༢༠༡༤ ཟླ་ ༡༠ ཚེས་ ༧ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༧ ཉིན་འདི་གའི་ཆེད་གཉེར་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ས་གནས་ནས་བཏང་གནས་ནང་འཁོད་དོན། དཔལ་ལྡན་སྲིད་སྐྱོང་མཁས་དབང་བློ་བཟང་སང་གེ་མཆོག་རྒྱར་བྱང་ཤར་རྡོར་གླིང་དང་ཁར་ཤང། སོ་ན་དྷ་བཅས་སུ་ཕེབས་འབྱོར་སྐབས་དེ་གའི་བོད་མི་མང་ཚོགས་ནས་ཕེབས་བསུ་གཟབ་རྒྱས་ཞུས་འདུག སྲིད་སྐྱོང་མཆོག་བག་ཌོ་ར་གནམ་ཐང་དུ་ཕྱི་ཚེས་ ༦ ཉིན་ཕེབས་འབྱོར་གནང་སྐབས་ར་ཝང་ལ་དང། ཀ་བློན་སྦུག རྡོར་གླིང་། སྒང་ཏོག ཁར་ཤང་སོགས་ས་ཁུལ་དེའི་ས་གནས་འགོ་འཛིན་དང། གཞུང་འབྲེལ་དང་གཞུང་འབྲེལ་མིན་པའི་ཚོགས་པ་ཁག དེ་བཞིན་དགོན་སྡེ་དང་སློབ་གྲྭའི་ལས་སྣེ་རྣམས་ཕེབས་བསུར་བཅས་ཡོད་པ་དང་། གནམ་ཐང་ནས་རླངས་འཁོར་ཐོག་ཁར་ཤང་མི་མང་ཚོགས་ཁང་དུ་མང་ཚོགས་ཐུག་འཕྲད་ཀྱིས་གསུང་བཤད་གནང་ཡོད། སྐབས་དེར་སྲིད་སྐྱོང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་ཚོགས་ནས་འོས་འདེམས་གནང་བའི་འགོ་ཁྲིད་ལ་གསོལ་རས་སྩལ་ཏེ་འདས་པའི་ལོ་གསུམ་ཙམ་གྱི་ནང་ལས་དོན་མཐའ་དག་ལྷིང་འཇགས་པོ་བྱུང་ཡོད་སྐོར་གསུང་བཤད་གནང་དོན།
ང་རང་དེ་རིང་འདི་གར་ཡོང་སྟེ་རྣམ་པ་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ཐོག་མར་ངས་ལས་འགན་འཁྱེར་སྐབས་མི་མང་གིས་ཚོར་བ་ཡོད་པའི་ཐོག་ནས་ངར་རྒྱབ་སྐྱོར་ཤུགས་ཆེ་བྱས་ཡོད་ངེས་རེད་བསམས་ཀྱི་འདུག ངས་ལས་འཁུར་ཞུས་ནས་ལོ་གསུམ་གྱི་རིང་བོད་མིའི་སྤྱི་ཚོགས་ནང་ལྷིང་འཇགས་པོ་བྱུང་སོང་། གཙོ་ཆེ་ཤོས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆབ་སྲིད་ཀྱི་སྐུ་དབང་རྩིས་སྤྲོད་མཛད་རྗེས་ང་ཚོས་ཆབ་སྲིད་ཀྱི་འགན་འཁྱེར་ཐུབ་ཀྱི་ཡོད་མེད་ཐོག་གཞིས་བྱེས་གཉིས་ཀྱི་བོད་མིར་ཧ་ཅང་བློ་འཚབ་ཆེན་པོ་བྱུང་ཡོད། བཙན་བྱོལ་ནང་༸གོང་ས་མཆོག་གིས་ཆབ་སྲིད་ཀྱི་སྐུ་དབང་ཡོངས་རྫོགས་རྩིས་སྤྲོད་མཛད་རྗེས་ལྷིང་འཇགས་པོ་མེད་པར་རྙོག་གྲ་ཆེན་པོ་ཆགས་ན། རྒྱ་ནག་གཞུང་ཡིན་ནའང་གོ་སྐབས་མེད་དམ་བསམས་ནས་རེ་བ་ཕྲན་བུ་བརྒྱབ་སྟེ་འབད་བརྩོན་བྱེད་ཡོད་ཀྱི་རེད་སྙམ་གྱི་འདུག རྒྱལ་སྤྱི་དང་ལྷག་པར་རྒྱ་གར་གཞུང་མང་ནས་གང་འདྲ་བྱེད་ཡོང་ངམ་སྙམ་སྟེ་ལྟ་བཞིན་ཡོད། ལོ་གསུམ་གྱི་རིང་ལྷིང་འཇགས་པོ་བྱུང་བ་ནི་རླབས་ཆེན་རེད་བསམས་ཀྱི་འདུག གཞིས་ལུས་བོད་མི་རྣམས་ནས་ཀྱང་བཙན་བྱོལ་ལ་ཡོད་པའི་བོད་མི་རྣམས་དངོས་གནས་འགན་འཁུར་གནང་གི་འདུག་བསམས་ཏེ་ཁོང་ཚོ་ཡང་བློ་བདེ་པོའི་ངང་བཞུགས་ཐུབ་པ་བྱུང་ཡོད་ངེས་རེད་དྲན་གྱི་འདུག དེ་བཞིན་མི་ཐོག་རྒན་པ་ཚོས་ཀྱང་ད་བར་༧གོང་ས་མཆོག་གི་དབུ་ཁྲིད་འོག་ལྷིང་འཇགས་གནས་ཡོད་པ་དང་།
