༢༠༡༤ ཟླ་ ༡༠ ཚེས་ ༢༤ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཚོང་ལས་སྡེ་ཚན་འདྲ་མིན་གྱི་སྤྱི་ཁྱབ་འགན་འཛིན་མི་གྲངས་ ༢༠ ལ་མཇལ་ཁ་དང་བླང་དོར་བཀའ་སློབ་སྩལ་འདུག སྐབས་དེར་ཚོང་ལས་ནང་བྱམས་བརྩེ་ལག་བསྟར་ཇི་ལྟར་ཐུབ་མིན་སྐོར་གྱི་དྲི་བ་ཞུས་པར་བཀའ་ལན་སྩལ་དོན། དུད་འགྲོའི་ནང་དུའང་བྱམས་བརྩེའི་རྣམ་པ་སྟོན་མཁན་དེ་འདྲ་ཡོད། འགྲོ་བ་མིའི་རིགས་ལ་རྣམ་དཔྱོད་ཡོད་པར་བརྟེན་བྱམས་བརྩེ་དང་རྣམ་དཔྱོད་ཟུང་འབྲེལ་ཐོག་ནས་འགྲོ་ཐུབ། ང་ཚོས་འགྲོ་བ་མི་རིགས་ཐེར་འབུམ་བདུན་ཚང་མར་བྱམས་བརྩེའི་བློ་སྐྱེ་ཆོག བྱམས་བརྩེ་ནི་བློ་དོན་མཐུན་ཡིན་ཞིང་ཤེས་རབ་དང་འབྲེལ་ནས་ཡོང་དགོས། བློ་དོན་མི་མཐུན་པ་དེ་དག་མ་རིག་པའི་དབང་གི་ཡོང་བཞིན་ཡོད། བྱམས་བརྩེའི་བློ་སྦྱངས་ནས་གོང་ནས་གོང་དུ་འཕེལ་རྒྱུ་ཡོད། ཚོང་ལས་དེ་ཡང་བྱམས་བརྩེའི་རང་བཞིན་ལྡན་པ་ཞིག་དང་གཞན་ཕན་རང་བཞིན་ལྡན་པ་ཞིག་ཏུ་གྱུར་དགོས་ན། གོ་ལ་སྤྱིའི་དཔལ་འབྱོར་གྱི་གནས་བབ་ལ་བསམ་བློ་གཏོང་དགོས་རྒྱུ་གལ་ཆེན་པོ་ཡིན། དཔེར་ན། གདུགས་ཆེན་པོ་ཞིག་དང་མཚུངས་པ་ཡིན། གདུགས་ཆེན་པོའི་གཞི་རྟེན་ཀ་བ་ལྟ་བུ་ནི་ཚོང་དང་རྒྱལ་ཁབ་སོ་སོའི་དཔལ་འབྱོར་གྱི་གནས་སྟངས་དེ་ཡིན། ཚོང་ལས་སྐབས་ཀུན་སློང་བཟང་པོའི་ཐོག་ནས་འགྲན་བསྡུར་བྱེད་ཐུབ། དེ་འདྲ་ཡོང་བར་ཡིད་ཆེས་དང་འགན་འཁྲིད་དགོས་རྒྱུ་གལ་ཆེ་ཤོས་ཡིན། ཞེས་སོགས་ཀྱི་བཀའ་ལན་སྩལ། ཕྱི་ཚེས་ ༢༣ ཉིན་གྱི་སྔ་དྲོ་༸གོང་ས་མཆོག་གིས་ནང་ཆོས་ངོ་སྤྲོད་དང་བློ་སྦྱོང་ཚིགས་བརྒྱད་མའི་ཆོས་འབྲེལ་དབུ་འཛུགས་མཛད་པ་དང་། ཕྱེད་ཡོལ་སྤྱན་རས་གཟིགས་ཀྱི་བཀའ་དབང་སྩལ།
