༢༠༡༤ ཟླ་ ༡༠ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢ ཉིན་བདག་ཉིད་ཆེན་པོ་གཱན་ངྷི་མཆོག་གི་འཁྲུངས་ཚེས་དང་འབྲེལ་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༨༩ ལོར་འཛམ་གླིང་ནང་ཆེས་སྙན་གྲགས་ཆེ་བའི་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ ༢༥ འཁོར་བའི་དུས་ཚིགས་ཁྱད་པར་ཅན་སྲུང་བརྩི་གཟབ་རྒྱས་ཞུས་པའི་མཛད་སྒོར་སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། ལྷར་བཅས་སྲིད་ཞིའི་གཙུག་རྒྱན་ས་བསྟན་རྒྱལ་བསྟན་ཡོངས་རྫོགས་ཀྱི་མངའ་བདག་ཁམས་གསུམ་ཆོས་ཀྱི་རྒྱལ་པོ་འཛམ་གླིང་ཞི་བདེའི་དེད་དཔོན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་ཕུལ་བའི་ཐོག་ནས་སྐྱབས་གནས་དགེ་འདུན་གྱི་སྡེ། དེ་རིང་ཆེད་དུ་ཕེབས་པའི་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ལྕམ་ཤི་རི་ཨི་བྷ་ཌི་མཆོག་དང་ལྕམ་སྐུ་ཇོ་ཌི་ཝི་ལི་ཡམ་སི་རྣམ་གཉིས་ཀྱིས་གཙོས་སྐུ་འཁོར་ལྷན་རྒྱས། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། ཕྱི་ནང་གི་སྐུ་མགྲོན་རྣམ་པ། རང་དབང་ཅན་གྱི་སྡེ་ཚན་ཁག་གི་འགན་འཛིན་རྣམ་པ། གཞུང་འབྲེལ་མིན་པའི་ཚོགས་པ་ཁག་གི་རྒྱུན་ལས་རྣམ་པ། སེར་སྐྱ་མི་མང་། སློབ་ཕྲུག་བཅས་ཡོངས་ལ་ངས་བཀའ་ཤག་གི་ཚབ་ཞུས་ཏེ་དགའ་སེམས་འཁོལ་བའི་ངང་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
བཀའ་ཤག་སྐབས་ ༡༤ པས་ཕྱི་ལོ་ ༢༠༡༤ ལོ་འདི་བཞིན་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་བཞིན་ཡོད་པ་དང་འབྲེལ། འདི་ལོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཏེ་མི་ལོ་ ༢༥ འཁོར་བའི་དུས་ཚིགས་ཁྱད་པར་ཅན་ཉིན་འདིར་ཆེད་མངགས་ལྕམ་སྐུ་ཤི་རི་ཨི་བྷ་ཌི་མཆོག་དང་ལྕམ་སྐུ་ཇོ་ཌི་ཝི་ལི་ཡམ་སི་རྣམ་གཉིས་གདན་ཞུ་གནང་དགོས་དོན་ནི། ཁོང་རྣམ་གཉིས་༸གོང་ས་མཆོག་དང་ཐུགས་ཉེ་པོ་ཡོད་པ་མ་ཟད། བོད་དོན་ཐོག་ཁ་ཞེ་གཉིས་མེད་ཀྱིས་རྒྱབ་སྐྱོར་གནང་གི་ཡོད། དེ་བཞིན་ཕྱི་ཟླ་ ༡༠ ཚེས་ ༢ ནི་བདག་ཉིད་ཆེན་པོ་གཱན་དྷི་མཆོག་གི་འཁྲུངས་སྐར་ཡིན་སྟབས། བཀའ་ཤག་ནས་ཆེད་མངགས་འདི་ཉིན་དུས་དྲན་སྲུང་བརྩི་ཞུས་ན་འོས་འཚམ་པ་ཞིག་ཆགས་ཡོད། འཛམ་གླིང་སྤྱི་ཡོངས་ནང་ཞི་བདེ་དང་འཚེ་མེད་ཞི་བའི་ལམ་བདག་ཉིད་ཆེན་པོ་གཱན་དྷི་མཆོག་གིས་དུས་རྒྱུན་དུ་གསུངས་ཡོད་པ་དང་ལག་བསྟར་གནང་ཡོད་པ་ཚང་མས་མཁྱེན་གསལ་རེད། ནོ་བེལ་ཞི་བདེའི་གཟེངས་རྟགས་ཚོགས་ཆུང་ངོས་ནས་མི་སྣ་འཚོ་བཞུགས་མེད་མཁན་ཚོར་གཟེངས་རྟགས་འདི་འབུལ་ལམ་ཞུ་གི་མེད་པར་བརྟེན། བདག་ཉིད་ཆེན་པོ་གཱན་དྷི་མཆོག་ལ་གཟེངས་རྟགས་འདི་ཕུལ་མེད། འཛམ་གླིང་ཁྱོན་ཡོངས་ནས་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུ་ཁོངས་ནས་མེས་པོ་དམ་པ་གཱན་དྷི་མཆོག་གཙོ་བོ་ཞིག་ཆགས་ཀྱི་ཡོད་པ་ངོས་འཛིན་ཞུ་བཞིན་ཡོད། དེར་བརྟེན་ཁོང་གི་འཁྲུངས་སྐར་ཉིན་མོར་ང་ཚོས་དུས་དྲན་འདི་སྲུང་བརྩི་ཞུས་པ་ཞིག་ཡིན།
དེ་རིང་གི་མཛད་སྒོ་འདིའི་ཐོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཇི་ལྟར་གསོལ་འདེབས་ཞུས་དོན་ལྟར། ཐུགས་བརྩེ་བ་ཆེན་པོས་མཛད་སྒོར་དབུ་བཞུགས་མཛད་པར་ངས་བཀའ་ཤག་དང་སེར་སྐྱ་མི་མང་ཡོངས་ཀྱི་ཚབ་ཞུས་ཏེ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན། དེ་བཞིན་འདིར་ཕེབས་པའི་ལྕམ་ཤི་རི་ཨི་བྷ་ཌི་མཆོག་དང་ལྕམ་སྐུ་ཇོ་ཌི་ཝི་ལི་ཡམ་སི་མཆོག་རྣམ་གཉིས་ནི་འཛམ་གླིང་ནང་ཆེས་སྙན་གྲགས་ཆེ་བའི་མི་སྣ་ཞིག་ཡིན་པ་མ་ཟད། ༸གོང་ས་མཆོག་དང་ཐུགས་ཉེ་པོ་དང་བོད་དོན་ཐོག་རྒྱབ་སྐྱོར་གནང་མཁན་ཞིག་ཆགས་ཡོད། དཔེར་ན། ལྷོ་ཨ་ཕི་རི་ཀར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམས་ཀྱི་ལྷན་ཚོགས་འཚོགས་གཏན་འཁེལ་སྐབས། མགོན་པོ་གང་ཉིད་མཆོག་ལ་མཐོང་མཆན་འབུལ་ལམ་མ་ཞུས་པར་ཁོང་རྣམ་གཉིས་ཀྱིས་འགན་ཆེ་བཞེས་ཐོག་གསར་འགོད་གསལ་བསྒྲགས་སྤེལ་ཡོད། དེ་རྗེས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་མང་པོ་ཞིག་གིས་ཀྱང་༸གོང་ས་མཆོག་ལྷོ་ཨ་ཕི་རི་ཀར་གདན་ཞུ་གནང་མ་ཐུབ་ན། ཁོང་རྣམ་པ་ཡང་བཅར་གྱི་མིན་ཞེས་གསུངས་ཡོད། ད་ཆ་ཚོགས་འདུ་དེ་ཡང་འཕར་འགྱང་བྱེད་དགོས་པའི་གནས་སྟངས་ཤིག་ཆགས་ཡོད། འདི་ལྟར་ཡོང་ཆེད་ཁོང་རྣམ་གཉིས་ཀྱིས་ཐུགས་འགན་ཆེན་པོ་བཞེས་ཡོད་ཅེས་ཞུ་རྒྱུ་ཡིན།
ཤི་རིན་ཨི་བྷ་ཌི་ལྟ་བུ་མཚོན་ན་མི་ཚེ་ཧྲིལ་པོ་འགྲོ་བ་མིའི་ཐོབ་ཐང་དང་། བུད་མེད་ཐོབ་ཐང་། ཆབ་སྲིད་བཙོན་པའི་ཆེད་སྐུ་ལས་ཧ་ཅང་མང་པོ་བསྐྱོན་ཡོད། ཁོང་གི་རྒྱལ་ཁབ་ཨི་རན་ནང་བུད་མེད་ཡིན་ནའང་ཁྲིམས་དཔོན་ཆགས་རྗེས་སུ་ཁྲིམས་ཞིབ་པ་ཆེ་བའི་གནས་རིམ་ཐོབ་ཀྱང་། ཕྱི་ལོ་ ༡༩༧༩ ལོར་ཁ་ཆེའི་གྱེན་ལངས་ཆེན་པོ་བྱུང་སྐབས། ཁོང་དང་ཁོ་མོ་ལྟ་བུ་བུད་མེད་རྣམས་ལས་གནས་ནས་ཕབ་ཡོད། འོན་ཀྱང་ཁོ་མོས་སྙིང་སྟོབས་ལྡན་པའི་ཐོག་ནས་མུ་མཐུད་འགྲོ་བ་མིའི་ཐོབ་ཐང་ཚོགས་པ་བཙུགས་ཏེ། བུད་མེད་དང་བྱིས་པ། འགྲོ་བ་མིའི་ཐོབ་ཐང་། ལྷག་པར་ཆབ་སྲིད་བཙོན་པ་ཚོར་རྒྱབ་སྐྱོར་ཤུགས་ཆེ་གནང་བར་བརྟེན། ཁོ་མོ་ཨི་རན་གྱི་བཙོན་ཁང་ནང་ལན་མང་འགྲོ་དགོས་བྱུང་ཡོད། ཁོང་གིས་གོང་འཁོད་གནད་དོན་ཁག་གི་ཐོག་སྐུ་ལས་མང་པོ་བསྐྱོན་པར་བརྟེན། ཕྱི་ལོ་ ༢༠༠༣ ལོར་ཁོ་མོར་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཡོད།
དེ་བཞིན་ལྕམ་སྐུ་ཇོ་ཌོ་ཝི་ལི་ཡམ་སི་མཆོག་ནི་ཨ་རི་ཝར་མོན་ཊི་(Vermont)མངའ་སྡེ་ནས་ཡིན་པ་དང་། ཁོ་མོ་ཆུང་དུས་ནས་འགྲོ་བ་མིའི་ཐོབ་ཐང་རྩོད་མཁན་ཞིག་ཡིན། ཨ་རིའི་ནི་ཀ་ར་གྷོ་ཝ་(Nicaragua) དང་ཨལ་སལ་ཝ་ཌོར་ (El Salvador) ནང་འགྲོ་བ་མིའི་ཐོབ་ཐང་དགོས་ཀྱི་འདུག་ཅེས་འཐབ་རྩོད་ཤུགས་ཆེ་གནང་ཡོད། ལྷག་པར་ཁོང་ལ་ནོ་བེལ་ཞི་བདེའི་གཟེངས་རྟགས་ཕུལ་དགོས་དོན་ནི་ས་འོག་འབར་རྫས་འདི་མཚམས་འཇོག་བྱེད་དགོས་པའི་ཐོག་རྒྱལ་སྤྱི་ཡོངས་ནང་ལས་འགུལ་ཤུགས་ཆེ་སྤེལ་ཡོད། ས་འོག་ཏུ་ཡོད་པའི་འབར་རྫས་དེ་རྒྱལ་ཁབ་གཉིས་དམག་རྒྱག་སྐབས་ས་མཚམས་སུ་ཧ་ཅང་མང་པོ་འགྲེམས་འཇོག་བྱེད་ཀྱི་ཡོད། འོན་ཀྱང་དམག་འཁྲུག་ཟིན་རྗེས་མི་དཀྱུས་མར་གནོད་འཚེ་ཚབས་ཆེ་ཕོག་གི་ཡོད་པར་བརྟེན། རྒྱལ་སྤྱི་སྤྱི་ཡོངས་ནས་ས་འོག་འབར་རྫས་དེ་དག་མཚམས་འཇོག་བྱེད་དགོས་པའི་ལས་འགུལ་ཤུགས་ཆེ་སྤེལ་བར་བརྟེན། མཉམ་འབྲེལ་རྒྱལ་ཚོགས་ཀྱི་ངོས་ནས་ས་འོག་འབར་རྫས་དེ་མཚམས་འཇོག་བྱེད་དགོས་པ་ཆགས་པ་དེ་བྱས་རྗེས་ཆེན་པོ་ཞིག་ལ་ངོས་འཛིན་གནང་སྟེ། ཕྱི་ལོ་ ༡༩༩༧ ལོར་ཁོང་དང་ཁོང་གི་ཚོགས་པར་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཡོད། ཐེངས་འདིར་བཀའ་ཤག་ངོས་ནས་ཁོང་རྣམ་གཉིས་གདན་ཞུས་ལྟར་ཆེད་ཕེབས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུང་བཤད་གནང་ཡོད།
