༢༠༡༤ ཟླ་ ༡༠ ཚེས་ ༡༥ རེས་གཟའ་ལྷག་པ།
༄༅། །འདི་གར་བལ་ཡུལ་སྤོག་ར་བཀྲ་ཤིས་གླིང་བོད་མིའི་གཞིས་ཆགས་ལས་ཁུངས་ནས་ཕྱི་ལོ་ ༢༠༡༤ ཟླ་ ༡༠ ཚེས་ ༡༥ ཉིན་བཏང་གནས་ནང་འཁོད་དོན། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་འཆར་ལོར་དགུང་གྲངས་ ༨༠ ཐམ་པ་ཕེབས་བཞེས་ཀྱི་དགའ་སྟོན་མཛད་སྒོའི་དུས་ཚིགས་ཁྱད་པར་ཅན་དང་། བོད་དོན་བདེན་མཐའ་གསལ་ཐབས་ཀྱི་ལས་འགུལ་གོང་ཐོར་སྤེལ་ཆེད། ལྷག་པར་མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་ཞུ་བཞིན་པ་དང་སྟབས་བསྟུན་བལ་ཡུལ་སྤོག་ར་བཀྲ་ཤིས་གླིང་གི་བོད་མི་ཐུན་མོང་ནས་༸རྒྱལ་བའི་བཀའ་དྲིན་རྗེས་དྲན་ཞུ་ཆེད་བོད་རྒྱལ་ལོ་ ༢༡༤༡ རབ་གནས་ཤིང་རྟ་ལོའི་བོད་ཟླ་ ༨ ཚེས་ ༢༢ དང་། ཕྱི་ལོ་ ༢༠༡༤ ཟླ་ ༡༠ ཚེས་ ༡༥ རེས་གཟའ་ལྷག་པའི་ཉིན་བལ་ཡུལ་སྤོག་ར་བཀྲ་ཤིས་གླིང་སྐྱབས་བཅོལ་བོད་མིའི་གཞིས་ཆགས་དབུ་བརྙེས་ཏེ་ལོ་ངོ་ལྔ་བཅུ་འདས་པའི་བོད་མིའི་སྐྱིད་སྡུག་དྲན་གསོ་སྲུང་བརྩི་ཞུས་ཡོད།
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༧།༣༠ ཐོག་དཔལ་ལྡན་གཞིས་དགོན་མཆོག་སྤྲུལ་རིན་པོ་ཆེ་མཆོག་དང་། སྐྱབས་གནས་དགེ་འདུན་རྣམ་པ། དེ་བཞིན་མི་མང་ཡོངས་ནས་གཞིས་སྒར་རྟེན་ཁང་མདུན་ཐང་དུ་ཚང་འཛོམས་ཐོག་བོད་བསྟན་སྲིད་ཀྱི་སྲུང་མ་དམར་ནག་གཉིས་སུ་འཕྲིན་སྐུལ་དང་། བསངས་གསོལ་ཟབ་རྒྱས་ཞུ་རྗེས་མཆོག་སྤྲུལ་རིན་པོ་ཆེ་མཆོག་དང་ལས་ཀྱི་སྣེ་མོ་བ་རྣམས་མི་མང་ཚོགས་ཁང་ནང་དང་མི་མང་རྣམས་ཚོགས་ཁང་གི་ཉེ་འགྲམ་སྡོད་གུར་ནང་འདུ་འཛོམས་གནང་ཡོད། ཆུ་ཚོད་ ༩ ཐོག་ཕྱོགས་མཐའ་ཁག་ནས་ཕེབས་པའི་སྐུ་མགྲོན་གཙོ་བོ་མཆོག་དང་། བཀའ་ཟུར་དཔལ་འབྱོར་ཚེ་རིང་མཆོག བཀུར་འོས་སྤྱི་འཐུས་རྣམ་པ། གཞན་ཡང་སྐུ་མགྲོན་རྣམས་ཚོགས་ཁང་ནང་ལྷན་འཛོམས་ཀྱིས་སྐུ་མགