ཕྱི་ལོ་ ༢༠༡༤ ཟླ་ ༡༡ ཚེས་ ༡༧ རེས་གཟའ་ཟླ་བ།
༄༅། །འདི་གར་ས་གནས་ནས་ཐུབ་བསྟན་རྒྱལ་མཚན་ལགས་ཀྱིས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༡༡ ཚེས་ ༡༣ དང་། ༡༤ སྟེ་ཉིན་གཉིས་ཀྱི་རིང་རྒྱ་གར་བྱང་ཕྱོགས་མངའ་ཁུལ་དཱེ་ཧཱ་རཱ་དུན་དུ་བརྟེན་གཞི་བྱས་པའི་དཔལ་ས་སྐྱའི་གདན་ས་བརྩེ་ཆེན་བསྟན་པའི་དགའ་ཚལ་བཤད་སྒྲུབ་ཆོས་འཁོར་གླིང་། དབུ་བརྙེས་ནས་མི་ལོ་ལྔ་ཅུ་ཧྲིལ་པོ་འཁོར་བའི་མཛད་སྒོ་རྒྱས་པ་ཞིག་ཚོགས་གནང་སོང་།
སྐབས་དེར་སྐུ་མགྲོན་གྱི་ཚོགས་མགོན་དུ་དཔལ་ས་སྐྱའི་༸གོང་མ་བདག་ཁྲི་རྡོ་རྗེ་འཆང་ཁྲི་ཐོག་ཞེ་གཅིག་པ་ཆེན་པོ་མཆོག་དང་། སྐྱབས་མཆོག་ངོར་ཀླུུ་ལྡིང་མཁན་ཆེན་རིན་པོ་ཆེ། ཕོ་བྲང་རྣམ་གཉིས་ཀྱི་སྐུའི་གདུང་སྲས་རྣམ་པ། དེ་བཞིན་དམིགས་བསལ་སྐུ་མགྲོན་དཔལ་ལྡན་དགའ་ལྡན་ཕོ་བྲང་གི་སྐུ་ཚབ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག རང་གཞུང་བཀའ་ཤག་གི་སྐུ་ཚབ་ཆོས་རིག་བཀའ་བློན་པདྨ་ཆོས་འབྱོར་མཆོག བོད་མི་མང་སྤྱི་འཐུས་ལྷན་ཚོགས་ཀྱི་ཚོག་གཙོ་སྤེན་པ་ཚེ་རིང་མཆོག་གིས་གཙོས་པའི་སྤྱི་འཐུས་ཁག་ཅིག་དང་། ཝ་ར་ནཱ་སིའི་གཙུག་ལག་སློབ་དཔོན་མཁས་དབང་མི་ཤྲཱ་་མཆོག གཞན་ཡང་ངོར་མཁན་པོ་ཁྲི་པ་དབུས་པའི་བླ་སྤྲུལ་མཁས་དབང་དགེ་འདུན་རྣམས་དང་། འཛམ་གླིང་ས་ཕྱོགས་གང་ས་ནས་ཕེབས་པའི་འབྲེལ་ཡོད་ཚོགས་སྡེ་ཁག་གི་སྐུ་ཚབ་སོགས་ཁྱོན་མི་མང་སྟོང་ཚོ་གསུམ་ལྷག་ཙམ་ཞིག་འདུ་འཛོམས་གནང་སོང་།
ཐོག་མ་སྐུ་མགྲོན་རྣམ་པས་སྣང་གསལ་ཞལ་ཕྱེ་གནང་ནས་ཞུགས་གྲལ་དུ་འཁོད་མཚམས། ས་སྐྱ་ཆོས་སྒར་གྱི་དགེ་འདུན་པ་དང་བཙུན་མ་ཁག་གཅིག་གིས་བཀྲ་བཤིས་པའི་ཞལ་འདོན་གསུང་འདོན་གནང་། དེ་ནས་རིམ་བཞིན་འབྲེལ་ཡོད་ཁག་གི་གསུང་བཤད་དང་རང་གཞུང་བཀའ་ཤག་གི་གསུང་འཕྲིན། སྤྱི་འཐུས་ཚོགས་གཙོ་་མཆོག་གིས་གསུང་བཤད་ཟབ་རྒྱས་གནང་རྗེས། སྐྱབས་མགོན་༸གོང་མ་བདག་ཁྲི་རིན་པོ་ཆེས་བཀའ་སློབ་བསྩལ་དོན། འདས་པའི་མི་ལོ་ལྔ་ཅུ་ཟེར་དུས་ལོ་རྒྱུས་ཀྱི་དབང་དུ་བྱས་ན་རྒྱུན་རིང་པོ་མིན་ན་ཡང་མི་གཅིག་གི་མི་ཚེར་ཆར་བགོས་ན་རིང་པོ་རེད། ཆོས་སྒར་འདི་ཐོག་མ་ཕྱི་ལོ་ ༡༩༦༤ ལོའི་ཕྱི་ཟླ་ ༣ ཚེས་ ༡༦ ཉིན་དབུ་བརྙེས་པ་ནས་ད་བར་བརྩིས་ན་ལོ་ལྔ་ཅུ་ཧྲིལ་པོ་འཁོར་གྱི་ཡོད། དུས་དྲན་བྱེད་དགོས་དོན་ནི། འདས་པའི་ལོ་ལྔ་ཅུ་ལ་ཕྱི་མིག་ཅིག་བལྟས་ན་ང་རང་ཚོས་ག་རེ་བྱས་ཐུབ་ཡོད་པ་དང་། མ་འོངས་པ་ལོ་ལྔ་ཅུ་ལ་ག་རེ་གནང་དགོས་ས་རེད། དེ་དག་ལ་བསྐྱར་ཞིབ་བྱས་ཡ་རེད་ཅེས་དང་། སྐབས་དེར་དཔལ་འབྱོར་གྱི་ཁོས་བབ་ཧ་ཅང་ཞན་པས་དགེ་འདུན་པ་རྣམས་ཚོགས་ཁང་དང་ཉལ་ཁང་རས་གུར་ཕུབ་ནས་བཞུགས་དགོས་པའི་གནས་སྟངས་བྱུང་བ་སོགས་མདོར་ན་ད་བར་གྲུབ་འབྲས་ག་རེ་བྱུང་ཡོད་པ་དེ་༸་གོང་ས་༸སྐྱབས་མགོན་ཆེན་པོའི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཡིན་པས། གང་ཉིད་ཀྱི་བཀའ་དྲིན་ནི་ནམ་ཡང་བརྗེད་ཐབས་མེད་པ་ཡིན་ཞེས་དང་། ད་བར་གནས་ཡུལ་རྒྱ་གར་གཞུང་དང་མངའ་སྡེ་དང་ཡུལ་མི་སོགས་ཀྱི་མཐུན་འགྱུར་གནང་བ་ལ་ཐུགས་རྗེ་ལེགས་གསོལ་ཞུ་བ་སོགས་བཀའ་སློབ་ཟབ་རྒྱས་བསྩལ་གནང་།
དེའི་རྗེས་མཁས་དབང་ཟམ་གདོང་རིན་པོ་ཆེས་༸གོང་ས་མཆོག་གི་གསུང་འཕྲིན་སྒྲོག་སྦྱང་གནང་སྟེ་གསུང་བཤད་ཀྱི་མཛད་རིམ་ཁག་གྲུབ་རྗེས། ༸སྐྱབས་མཆོག་༸གོང་མ་རིན་པོ་ཆེ་མཆོག་གིས་ས་སྐྱའི་མ་དགོན་བཤད་གྲྭའི་སློབ་པ་མཐར་སོན་པ་ཁག་ཅིག་ལ་བཀའ་བཅུ་པ་དང་སློབ་དཔོན་གྱི་ཕྱག་འཁྱེར་གནང་སོང་། དེ་ནས་ཉེ་འཁོར་དུ་ཡོད་པའི་སློབ་གྲྭ་ཁག་དང་ས་སྐྱ་གཞིས་ཆགས། གླུ་པ་ཚེ་རིང་འགྱུར་མེད་དང་མཁྱེན་བརྩེ་སོགས་ཀྱིས་རིག་གཞུང་འཁྲབ་སྟོན་དང་གཞས་སྣ་གཟིགས་འབུལ་ཞུས་སོང་།
