༢༠༡༤ ཟླ་ ༡༠ ཚེས་ ༢༨ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༠ ནས་ ༢༤ བར་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་གྲོང་ཁྱེར་ཝན་ཁུ་ཝར་མཛད་འཕྲིན་བསྐྱངས་སྐབས། ཁེ་ན་ཌའི་གྲོས་ཚོགས་ཀྱི་འཐུས་མི་དང་བོད་དོན་རྒྱབ་སྐྱོར་བ་ལྕམ་སྐུ་ (Peggy Nash) ཕ་གི་ནཱ་ཤི་མཆོག་གིས་རྒྱལ་ཡོངས་གྲོས་ཚོགས་ནང་༸གོང་ས་༸སྐྱབས་མགོན་ཆེན་པོ་མཆོག་ལ་ཕེབས་བསུའི་འཚམས་འདྲི་ཞུས་པ་ཆབས་ཅིག་ཁེ་ན་ཌའི་གཞུང་ཕྱོགས་ནས་བོད་དོན་ལ་མུ་མཐུད་རྒྱབ་སྐྱོར་གནང་རྒྱུ་ཡིན་སྐོར་གསུང་དོན། ཁེ་ན་ཌའི་མི་སེར་གྱི་མཚན་གནས་འབུལ་ལམ་ཞུས་ཡོད་པའི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་སླར་ཡང་ཁེ་ན་ཌར་ཆིབས་སྒྱུར་བསྐྱངས་པར་དགའ་བསུའི་འཚམས་འདྲི་ཞུ་བཞིན་ཡོད། ༸གོང་ས་ཏཱ་ལའི་བླ་མ་མཆོག་གིས་ཡུན་རིང་ནས་བོད་མི་དམངས་དང་བོད་དོན་འཚེ་མེད་ཞི་བའི་ཐབས་ལམ་ཁོ་ནར་བརྟེན་ནས་འཐབ་རྩོད་མཛད་དང་མཛད་མུས་རེད། ལྷག་པར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་ཚེ་སྲོག་ཡོངས་རྫོགས་རྩ་ཆེ་ཡིན་པའི་བཀའ་སློབ་སྩོལ་བཞིན་པ་དེས་དེང་སྐབས་ཁེ་ན་ཌའི་མི་དམངས་ཡོངས་ལ་ཧ་ཅང་དགོས་མཁོ་ཆེན་པོ་ཆགས་ཡོད།
༸གོང་ས་ཏཱ་ལའི་བླ་མ་མཆོག་གིས་འཚེ་མེད་ཞི་བའི་ལམ་ནས་བོད་དོན་འཐབ་རྩོད་མཛད་བཞིན་པར་ཁེ་ན་ཌའི་གཞུང་ཕྱོགས་ནས་རྒྱབ་སྐྱོར་ཞུས་དང་ཞུ་མུས་ཡིན་པའི་ར་སྤྲོད་ཡོང་སླད་ང་རང་དེ་རིང་གྲོས་ཚོགས་འདིའི་ནང་ལངས་པ་ཡིན། དེ་བཞིན་ཁེ་ན་ཌའི་གཞུང་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚབ་དང་ལྷན་དུ་བོད་རྒྱ་འབྲེལ་མོལ་བསྐྱར་གསོ་གནང་དགོས་སྐོར་རྒྱ་ནག་གཞུང་ལ་འབོད་སྐུལ་མུ་མཐུད་ནས་ཞུ་བཞིན་ཡོད་པ་མ་ཟད། ༸གོང་ས་ཏཱ་ལའི་བླ་མ་མཆོག་གིས་ཐུགས་རེ་མཛད་པ་གཞིར་བཟུང་། ཁོང་རྒྱ་ནག་རི་བོ་རྩེ་ལྔར་གནས་གཟིགས་སུ་ཆིབས་སྒྱུར་བསྐྱང་རྒྱུར་རྒྱ་ནག་གཞུང་ཕྱོགས་ནས་བསམ་གཞིགས་བྱེད་དགོས་པའི་ཐོག་ལ་ཡང་འབོད་སྐུལ་ཞུ་བཞིན་ཡོད། དེ་རིང་ཁེ་ན་ཌའི་གྲོས་ཚོགས་དང་མི་དམངས་ཡོངས་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཁེ་ན་ཌར་སླར་ཡང་ཆིབས་སྒྱུར་བསྐྱངས་པར་དགའ་བསུའི་འཚམས་འདྲི་ཞུ་བཞིན་ཡོད། ཅེས་སོགས་ཀྱི་གསུང་བཤད་གནང་བར་གྲོས་ཚོགས་ཀྱི་འཐུས་མི་ཚོས་རྒྱབ་སྐྱོར་མཚོན་སླད་དགའ་བསུ་ཞུས་འདུག་པ་བཅས། །
