༢༠༡༤ ཟླ་ ༡༠ ཚེས་ ༣༠ རེས་གཟའ་ཕུར་བུ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༤ ཟླ་ ༡༠ ཚེས་ ༢༨ ཉིན་ (Princeton) གཙུག་ལག་སློབ་གྲྭ་ཆེན་མོའི་ནང་བྱམས་བརྩེ་གོང་འཕེལ་གཏོང་ཐབས་སོགས་ཀྱི་མཛད་འཕྲིན་ཁག་ལེགས་པར་གྲུབ་མཚམས་ཕྱི་ཚེས་ ༢༩ ཉིན་བྷོ་སི་ཊོན་དུ་ (Boston) ༸ཞབས་སོར་བདེ་བར་འཁོད་སྐབས། ས་གནས་དེའི་ཁུལ་དུ་གནས་སྡོད་བོད་མི་རྣམས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས་ཐོགས་ཏེ་ཕེབས་བསུ་གཟབ་རྒྱས་ཞུས་ཡོད་པ་མ་ཟད། དེ་བཞིན་ཨ་རིའི་གཞུང་དང་ས་གནས་ཉེན་རྟོག་སྐོར་སྲུང་བས་སྦག་སྦག་དང་རླངས་འཁོར་སོགས་བཏང་སྟེ་གསོལ་མགྲོན་ཁང་བར་ཕེབས་བསུ་གཟབ་རྒྱས་ཞུས་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ལ་ཁུལ་དེར་རྟེན་གཞི་བྱས་པའི་ཝི་ཏི་ནམ་ནང་པའི་ཆོས་ཚོགས་ནས་ཇི་ལྟར་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ།
མགོན་པོ་གང་ཉིད་མཆོག་གིས་ཕྱི་ཚེས་ ༣༠ ཉིན་གྱི་སྔ་དྲོ་དད་ལྡན་ཆོས་ཞུ་བ་རྣམས་ལ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་དང་། ཉིན་རྒྱབ་བྱང་ཆུབ་སེམས་དཔའི་སྡོམ་པ་འབོགས་ཆོག་མཛད་རྒྱུ་ཡིན་འདུག ཕྱི་ཚེས་ ༣༡ ཉིན་སེམས་དང་སྲོག་གི་བསྟི་གནས་ཁང་ནས་གོ་སྒྲིག་ཞུས་ཐོག་རྒྱལ་སྤྱིའི་དཔྱད་སྒོམ་ཚོགས་འདུའི་བགྲོ་གླེང་ཐོག་ཆིབས་སྒྱུར་བསྐྱང་རྒྱུ་དང་། དེ་བཞིན་ (Massachusetts) མ་སི་ཆུ་སི་འཕྲུལ་རིགས་ཤེས་ཡོན་བསྟི་གནས་ཁང་དུ་ཆགས་པའི་༸གོང་ས་༸སྐྱབས་མགོན་ཆེན་པོ་མཆོག་མཚན་གནས་རྗེས་འདྲེན་ཏཱ་ལའི་བླ་མའི་བླང་དོར་དང་བློ་སྦྱོང་གི་རིན་ཐང་ཚོགས་པ་ཞེས་པའི་གོ་སྒྲིག་འོག་འཛམ་གླིང་ནང་གནས་བབ་བཟང་དུ་གཏོང་རྒྱུ་ཞེས་པའི་བརྗོད་གཞིའི་བགྲོ་གླེང་ལྷན་ཚོགས་ཐོག་དབུ་ཞུགས་མཛད་རྒྱུ་དང་། ཕྱི་ཚེས་ ༣༡ ཉིན་བོད་རིགས་སྤྱི་མཐུན་ཚོགས་པས་གོ་སྒྲིག་ཞུས་ཐོག་སེམས་རྒྱུད་བཟང་པོ་བཟོ་ཐབས་ཀྱི་ཤེས་ཡོན་ཞེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་སྩལ་རྒྱུ་ཡིན་འདུག
སྤྱིར་བཏང་མ་སི་ཆུ་སི་མངའ་སྡེ་བྷོ་སི་ཊོན་ནང་མི་འབོར་དྲུག་འབུམ་ལྔ་ཁྲི་ཙམ་ཡོད་པ་མ་ཟད། བྷོན་སི་ཊོན་གྲོང་ཁྱེར་དང་ཉེ་འགྲམ་གྱི་ས་གནས་ཁག་གི་ནང་བོད་མི་ཁྱོན་བསྡོམས་དྲུག་སྟོང་ཙམ་གནས་སྡོད་བྱེད་བཞིན་ཡོད་འདུག་པ་བཅས། །
