༢༠༡༤ ཟླ་ ༡༠ ཚེས་ ༦ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢ ཉིན་དགུང་གྲངས་ ༩༥ ཕེབས་པའི་བོད་མིའི་ཤེས་ཡོན་དང་བདེ་དོན་ཆེད་རོགས་རམ་གནང་མཁན་ཇར་མན་དུ་གནས་སྡོད་ཨ་མ་ཝེ་གར་ལགས་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་བློ་ཕམ་དང་ལྷན་ཐུགས་གསོའི་འཕྲིན་ཡིག་ཕུལ་བའི་ནང་འཁོད་དོན། ལྕམ་སྐུ་ཨིམ་ཊའོ་ཊི་ཝེ་གར་མཆོག་གམ་ Ms Imtraut Wäger བོད་མི་ཚོས་མཛའ་བརྩེ་ཆེན་པོའི་ཐོག་ནས་ཨ་མ་ཝེ་གར་ཞེས་འབོད་སྲོལ་ཡོད་པ་ཁོ་མོ་འདས་གྲོངས་སུ་གྱུར་བར་བོད་མིའི་སྒྲིག་འཛུགས་ལ་ཧ་ཅང་བློ་ཕམ་བྱུང་། རྒྱ་གར་དང་བལ་ཡུལ་ནང་ཡོད་པའི་བོད་མི་ཉམ་ཐག་རྣམས་ཀྱི་ཤེས་ཡོན་དང་བདེ་དོན་ཆེད་མི་ཚེ་ཧྲིལ་པོར་སྐུ་ལས་ཚད་མེད་སྐྱོན་གནང་མཁན་ཨ་མ་ཝེ་གར་ལགས་འདས་གྲོངས་སུ་གྱུར་བ་དེས་བོད་མི་ཚོའི་གྲོགས་པོ་བློས་ཐུབ་གཅིག་མེད་པར་གྱུར་ཡོད།
བཙན་བྱོལ་བོད་མིའི་སྤྱི་ཚོགས་ཚགས་ཚུད་ངང་གནས་ཐུབ་ཆེད་ཨ་མ་ཝེ་གར་ལགས་ཀྱིས་བྱས་རྗེས་ཧ་ཅང་བཞག་ཡོད་པ་མ་ཟད། མི་མང་པོ་ཞིག་གི་མི་ཚེ་དོན་ལྡན་ཞིག་བཟོ་རྒྱུའི་རེ་བའི་འོད་སྣང་ཞིག་ཀྱང་སྦྱིན་ཡོད། དེར་བརྟེན་བཙན་བྱོལ་བོད་མིའི་འབྱུང་འགྱུར་མི་རབས་མང་པོའི་རིང་ཨ་མ་ལགས་ཀྱི་བཀའ་དྲིན་བསམ་ཤེས་ཐོག་དྲན་གསོ་ཞུ་རྒྱུ་ཡིན། ངོས་ཀྱིས་དམ་པ་ཁོང་གི་ནང་མི་སྤུན་མཆེད་རྣམས་ལ་སེམས་གསོ་དང་གདུང་སེམས་མཉམ་སྐྱེ་ཞུ་རྒྱུ་བཅས། ཞེས་འཁོད་པའི་གནས་འཕྲིན་ཕུལ་འདུག
