༢༠༡༤ ཟླ་ ༡༠ ཚེས་ ༡༠ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་རྣམ་རྒྱལ་ཚེ་དབང་ལགས་ཀྱིས་ཕྱི་ལོ་ ༢༠༡༤ ཟླ་ ༡༠ ཚེས་ ༡༠ ཉིན་བཏང་གནས་ནང་འཁོད་དོན། དཔལ་ལྡན་སྲིད་སྐྱོང་མཆོག་གིས་ཁ་སང་ཀ་ལོན་སྦུག་གཡུ་ལོ་བཀོད་རྒས་གསོ་ཁང་དུ་འཚམས་གཟིགས་དང་འབྲེལ་རྒན་འཁོགས་ཚོར་ཐུག་འཕྲད་དང། ས་གནས་དེ་གའི་ནང་ཡོད་པའི་འཕགས་བོད་ནང་པའི་རིག་གནས་སློབ་གཉེར་ཁང་ལ་ཡང་འཚམགས་གཟིགས་གནང་འདུག དེ་བཞིན་ཤེས་རིག་བཀའ་བློན་མཆོག་གིས་ཀ་སྦུག་གཏན་སློབ་ཀྱི་སློབ་ཕྲུག་དང་དགེ་རྒན་ཚོར་ཐུག་འཕྲད་གནང་ཡོད། དཔལ་ལྡན་སྲིད་སྐྱོང་མཆོག་དང་ཤེས་རིག་བཀའ་བློན་རྣམ་གཉིས་ཀ་སྦུག་གཏན་སློབ་དབུ་བརྙེས་ནས་ལོ་ལྔ་བཅུ་འཁོར་བའི་དུས་དྲན་མཛད་སྒོའི་སྐུ་མགྲོན་གཙོ་བོར་བཅར་ཡོད།
སྲིད་སྐྱོང་མཆོག་ཁ་སང་ཁུལ་དེའི་ལས་འཆར་ཁག་གྲུབ་ནས་ལྡི་ལིའི་ཕྱོགས་སུ་ཕེབས་ཐོན་དང། ཤེས་རིག་བཀའ་བློན་མཆོག་རང་ཝང་ལ་བོད་མིའི་གཞིས་ཆགས་སུ་གཞུང་འབྲེལ་འཚམས་གཟིགས་སུ་ཕེབས་གནང་ཡོད། སྲིད་སྐྱོང་མཆོག་གིས་ཚེས་ ༦ ནས་རྒྱ་གར་བྱང་ཤར་ཁུལ་ཁར་ཤང་དང་སོ་ན་དྷ། རྡོར་གླིང་།
ཀ་སྦུག་བཅས་ཀྱི་ནང་འཚམས་གཟིགས་དང་། མང་ཚོགས་ལ་གསུང་བཤད། དྲི་བ་ཁག་ལ་ལན་འདེབས་གནང་ཡོད། ད་རིང་ཀ་སྦུག་གཏན་སློབ་ལོ་ལྔ་བཅུ་འཁོར་བའི་དུས་དྲན་གྱི་མཇུག་བསྡོམས་མཛད་སྒོ་གནང་གི་ཡོད་པ་རེད། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་སྤེན་ཚེ་རིང་མཆོག་བཅར་ཡོད། ཀ་ལོན་སྦུག་གཏན་སློབ་ནི་རྒྱ་གར་བྱང་ཤར་ནུབ་བྷང་གལ་མངའ་སྡེའི་ཀ་ལོན་སྦུག་ཅེས་པའི་གྲོང་ཁྱེར་གྱི་ཏོབ་ཁ་ན་ཞེས་པའི་ས་གནས་ཁོངས་སུ་ཆགས་ཡོད་པ་དང་། སློབ་གྲྭ་འདི་ཐོག་མར་ཕྱི་ལོ་ ༡༩༦༤ ལོར་གསར་འཛུགས་གནང་འདུག སློབ་གྲྭའི་འཛིན་སྐྱོང་ལྡི་ལི་སྐྱབས་བཅོལ་བོད་མིའི་སློབ་གྲ་ཚོགས་པ་ནས་གནང་འདུག་ཀྱང་ཕྱིས་སུ་དབུས་བོད་སློབ་འཛིན་སྐྱོང་ཚོགས་པའི་ཁྱབ་ཁོངས་སུ་གྱུར་ཡོད་པ་རེད། སློབ་གྲྭ་འདིའི་སློབ་ཕྲུག་ཕལ་ཆེ་བ་རྒྱ་གར་བྱང་ཤར་བལ་ཡུལ། འབྲུག འབྲས་ལྗོངས་དང་ཨ་རུ་ནཱ་ཅལ་མངའ་སྡེ་སོགས་ནས་ཡིན་འདུག
