༢༠༡༤ ཟླ་ ༡༠ ཚེས་ ༢༩ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༤ ཟླ་ ༡༠ ཚེས་ ༢༨ ཉིན་ (Princeton) གཙུག་ལག་སློབ་གྲྭ་ཆེན་མོའི་ཚོགས་ཁང་ (Jadwin Gymnasium) ནང་བྱམས་བརྩེ་གོང་སྤེལ་གཏོང་ཐབས་དང་འབྲེལ་བའི་མང་ཚོགས་ལ་བཀའ་སློབ་སྩལ་འདུག
དེ་ཡང་༸གོང་ས་༸སྐྱབས་མགོན་ཆེན་པོ་མཆོག་ཚོགས་ཁང་ནང་༸ཞབས་སོར་འཁོད་གྲུབ་མཚམས་གཙུག་ལག་སློབ་གྲྭ་འདིའི་ཆོས་ལུགས་སྡེ་ཚན་དང་མཆོད་ཁང་གི་སྤྱི་ཁྱབ་ (Alison Boden) ལགས་ཀྱིས་མགོན་པོ་གང་ཉིད་མཆོག་དེར་འདུས་མི་དམངས་ལ་ངོ་སྤྲོད་ཞུས་དོན། བོད་ཀྱི་༸སྐྱབས་མགོན་ཏཱ་ལའི་བླ་མ་སྐུ་ཕྲེང་བཅུ་
བཞི་པ་ཆེན་པོ་མཆོག་ནི། བོད་མིའི་བླ་ན་མེད་པའི་དབུ་ཁྲིད་དང་ཆོས་ལུགས་ཀྱི་དབུ་ཁྲིད་གཅིག་ཀྱང་ཡིན། ༸གོང་ས་ཏཱ་ལའི་བླ་མ་མཆོག་གིས་བོད་མིའི་བདེ་དོན་དྲང་བདེན་དང་འཚེ་མེད་ཞི་བའི་ཐབས་ལམ་བརྒྱུད་ནས་འཐབ་རྩོད་མཛད་བཞིན་ཡོད། ལྷག་པར་༸གོང་ས་ཏཱ་ལའི་བླ༌མ་མཆོག་ནི་འཛམ་
གླིང་ནང་གི་ཁོར་ཡུག་དང་ཆོས་ལུགས་མཐུན་བསྒྲིལ། སྤྱི་ཚོགས་ཞབས་ཞུ་སོགས་གལ་འགངས་ཆེ་བའི་གནད་དོན་མང་དག་ཞིག་གི་མགྲིན་ཚབ་པ་ལྟ་བུར་གྱུར་ཡོད་པར་བརྟེན། ང་ཚོས་ཏཱ་ལའི་བླ་མ་མཆོག་གི་བཀའ་སློབ་ཉན་མཁན་ཚང་མར་དོན་སྙིང་ལྡན་པའི་ཤུགས་རྐྱེན་གཏིང་ཟབ་ཅིག་ཐེབས་རྒྱུའི་རེ་བ་ཡོད། ཅེས་སོགས་ཀྱི་གསུང་བཤད་གནང་།
དེ་ནས་༸གོང་ས་༸སྐྱབས་མགོན་ཆེན་པོ་མཆོག་གིས་དེར་འདུས་དགེ་སློབ་དང་མང་ཚོགས་སོགས་ཁྱོན་མི་གྲངས་ ༤༢༠༠ བརྒལ་བར་ལམ་སྟོན་བཀའ་སློབ་སྩལ་དོན། དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། སྤྱིར་བཏང་འགྲོ་བ་མི་ཚང་མར་མི་ཚེ་བདེ་སྐྱིད་ལྡན་པ་ཞིག་སྐྱེལ་རྒྱུ་ནི་གཞི་རྩའི་ཐོབ་ཐང་ཡིན། དེ་ལྟར་ཡོང་བར་ཕྱོགས་ཡོངས་ནས་བསམ་གཞིགས་དང་དོན་དངོས་དང་ལྡན་པའི་ཐོག་ནས་འཐབ་རྩོད་བྱེད་དགོས་པ་ཞིག་ཆགས་ཡོད། འཛམ་གླིང་འདིའི་སྟེང་དུ་ཡོད་པའི་ཆོས་ལུགས་རྣམས་ལྟ་གྲུབ་ཀྱི་ཆ་ནས་མི་འདྲ་ཡོད་ཀྱང་། ཆོས་ལུགས་གཙོ་ཆེ་བ་ཚང་མས་དོན་དངོས་བྱམས་པ་དང་བཟོད་བསྲན། སྙིང་རྗེའི་བསླབ་བྱ་གཅིག་གྱུར་གསུང་བཞིན་ཡོད། དེང་སང་གཙུག་ལག་སློབ་གྲྭ་ཆེན་མོ་ཕལ་ཆེར་བའི་ཤེས་ཡོན་སློབ་གསོ་རྣམས་དེང་དུས་ཀྱི་འཛུགས་སྐྲུན་དང་ཕྱི་དངོས་པོ་ཡར་རྒྱས་ཁོ་ནར་དམིགས་པ་མ་ཡིན་པར། ད་ཆ་སློབ་གྲྭའི་ངོས་ནས་ནང་སེམས་ཀྱི་སྐོར་ལ་ཤེས་ཡོན་སྤྲོད་ཕྱོགས་ཐོག་ལ་ཐབས་ལམ་འཚོལ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད།
ལྷག་པར་སློབ་ཕྲུག་ཁྱེད་རང་ཚོ་དུས་རབས་ཉེར་གཅིག་པའི་མི་རབས་ཤིག་ཆགས་ཡོད། དེར་བརྟེན་གཞོན་སྐྱེས་ཚོས་འགན་ཁུར་ཤུགས་ཆེ་ཙམ་བླང་སྟེ་དུས་རབས་ཉེར་གཅིག་པ་འདི་ཞི་བདེའི་དུས་རབས་ཤིག་བསྐྲུན་རྒྱུར་འབད་བརྩོན་བྱེད་དགོས། ཞེས་སོགས་ཀྱི་བཀའ་སློབ་སྩལ། ཉིན་རྒྱབ་མགོན་པོ་གང་ཉིད་མཆོག་དབུ་ཞུགས་ཐོག་ (Princeton) མཐོ་རིམ་སློབ་གྲྭ་འདིའི་སློབ་མ་དང་དགེ་ལས་དྲག་འདེམས་ཞུས་པའི་མཐོ་རིམ་སློབ་གྲྭ་འདིའི་རྩ་འཛིན་ལྟ་གྲུབ་རྒྱལ་ཁབ་ཀྱི་ཆེད་དུ་སྲི་ཞུ་དང་། འཛམ་གླིང་ཆེད་ཞབས་ཞུ་ཞེས་པའི་བརྗོད་གཞིའི་སྟེང་བགྲོ་གླེང་མཛད་འདུག དེ་བཞིན་༸གོང་ས་༸སྐྱབས་མགོན་ཆེན་པོ་མཆོག་གི་མང་ཚོགས་ལ་བཀའ་སློབ་དང་བགྲོ་གླེང་གི་མཛད་འཕྲིན་རྣམས་www.mediacentrallive.princeton.eduཞེས་པའི་དྲ་རྒྱ་བརྒྱུད་ཐད་གཏོང་ཞུས་ཡོད་པ་མ་ཟད། བགྲོ་གླེང་ནང་ཨ་རིའི་ཤར་ཕྱོགས་ཀྱི་མཐོ་རིམ་སློབ་གྲྭ་གཞན་ཁག་གི་སློབ་མ་བཞི་བརྒྱ་ཙམ་ཡང་དྲ་རྒྱའི་ཐོག་མཉམ་ཞུགས་ཞུས་འདུག
