༢༠༡༤ ཟླ་ ༡༠ ཚེས་ ༢༤ རེས་གཟའ་པ་སངས།

༄༅། །བོད་མིའི་སྒྲིག་འཛུགས་དཔལ་འབྱོར་ལས་ཁུངས་ཀྱི་བོད་མིའི་ཚོང་ལས་ཡར་རྒྱས་རམ་འདེགས་ལས་གཞི་ (Tibetan Entrepreneurship Development)འདི་བཞིན་བཙན་བྱོལ་བོད་མིའི་མང་ཚོགས་ཀྱི་གནས་བབ་ཡར་རྒྱས་ཕུགས་བརྟན་འགྲོ་ཐབས་ཀྱི་ཕུགས་དམིགས་དང་། འཕྲལ་ལ་རང་རེའི་སྤྱི་ཚོགས་ནང་ན་གཞོན་ལས་མེད་ཀྱི་དཀའ་ངལ་སེལ་ཐབས་ཀྱི་དམིགས་ཡུལ་གཙོ་བཟུང་གིས་འགོ་འཛུགས་ཞུས་པ་ལྟར། ལས་གཞི་འདི་བརྒྱུད་རྒྱ་གར་དང་བལ་ཡུལ་ནང་གནས་སྡོད་བོད་རིགས་བཟོ་ཚོང་འདྲ་མིན་གཉེར་བཞིན་པའི་ཁོངས་ནས། རང་གི་ཚོང་ལས་འཆར་གཞི་དང་ལྡན་པའི་རྒྱ་སྐྱེད་གཏོང་འཆར་ཡོད་རིགས་དང་། དེ་མཚུངས་ཚོང་ལས་འཆར་གཞི་ (Business plan)ཚད་ལྡན་ཁུངས་འཕེར་ཡོད་པའི་ཐོག་བཟོ་ཚོང་ལས་གཞི་གང་ཞིག་གསར་འཛུགས་བྱ་རྒྱུར་འདུན་པ་གཉིས་ལྡན་ཡོད་པའི་ན་གཞོན་ཁག་ལ་སྦྱོང་བརྡར་དང་། ཁྲིམས་སྒྲིག་གི་སློབ་སྟོན། མཁས་མྱོང་ཅན་གྱི་ཚོང་པ་དང་དེ་བཞིན་བཟོ་ཚོང་གསར་འཛུགས་ཐོག་ལམ་སྟོན་དང་རམ་འདེགས་གནང་མཁན་གྱི་ཚོགས་སྡེ་ཆེ་ཁག་གི་མཉམ་འབྲེལ་མུ་མཐུད་འཛུགས་ཐབས་བཅས་གླ་ཡོན་གནང་མི་དགོས་པར་རོགས་ཕན་བྱ་རྒྱུ་ཡིན་ན། བོད་རིགས་ཚོང་པ་གསར་སྙིང་སུ་རུང་ནས་གོང་གསལ་ལས་གཞིའི་ནང་དོན་དམ་གྱིས་མཉམ་ཞུགས་གནང་འདོད་ཡོད་རིགས་ནས་ཕྱི་ལོ་ ༢༠༡༤ ཟླ་ ༡༡ ཚེས་ ༡༥ འགྱངས་མེད་འབྲེལ་ཡོད་ས་གནས་འགོ་འཛིན་ལས་ཁུངས་ནས་དགེངས་ཤོག་བཀང་སྟེ་འདི་ག་དཔལ་འབྱོར་ལས་ཁུངས་ཀྱི་དྲུང་ཆེའི་མཚན་ཐོག་འབུལ་གཏོང་ཐུབ་པ་དགོས་རྒྱུ། ལས་འཆར་འདིའི་སྐོར་ཞིབ་གནས་འདི་གའི་འབྲེལ་ཡོད་ལས་བྱེད་རྣམ་གཉིས་ལ་འབྲེལ་གཏུགས་གནང་གལ་བཅས། དཔལ་འབྱོར་ལས་ཁུངས་ནས་ཕྱི་ལོ་ ༢༠༡༤ ཟླ་ ༡༠ ཚེས་ ༡༥ ལ།
ཁ་དཔར་ཨང་གྲངས་ ༩༨༠༥༠༣༥༡༢༨ དང་ ༩༨༡༦༧༦༨༥༦༩ མྱུར་འཕྲིན། [email protected]