ད་ཆ་ཆབ་སྲིད་ཀྱི་སྐུ་དབང་རྩིས་སྤྲོད་མཛད་རྗེས་གང་འདྲ་བྱེད་ཡོང་བསམ་སྲིད་པ་རེད། ད་ལྟ་ལྷིང་འཇགས་པོ་ཡོད་པ་དེ་གྲུབ་འབྲས་ལྟ་བུ་མཚོན་ན་གང་ཙམ་ཡག་པོ་རེད། ཅེས་སོགས་ཀྱི་གསུང་བཤད་གནང་། ཞེས་གསུངས། དེ་བཞིན་སྲིད་སྐྱོང་མཆོག་གིས་དབུ་མའི་ལམ་གྱི་གོ་རྟོགས་ལས་གུལ་སྐོར་དང་། ཤེས་རིག་ལས་ཁུངས་ཀྱི་སློབ་ཡོན་ལས་གཞི་སོགས་ཀྱི་ཐོག་ལ་གསུང་བཤད་གནང་ཡོད། དེ་ཉིན་ཕྱི་དྲོ་སོ་ན་དྷ་བོད་མིའི་གཞིས་ཆགས་སུ་ཕེབས་འབྱོར་གྱིས་ས་གནས་འགོ་འཛིན་ལས་ཁུངས་སུ་འཚམས་གཟིགས་དང་། དེ་ནས་སློབ་ཕྲུག་དང་མང་ཚོགས་ལ་གསུང་བཤད་གནང་ཡོད། སྲིད་སྐྱོང་མཆོག་གིས་སློབ་ཕྲུག་ཚོར་གཙོ་བོ་སློབ་སྦྱོང་ཡག་པོ་བྱེད་དགོས་པ་དང་། ཤེས་རིག་ལས་ཁུངས་ནས་སློབ་ཡོན་སྤར་ཆ་གནང་ཡོད་པའི་སྐོར། དེ་བཞིན་ཤེས་རིག་ལས་ཁུངས་ཀྱི་སློབ་ཡོན་ཁག་ངོ་སྤྲོད་གནང་ཡོད།
ཕྱོགས་མཚུངས་བོད་མིའི་སྒྲིག་འཛུགས་ནས་གཏན་ལ་ཕབ་པའི་གཉིས་སྨན་དབུ་མའི་ལམ་གྱི་སྲིད་བྱུས་ཀྱི་གལ་གནད་སྐོར་དང། བོད་མི་ཚང་མ་རྡོག་རྩ་གཅིག་སྒྲིལ་ངང་གནས་དགོས་པ་གལ་ཆེན་པོ་ཡིན་སྐོར་གྱི་གསུང་བཤད་གྲུབ་མཚམས་ཁུལ་དེའི་དགོན་སྡེ་ཁག་གཉིས་ལ་གནས་གཟིགས་ཕེབས་ཡོད། དཔལ་ལྡན་སྲིད་སྐྱོང་མཆོག་སོ་ན་དྷ་གཞིས་ཆགས་སུ་ཕེབས་ཐེངས་དང་པོ་དེ་ཆགས་ཡོད། སོ་ན་དྷའི་ལས་དོན་རྣམས་ཡོངས་སུ་གྲུབ་བསྟུན། རྡོར་གླིང་ཕྱོགས་སུ་ཕེབས་ཐོན་གྱིས་དགོང་མོར་རྡོར་གླིང་དུ་ཕེབས་འབྱོར་གནང་ཡོད་པ་རེད། ཕྱི་ཚེས་ ༧ ཉིན་རྡོར་གླིང་མི་མང་དང་སློབ་ཕྲུག་ཚོར་གསུང་བཤད་དང་ཉིན་རྒྱབ་ཀ་སྦུག་ཕྱོགས་སུ་ཕེབས་ཐོན་གནང་རྒྱུ་ཡིན་འདུག ཕྱི་ཚེས་ ༨ ཉིན་ཀ་ལོན་སྦུག་དབུས་བོད་མིའི་སློབ་གྲྭ་དབུ་བརྙེས་ནས་ལོ་ལྔ་བཅུ་འཁོར་བའི་དུས་དྲན་གྱི་མཛད་སྒོའི་སྐུ་མགྲོན་གཙོ་བོར་མཉམ་ཞུགས་གནང་རྒྱུ་དང། མཛད་སྒོའི་ཐོག་སློབ་གྲྭའི་སློབ་སྤྱི་དང་། དགེ་རྒན་ལས་བྱེད་ཟུར་པ་ཚོར་དྲན་རྟེན་ཕྱག་རྟགས་དང་གསུང་བཤད་གནང་རྒྱུ། དེ་བཞིན་སློབ་ཕྲུག་དང་སློབ་ཟུར་ཚོ་དང་ལྷན་དུ་བཞུགས་མོལ་གནང་རྒྱུ་རེད་འདུག