རྒྱ་གར་བྱང་ཕྱོགས་དཱེ་ཧཱ་རཱ་དུན་མངའ་ཁུལ་དུ་རྟེན་གཞི་བྱས་པའི་ས་སྐྱའི་ཆོས་ཚོགས་འདི་ཉིད་ཐོག་མ་ཕྱི་ལོ་ ༡༩༦༤ ལོར་སྐྱབས་མཆོག་༸གོང་མ་བདག་ཁྲི་རིན་པོ་ཆེ་མཆོག་གིས་ཕྱག་བཏབ་གནང་བ་དང་། སྐབས་དེར་ཁོས་བབ་ཧ་ཅང་ཞན་པས་ཐོག་མའི་ཆར་ཁང་གླ་འབུལ་རྒྱུ་མེད་པས་བླ་གྲྭ་རྣམས་རས་གུར་ཕུབ་ནས་སྡོད་དགོས་བྱུང་བའི་ལོ་རྒྱུས་བྱུང་འདུག དུས་འགྱུར་མ་བྱུང་གོང་བོད་ས་སྐྱའི་གདན་སར་ཆོས་སྡེ་ལྷོ་བྱང་གཉིས་ཞེས་མདོ་སྔགས་ཀྱི་སློབ་སྦྱོང་གནང་ས་ཐ་དད་ཡོད་པ་ལྟར་ར་ཛ་སྤུ་ས་སྐྱ་ཆོས་སྒར་འདི་ཉིད་ཀྱང་གཙོ་བོ་སྔགས་ཕྱོགས་ཀྱི་སློབ་གཉེར་གནང་སའི་བསྟི་གནས་ཤིག་ཡིན་པ་དང་། ད་བར་གཙོ་བོ་ཡིད་དམ་ཁག་གི་སྒྲུབ་མཆོད་ཀྱི་དབུ་འཛིན་དང་། རྡོ་རྗེ་སློབ་དཔོན། དཔོན་སློབ། ཕུར་སྒྲུབ་འདོན་པའི་རྒྱུགས་སྤྲོད་ཟིན་པ་བཅས་ཁྱོན་མི་སྣ་གསུམ་བརྒྱ་ཡས་མས་ཞིག་སྐྱེད་སྲིང་གནང་ཡོད་འདུག ད་ཆ་གདན་ས་འདིའི་ཡན་ལག་ལྟ་བུ་གཞུང་ཆེན་ཁག་གི་སློབ་སྦྱོང་གཙོ་བོ་གནང་ས་སྤུ་རུ་ཝ་ལ་ས་སྐྱ་མ་དགོན་བཤད་གྲྭ །བཙུན་དགོན་རིན་ཆེན་ཆོས་གླིང་། ས་སྐྱ་སྨན་ཁང་། གྲྭ་ཆུང་གི་གཞི་རིམ་སློབ་གྲྭ་བཅས་ཡོད་འདུག་པ་མ་ཟད་མི་རིང་བ་འཁོན་གདུང་སྐུ་གཞོན་རིན་པོ་ཆེས་ཐུགས་འགན་གཙོ་བཞེས་ཐོག་གནའ་དེང་གི་སློབ་སྦྱོང་ཆ་ཚང་ཡོད་པའི་སློབ་གྲྭ་གསར་པ་ཞིག་ཀྱང་གསར་རྒྱབ་ཟིན་ནས་རིང་མིན་དབུ་འཛུགས་གནང་རྒྱུ་རེད་འདུག
ཕྱི་ཚེས་ ༡༤ ཉིན་༸སྐྱབས་མགོན་༸གོང་མ་བདག་ཁྲི་རིན་པོ་ཆེས་ཕྱི་ནང་གི་སྐུ་མགྲོན་ཁག་གཙོ་བོ་གྱུར་པའི་མི་མང་ལ་ནོར་བུའི་བསྟན་པའི་སྤྱི་དབང་གི་རྗེས་གནང་བཀའ་དྲིན་ཆེ་གནང་མཛད་དེ་མི་མང་ལ་བཀའ་སློབ་ལམ་སྟོན་ཟབ་རྒྱས་གནང་སྟེ་ལྔ་ཅུའི་དུས་དྲན་གྱི་མཛད་སྒོ་རྒྱལ་ཁའི་ངང་ལེགས་སྒྲུབ་ཟིན་པ་དང་། རིང་མིན་སྐྱབས་མགོན་༸གོང་མ་བདག་ཁྲི་རིན་པོ་ཆེ་མཆོག་གིས་ཟླ་འདིའི་ཕྱི་ཚེས་ ༡༦ ནས་ ༣༠ བར་ས་སྐྱའི་རྗེ་བཙུན་གོང་མ་རྣམ་ལྔའི་གསུང་འབུམ་ཆ་ཚང་ལྗགས་ལུང་གནང་རྒྱུའི་མཛད་རིམ་ཡང་འདུག
