༢༠༡༤ ཟླ་ ༡༠ ཚེས་ ༢༨ རེས་གཟའ་མིག་དམར།
༄༅། །འདི་གར་ངག་དབང་ཐར་པ་ལགས་ཀྱིས་བཏང་གནས་ནང་འཁོད་དོན། ཁམས་སོག་རྫོང་ཁྲི་རུ་དྲིལ་མདའ་དགོན་པའི་དགེ་འདུན་པ་ཚངས་དབྱངས་རྒྱ་མཚོ་ལགས་ལ་རྒྱ་གཞུང་གིས་རྒྱ་ནག་ལ་ངོ་རྒོལ་བྱ་དགོས་པའི་སྐུལ་སློང་བྱས་པའི་ཉེས་མིང་འོག་ཁྲིམས་ཐག་ལོ་ ༡༢ བཅད་ཡོད་པ་དང་། ད་ལྟ་ལྷ་ས་ཆུ་ཤུལ་བཙོན་ཁང་དུ་བཙོན་འཇུག་བྱས་ཡོད་འདུག
དེ་ཡང་ཕྱི་ལོ་ ༢༠༡༤ ཟླ་ ༡༠ ཚེས་ ༢༧ ཉིན་ཁོང་ལ་ཁྲིམས་ཐག་བཅད་ནས་ཉིན་ ༢༦ ཙམ་འགྲོ་གི་ཡོད་པ་དང་། ཁྲིམས་ཐག་བཅད་ནས་ཉིན་ ༡༥ རྗེས་སུ་སོག་རྫོང་། ཁྲི་རྡོ་ཡུལ་ཚོ་ལ་ཡོད་པའི་ནང་མི་ལ་ཁྲིམས་ཐག་བཅད་པའི་སྐོར་གྱི་ཡི་གེ་ཞིག་འབྱོར་ཡོད་འདུག ཡི་གེའི་ནང་ཁྲིམས་ཐག་བཅད་ནས་ཟླ་གསུམ་མ་སོང་བར་བཙོན་དུ་ཐུག་འཕྲད་དུ་འགྲོ་མི་ཆོག་པ་དང་། ཟླ་གསུམ་རྗེས་ཁོང་ལ་ཐུག་འཕྲད་འགྲོ་མཁན་ཡོད་ན། ཐོབ་ཐང་ལག་ཁྱེར་ཡོད་པའི་ཐོག་དང་པོ་ཁྲི་རྡོ་ཡུལ་ཚོ་དང་། སོག་རྫོང་བཅས་ནས་རིམ་བཞིན་འགན་ལེན་ཡི་གེ་ལེན་དགོས་སྐོར་འཁོད་ཡོད་འདུག རྒྱ་གཞུང་གིས་ཚངས་དབྱངས་རྒྱ་མཚོ་ལགས་ལ་ཕྱི་ཕྱོགས་སུ་འབྲེལ་བ་བྱས་པ་དང་དགེ་འདུན་པ་གཞན་ཚོར་རྒྱ་ནག་ལ་ངོ་རྒོལ་བྱེད་དགོས་པའི་སྐུལ་སློང་བྱས་པའི་ཉེས་པ་བཙུགས་ཡོད་འདུག
དགེ་འདུན་པ་ཚངས་དབྱངས་རྒྱ་མཚོ་ལགས་ནི། ཁྲི་རུ་དྲིལ་མདའ་དགོན་པའི་ལས་ཐོག་དབུ་མཛད་ཡིན་པ་དང་། ཕྱི་ལོ་ ༢༠༡༤ ཟླ་ ༣ ཚེས་ ༡༧ ཉིན་གྱི་མཚན་མོར་རྒྱ་གཞུང་གིས་ཁམས་སོག་རྫོང་ཁྲི་རུ་དྲིལ་མདའ་དགོན་པའི་དགེ་འདུན་པ་ཚངས་དབྱངས་རྒྱ་མཚོ་ལགས་དང་། ཚེ་དབང་ལགས། ཨ་ཚེ་ལགས། རྒྱལ་མཚན་ལགས་བཅས་དགེ་འདུན་པ་ ༤ འཛིན་བཟུང་བཙོན་འཇུག་བྱས་ཏེ། ད་བར་ནང་མི་རྣམས་ནས་ཁོང་རྣམས་གར་ཡོད་ཀྱི་གནས་ཚུལ་ཤེས་རྟོགས་མེད་པར་གྱུར་ཡོད་འདུག
