོ་ཞིག་ལ་སེམས་ཁྲལ་བྱུང་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་ཐུགས་རྗེ་བཀའ་དྲིན་དང་། སྐབས་ ༡༤ པའི་བཀའ་ཤག་ནས་འགན་གང་ཐུབ་ཅི་ཐུབ་འཁུར་བར་བརྟེན་གང་དུ་ཕྱིན་པ་ཡིན་ནའང་ལྷིང་འཇགས་པོ་འདུག ལྷིང་འཇགས་པོ་བྱུང་བ་འདི་གྲུབ་འབྲས་རེད་བསམས་ཀྱི་འདུག གང་ཡིན་བརྗོད་ན་ཆབ་སྲིད་ཀྱི་སྐུ་དབང་ཡོངས་རྫོགས་རྩིས་སྤྲོད་མཛད་རྗེས་རྒྱ་ནག་གཞུང་གིས་བཙན་བྱོལ་ནང་འགན་འཁུར་ཐུབ་མཁན་ཁག་པོ་དང་། སྤྱི་ཚོགས་ནང་ཟང་ཟིང་།ཚགས་ཚུད་མི་ཡོང་བ། འཐོར་གྱི་རེད་བསམ་པའི་རེ་བ་དང་འབད་བརྩོན་བྱེད་ཀྱི་ཡོད། བོད་ནང་གི་བོད་མི་ཚོ་ཡིན་ནའང་བཙན་བྱོལ་ནང་གི་བོད་མི་ཚོར་གཞི་རྩའི་འགན་འཁུར་གནང་གི་ཡོད་པ་ཤེས་ཀྱི་ཡོད། ཆབ་སྲིད་ཀྱི་སྐུ་དབང་རྩིས་སྤྲོད་ཟིན་པའི་རྗེས་སུ་གང་འདྲ་བྱེད་ཡོང་བསམ་པའི་སེམས་ཁྲལ་བྱེད་མཁན་ང་ཚོ་ལས་ལྷག་མེད་ནའང་ང་ཚོ་ནང་བཞིན་སེམས་ཁྲལ་བྱེད་མཁན་མང་པོ་བྱུང་ཡོད་རེད་བསམ་གྱི་འདུག
གཞན་ཡང་ངས་ཤེས་ཡོན་གལ་ཆེན་པོ་ཡིན་སྐོར་ཞུ་འདོད་བྱུང་། ཤེས་ཡོན་གལ་ཆེན་པོ་རྩིས་དགོས་དོན་ནི། ང་ཚོའི་མི་ལ་ནུས་པ་ག་འདྲ་ཞིག་ཡོད་པ་ཡིན་ནའང་། ནུས་པ་ཆ་ཚང་བཏོན་ཐུབ་རྒྱུར་ཤེས་ཡོན་ཆ་ཚང་ཡོད་པ་ཡིན་ན་མིའི་ནུས་པ་ཆ་ཚང་བཏོན་ཐུབ་ཀྱི་རེད། ཤེས་ཡོན་ཆ་ཚང་བ་ཞིག་མ་བྱུང་ན། ནུས་པ་ཆ་ཚང་བཏོན་ཐུབ་རྒྱུ་ཧ་ཅང་དཀའ་ལས་ཁག་པོ་རེད། ཤེས་ཡོན་ཟེར་བའི་སྐབས་སུ། ཆོས་དང་། དེང་དུས་ཤེས་ཡོན། སྨན། ཚོང་སོགས་གང་ཡིན་ནའང་། མཐར་ཕྱིན་པ་གནང་བ་ཡིན་ན། ནུས་པ་ཆ་ཚང་ཐོན་གྱི་རེད། ཕ་མའི་ངོས་ནས་ཕྲུ་གུ་སློབ་གྲྭར་བཏང་བ་ཙམ་མིན་པར་སྔ་དགོང་རང་སྦྱོང་བྱེད་ཀྱི་འདུག་དང་མིན། སློབ་གྲྭར་འགྲོ་གི་ཡོད་མེད་སོགས་ལྟ་དགོས་སྐོར་དང་། ཤེས་རིག་སློབ་ཡོན་སོགས་སློབ་ཡོན་ཁག་ངོ་སྤྲོད་གནང་།
