༢༠༡༤ ཟླ་ ༡༠ ཚེས་ ༨ རེས་གཟའ་ལྷག་པ།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཐེ་ཝན་དད་ལྡན་པ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༤ ཟླ་ ༡༠ ཚེས་ ༦ ནས་ ༩ བར་ཉིན་གྲངས་གསུམ་དང་ཕྱེད་ཀའི་རིང་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཐེ་ཝན་གཙོ་བོ་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ཀྱི་ཆོས་འབྲེལ་ཉིན་གཉིས་པ་སྟེ་ཕྱི་ཚེས་ ༧ ཉིན་གྱི་སྔ་དྲོ་དད་ལྡན་ཆོས་ཞུ་བ་རྣམས་ལ་རྒྱུན་དུ་ནས་གཞན་གཅེས་འཛིན་ཐོག་བསམ་བློ་གཏོང་ཐུབ་ན་ལུས་སེམས་གཉིས་ཀར་ཞི་བདེ་ཡོང་གི་ཡོད་སྐོར་བཀའ་སློབ་སྩལ་དོན། སྤྱིར་བཏང་སེམས་སྣང་བ་སྐྱིད་པོ་ཡོད་སྐབས་བྱང་ཆུབ་སེམས་ཀྱི་བསམ་བློ་འཁོར་གྱི་ཡོད་པ་དང། བསམ་བློ་གུ་དོག་པོ་ཆགས་སྐབས། རང་ཉིད་ཀྱིས་དོན་དག་བསྒྲུབ་ན་འགྲིག་གི་འདུག་བསམ་པ་ནམ་ཡང་བྱེད་རྒྱུ་མེད། བདེ་སྡུག་གང་ཞིག་བྱུང་ཡང་བླ་མེད་རྫོགས་བྱང་གི་གོ་འཕང་སྒྲུབ་ཐབས་ཀྱི་བསམ་བློ་གཏོང་དགོས་རྒྱུ་ཧ་ཅང་གལ་ཆེན་པོ་རེད། དེ་ལྟར་ཡོང་རྒྱུར་བྱང་ཆུབ་སེམས་སྒོམ་པ་ལས་ལྷག་པ་ཞིག་ཕལ་ཆེར་མེད།
ངོས་རང་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཡོད། ཅེས་བརྗོད་ཀྱི་མེད། འོན་ཀྱང་ངོས་རང་ད་ཆ་རང་ལོ་བརྒྱད་ཅུའི་མཚམས་ལ་བསླེབས་ཀྱི་ཡོད། ཧ་ལམ་ལོ་དྲུག་ཅུ་བདུན་ཅུའི་རིང་ལ་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བའི་སྐོར་ལ་བསམ་བློ་ཡང་སྐོར་བསྐྱར་སྐོར་བཏང་བར་བརྟེན་སེམས་ནང་ཚོར་བ་ཤུགས་ཆེན་པོ་ཡོང་གི་འདུག གང་ལྟར་གཞན་དོན་ཆེད་བསམ་བློ་བཏང་ན་རང་ཉིད་སེམས་སྐྱིད་པ་དང་ལུས་བདེ་བ་ཡོང་གི་ཡོད། དེ་བཞིན་གཞན་ཕན་དོན་གཉེར་གྱི་བློས་རང་ཉིད་གཅེས་འཛིན་གྱི་བློ་ཤུགས་ཆུང་དུ་གཏོང་གི་ཡོད། རང་གཅེས་འཛིན་བློ་ཤུགས་ཆེ་དྲགས་ན་མི་ཚེའི་ནང་སྐྱིད་པ་གང་ཡང་ཡོང་གི་མ་རེད། ཇི་ཙམ་གྱིས་གཞན་གཅེས་འཛིན་གྱི་བློ་ཡོད་པ་དེའི་ཚོད་ཀྱིས་རང་གཅེས་འཛིན་གྱི་བློ་རང་བཞིན་གྱིས་ཤུགས་ཆུང་དུ་འགྲོ་གི་རེད། དེ་ནི་དབང་ཡོད་བཤད་ནས་རང་གཅེས་འཛིན་བློ་ཤུགས་ཆུང་དུ་གཏོང་གི་མེད། ང་ཚོ་དུས་ད་ལྟ་བར་དུ་རང་གཅེས་འཛིན་བྱས་ནས་བསྡད་པ་རེད་ཀྱང་འབྲས་བུ་དང་ཕན་ཐོགས། ཁེ་ཕན་གང་ཞིག་འཐོབ་རྒྱུ་འདུག དེར་བརྟེན་གཞན་གཅེས་འཛིན་ཐོག་བསམ་བློ་བཏང་ན། རང་ཉིད་ཕུང་ལ་སྦྱོར་མཁན་གྱིས་རང་གཅེས་འཛིན་གྱི་བློ་མགོ་གནོན་ཏེ། གཏན་དུ་སྐྱིད་པའི་སྐྱིད་འགོ་ཚུགས་ཀྱི་རེད། ཕྱོགས་མཚུངས་དུག་གསུམ་ཉོན་མོངས་སེལ་ཆེད་ཕྱག་འཚལ་བ་དང་སྐོར་བ་རྒྱག་རྒྱུ་ཧ་ཅང་ཡག་པོ་རེད། འོན་ཀྱང་དེ་ཙམ་གྱིས་ཉོན་མོངས་སེལ་རྒྱུ་ཤིན་ཏུ་ནས་དཀའ་ལས་ཁག་པོ་རེད། དེར་བརྟེན་ཤེས་རབ་ཀྱི་སྣང་བ་ཁོ་ནས་ཉོན་མོངས་སེལ་བ་མ་གཏོགས་དེ་ལས་ལྷག་པ་ཕལ་ཆེར་མེད། ཅེས་བཀའ་སློབ་དང་ཆོས་འབྲེལ་འཕྲོ་སྐྱོང་ནས་མུ་མཐུད་དབུ་འཛུགས་འདུག
