༢༠༡༤ ཟླ་ ༡༠ ཚེས་ ༣༡ རེས་གཟའ་པ་སངས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བྷོན་སི་ཊོན་ཁུལ་དུ་རྟེན་གཞི་བྱས་པའི་ཝི་ཏི་ནམ་ནང་པའི་ཚོགས་པ་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། མགོན་པོ་གང་ཉིད་མཆོག་གིས་ཕྱི་ལོ་ ༢༠༡༤ ཟླ་ ༡༠ ཚེས་ ༣༠ ཉིན་གྱི་སྔ་དྲོ་ཆུ་ཚོད་ ༩ ཐོག་དད་ལྡན་ཆོས་ཞུ་བ་ཁྱོན་མི་གྲངས་སྟོང་ཕྲག་བརྒལ་བ་རྣམས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་སྐབས་ཤེས་རབ་སྙིང་པོའི་ནང་དོན་ངོ་སྤྲོད་དང་འབྲེལ་བཀའ་སློབ་ཕེབས་དོན། ངོས་ལ་ཝི་ཏི་ནམ་ནང་པའི་ཚོགས་པ་ནས་མགྲོན་འབོད་བྱུང་བ་ལྟར། དེ་རིང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་བརྟེན་ཚང་མར་འཚམས་འདྲིའི་བཀྲ་ཤིས་བདེ་ལེགས་ཡོད། དེ་རིང་ངོས་ཀྱིས་ཁྱེད་རང་ཚོར་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིག་བརྒྱད་མའི་ཆོས་འབྲེལ་བྱ་རྒྱུ་ཡིན།
སྤྱིར་བཏང་ཝི་ཏི་ནམ་གྱི་མི་རིགས་ཁྱེད་རྣམ་པ་ང་ཚོ་བོད་པ་ལྟར་སྐྱབས་བཅོལ་བ་ཆགས་ཡོད། འོན་ཀྱང་སྐྱབས་བཅོལ་གྱི་གནས་སྟངས་འོག་ནས་དཀའ་ངལ་མང་དག་ཅིག་ལ་གདོང་ལེན་བྱེད་དགོས་མིན་ལ་མ་ལྟོས་པར། ཁྱེད་རང་ཚོས་རིག་གཞུང་སྲུང་སྐྱོབ་བྱེད་རྒྱུས་མཚོན་ཁྱེད་རང་ཚོའི་ཕ་མེས་ནས་བརྒྱུད་པའི་ཆོས་ལུགས་ནང་པ་ཆགས་ཡོད། དེར་བརྟེན་ནང་པའི་རིག་གཞུང་སྲུང་སྐྱོབ་བྱེད་རྒྱུ་ཧ་ཅང་གལ་ཆེན་པོ་རེད། ནང་པའི་རིག་གཞུང་སྲུང་སྐྱོབ་བྱེད་རྒྱུ་ཡང་སངས་རྒྱས་ཆོས་ཚོགས་མ་བཏོན་ཏེ་སངས་རྒྱས་དང་ཆོས།
དགེ་འདུན་གསུམ་ལ་སྐྱབས་སུ་མཆི་བརྗོད་པ་ཙམ་གྱིས་ཕན་ཐོགས་མེད། དེར་བརྟེན་དཀོན་མཆོག་གསུམ་ངོ་འཕྲོད་པའི་ཐོག་ནས་སྐྱབས་སུ་འགྲོ་དགོས་པ་བྱེད་རྒྱུ་ཧ་ཅང་གལ་ཆེན་པོ་ཆགས་ཡོད། དེ་ཡང་དཀོན་མཆོག་གསུམ་ངོ་འཕྲོད་པར་སློབ་སྦྱོང་ངེས་པར་དུ་བྱེད་དགོས་ཀྱི་ཡོད། མདོར་ན། ནང་པ་སངས་རྒྱས་པའི་ཆོས་ཀྱི་སྙིང་དོན་ནི། སེམས་རྒྱུད་བཟང་པོ་བཟོ་ཐབས་བྱེད་རྒྱུ་དེ་ཡིན་པར་བརྟེན། དེ་གཞི་ལ་བཞག་ན་ཆོས་གང་ཞིག་བྱས་ཀྱང་དེ་ཙམ་ཁྱད་པར་མེད། དེ་བཞིན་བདེན་བཞིའི་འགྲོ་སྟངས་ལ་སློབ་སྦྱོང་བྱས་ཏེ་ཤེས་པ་བྱེད་དགོས། བདེན་བཞིའི་ནང་ནས་དང་པོ་དང་གཉིས་པ། སྡུག་བསྔལ་བདེན་པ་དང་ཀུན་འབྱུང་བདེན་པ་གཉིས་ཤེས་ཐབས་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། ཅེས་སོགས་ཀྱི་བཀའ་སློབ་དང་ཆོས་འབྲེལ་སྩལ་ཡོད་པ་མ་ཟད། ཉིན་རྒྱབ་ཆོས་འབྲེལ་འཕྲོ་སྐྱོང་གྲུབ་མཚམས་དད་ལྡན་ཆོས་ཞུ་བ་རྣམས་ལ་བྱང་ཆུབ་སེམས་དཔའི་སྡོམ་པ་འབོགས་ཆོག་ཀྱང་མཛད་འདུག
ཐེངས་འདིའི་བཀའ་ཆོས་དབྱིན་སྐད་དང་ཝི་ཏི་ནམ་སྐད་ཐོག་གསུང་སྒྱུར་ཞུས་འདུག