དེ་བཞིན་སྲིད་སྐྱོང་མཆོག་གིས་ཚང་མས་མཁྱེན་གསལ་རེད། བོད་མིའི་སྒྲིག་འཛུགས་ཀྱི་ལངས་ཕྱོགས་དེ་དབུ་མའི་ལམ་རེད། དབུ་མའི་ལམ་གྱི་སྲིད་བྱུས་བརྒྱུད་ཁ་ཡོད་ལག་ཡོད་ཀྱི་ཐུགས་ཕན་གསོ་བ་ཡོང་གི་ཡོད། ༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་པ་རྒྱ་ཆེན་པོ་བཞེས་པ་དང་། བཙན་བྱོལ་དུ་ཡོད་པའི་གནད་ཡོད་མི་སྣ་མང་པོ་མཉམ་བཀའ་བསྡུར་གནང་སྟེ། རྒྱལ་སྤྱི་དང་རྒྱ་ནག བོད། རྒྱ་གར་གྱི་གནས་སྟངས་སོགས་གང་ཅིའི་ཐོག་ནས་བལྟས་པ་ཡིན་ན།དབུ་མའི་ལམ་གྱི་སྲིད་བྱུས་འདི་དགོས་ངེས་ཅན་ཡིན། རྒྱ་ནག་གི་མཁས་དབང་མང་པོ་ཞིག་དང་། ཨ་རིའི་ཕོ་བྲང་དཀར་པོ། ཡུ་རོབ། རྒྱལ་སྤྱི་བཅས་ནས་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་དང་བསྔགས་བརྗོད་གནང་གི་ཡོད།
ཉེ་ཆར་༸གོང་ས་མཆོག་ཆིབས་སྒྱུར་བསྐྱངས་ཡུལ་ཁག་ལ་དོལ་རྒྱལ་རྗེས་འབྲང་པ་ཉུང་ཤས་ཤིག་གིས་༸གོང་ས་མཆོག་ལ་མཚན་སྨད་ཞུ་རྒྱུའི་འབད་བརྩོན་བྱེད་བཞིན་ཡོད། འོན་ཀྱང་རྒྱལ་སྤྱིའི་ཐོག་ནས་ཁོ་རང་ཚོར་བརྩི་མཐོང་སྤྲོད་མཁན་མེད། ཆོས་དད་རང་དབང་སྤྲོད་ཀྱི་མི་འདུག་སོགས་གཞི་མེད་ཀྱི་མཚན་སྨད་ཞུ་རྒྱུའི་འབད་བརྩོན་བྱེད་བཞིན་ཡོད། ཆོས་དད་རང་དབང་མ་སྤྲད་པ་གང་ཡང་མ་རེད། ཁོ་རང་ཚོར་དཔྱ་ཁྲལ་ལག་དེབ་དང་། སྐྱབས་བཙོལ་ལག་དེབ། ཕྱི་བསྐྱོད་ལག་དེབ་ (IC)བཅས་དབྱེ་བ་མེད་པར་བོད་མི་སྤྱི་མཚུངས་ལྟར་ཐོབ་ཐང་ཆ་ཚང་སྤྲད་ཡོད། བོད་མིའི་གཞིས་ཆགས་ནང་བསྡད་ཡོད་པ་མ་ཟད། ཁོ་རང་ཚོས་དགོན་པ་བརྒྱབ་ཡོད། ཁོ་རང་ཚོ་གང་བྱེད་རང་དབང་རེད། ད་དུང་དབྱེ་བ་ཕྱེ་སོང་ཟེར་ནས་༸གོང་ས་མཆོག་ལ་མཚན་སྨད་ཞུ་བཞིན་ཡོད། འདི་དག་གཞི་མེད་ཀྱི་གནས་ཚུལ་རང་རེད། ཆོས་ཁ་ལ་འཁྱེར་ནས་༸གོང་ས་ མཆོག་ལ་མཚན་སྨད་ཞུ་རྒྱུ་འདི་ཡག་པོ་མ་རེད། དེར་བརྟེན་རྒྱལ་སྤྱི་དང་བཀའ་ཤག་ནས་དེ་དག་གཞི་མེད་མཚན་སྨད་རང་ལ་ངོས་འཛིན་བྱེད་བཞིན་ཡོད། ཅེས་སོགས་ཀྱི་གསུང་བཤད་གནང་།
