༢༠༡༤ ཟླ་ ༡༠ ཚེས་ ༨ རེས་གཟའ་ལྷག་པ།
༄༅། །བོད་མི་སྐྱབས་བཅོལ་ཉམ་ཐག་རྣམས་ཀྱི་ཤེས་ཡོན་གཙོ་བོར་གྱུར་བའི་བདེ་དོན་ཆེད་སྐུ་ཚེ་ཧྲིལ་པོའི་རིང་རོགས་རམ་གྱིས་བློས་གཏོང་ཧ་ཅང་ཆེན་པོ་གནང་མཁན་ཇར་མན་དུ་གནས་བཞུགས་ལྕམ་སྐུ་ཨིམ་ཊའོ་ཊི་ཝེ་གར་Ms Imtraut Wäger རམ་བོད་མི་ཚོས་མཛའ་བརྩེ་ཆེན་པོས་ཡོངས་གྲགས་སུ་ཨ་མ་ཝེ་གར་ལགས་ཞེས་འབོད་སྲོལ་ཡོད་པའི་ལྕམ་སྐུ་མཆོག་དགུང་གྲངས་ ༩༥ ཐོག་ཇར་མན་གྲོང་ཁྱེར་མུ་ནིཀ་ཏུ་འདས་གྲོངས་སུ་གྱུར་བར་དམ་པ་ཁོང་གི་ཤུལ་ལུས་ནང་མི་སྤུན་མཆེད་རྣམས་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་སྤེན་པ་ཚེ་རིང་མཆོག་གི་མཚན་ཐོག་ནས་སེམས་གསོའི་གནས་འཕྲིན་ཞིག་ཕུལ་བའི་ནང་འཁོད་དོན།
བོད་མི་ཚོར་ཡུན་རིང་ཐོག་རྒྱབ་སྐྱོར་དང་རོགས་རམ་གནང་མཁན་གྲོགས་མོ་བློས་ཐུབ་ཅིག་མེད་པར་གྱུར་བར། ང་ཚོས་བློ་ཕམ་ཧ་ཅང་ཆེན་པོའི་ཐོག་ནས་དམ་པ་ཁོང་གི་ཤུལ་ལུས་ནང་མི་སྤུན་མཆེད་རྣམས་ལ་སྙིང་ཐག་པ་ནས་སེམས་གསོ་དང་གདུང་སེམས་མཉམ་སྐྱེའི་མྱ་ངན་གུས་འདུད་ཞུ་རྒྱུ་ཡིན།
བོད་མི་རྒན་གཞོན་ཚང་མས་ཨ་མ་ཝེ་གར་ལགས་ཞེས་མཛའ་བརྩེ་ཆེན་པོས་འབོད་སྲོལ་ཡོད་པའི་ལྕམ་སྐུ་དམ་པ་ཁོང་ནི་རང་ཉིད་ཀྱི་སྐུ་ཚེ་ཧྲིལ་པོའི་རིང་བོད་མི་ཉམ་ཐག་རྣམས་ཀྱི་ཤེས་ཡོན་གཙོ་བོར་གྱུར་བའི་བདེ་དོན་ཆེད་རོགས་རམ་འབད་བརྩོན་གནང་མཁན་གྱི་བོད་མིའི་གྲོགས་པོ་བློས་ཐུབ་ཅིག་ཡིན། དེ་ཡང་བལ་ཡུལ་དང་རྒྱ་གར་ནང་བོད་མི་སྐྱབས་བཅོལ་བ་རྣམས་ཀྱི་བདེ་དོན་སླད་ལས་འཆར་འདྲ་མིན་ལ་རྒྱབ་སྐྱོར་གནང་མྱོང་ཡོད། དེར་བརྟེན་ལྕམ་སྐུ་དམ་པ་ཁོང་ནི་བོད་མི་མང་པོ་དཀའ་ངལ་ཆེ་བའི་དུས་སྐབས་ཁྲོད་རེ་བའི་འོད་སྣང་སྦྱིན་མཁན་གྱི་མཚོན་རྟགས་ཤིག་ཆགས་ཡོད། ང་ཚོ་ནང་པ་སངས་རྒྱས་པ་ཞིག་ཡིན་པའི་ཆ་ནས་སྐྱེ་བ་ཕྱི་མ་ཁས་ལེན་བཞིན་ཡོད། དེར་བརྟེན་ལྕམ་སྐུ་དམ་པ་ཁོང་སྐྱེ་བ་ཕྱི་མར་སླར་ཡང་མི་ལུས་རིན་པོ་ཆེ་བླངས་ནས་འགྲོ་བ་མིའི་བདེ་དོན་ཆེད་ཞབས་འདེགས་སྒྲུབ་མཁན་ཞིག་ཆགས་པའི་སྨོན་ལམ་ཞུ་རྒྱུ་དང་སྦྲགས། བོད་མི་ཚོས་དམ་པ་ཁོང་གི་བཀའ་དྲིན་དུས་རྟག་ཏུ་སྙིང་བཅང་ཞུ་རྒྱུ་ཡིན། ཞེས་འཁོད་འདུག
