༢༠༡༤ ཟླ་ ༡༠ ཚེས་ ༢༤ རེས་གཟའ་པ་སངས།
༄༅། །ཨི་ཊ་ལིའི་སྲིད་དོན་ཚན་རིག་པ་ལྕམ་སྐུ་ཕེ་ཊི་རི་ཀ་མཱ་ཀུ་ར་མཆོག་ཡུ་རོབ་ལྷན་ཚོགས་ཀྱི་ཚོགས་གཞོན་དང་ཡུ་རོབ་མཐུན་ཚོགས་ཀྱི་བདེ་སྲུང་དང་ཕྱི་འབྲེལ་གྱི་འགན་འཛིན་གསར་པར་བསྐོ་བཞག་བྱུང་བར་བརྟེན། རྒྱལ་སྤྱིའི་བོད་དོན་ལས་འགུལ་ཁང་ནས་ལྕམ་སྐུ་མཆོག་ལ་འཚམས་འདྲི་ཞུས་པ་དང་ལྷན་བོད་དོན་ལ་མུ་མཐུད་དོ་ཁུར་ཆེ་བཞེས་གནང་སྐྱོང་ཡོང་བའི་རེ་འདུན་ཞུས་འདུག
དེ་ཡང་ཨ་རིའི་རྒྱལ་ས་ཝ་ཤིང་ཊོན་དུ་རྟེན་གཞི་བྱས་པའི་རྒྱལ་སྤྱིའི་བོད་དོན་ལས་འགུལ་ཁང་ནས་ཡུ་རོབ་མཐུན་ཚོགས་ཀྱི་བདེ་སྲུང་དང་ཕྱི་འབྲེལ་གྱི་འགན་འཛིན་གསར་པ་ལྕམ་སྐུ་ཕེ་ཊི་རི་ཀ་མཱ་ཀུ་ར་མཆོག་ལ་འཚམས་འདྲི་ཡོད་སྐོར་དང་འབྲེལ་ཡུ་རོབ་མཐུན་ཚོགས་ངོས་ནས་ད་བར་རྒྱ་ནག་གཞུང་དང་ལྷན་ཕྱོགས་གཉིས་དབར་གྱི་འགྲོ་བ་མིའི་ཐོབ་ཐང་ཐོག་ནུས་པ་ཐོན་པའི་དོན་དམ་གྱི་འགྱུར་བ་ཞིག་འདོན་ཐུབ་མེད་པར་བརྟེན། ཡུ་རོབ་མཐུན་ཚོགས་དང་བདེ་སྲུང་གི་འགན་འཛིན་མཆོག་ནས་རྒྱ་ནག་གཞུང་གིས་ད་ལྟ་བོད་དང་རྒྱ་ནག་ནང་ལག་བསྟར་བྱེད་བཞིན་པའི་སྲིད་བྱུས་དེ་དག་ཁས་ལེན་ཞུ་ཐབས་མེད་པ་མ་ཟད། ཕྱོགས་ཕན་ཚུན་གྱི་འབྲེལ་ལམ་ལ་དོ་ཕོག་ཡོང་རྒྱུའི་ཉེན་ཁ་ཡོད་སྐོར་བརྡ་ལན་སྤྲོད་དགོས། ལྷག་པར་ལྕམ་སྐུ་མཆོག་གིས་རྒྱ་ནག་གཞུང་གི་མཐོ་རིམ་འགོ་ཁྲིད་ཚོ་དང་འབྲེལ་ལམ་ནམ་བྱུང་ལ་བོད་དོན་སྐོར་གླེང་སློང་གང་ཐུབ་གནང་སྐྱོང་ཡོང་བའི་རེ་འདུན་ཞུ་བཞིན་ཡོད། ཅེས་སོགས་ཞུས་ཡོད་འདུག
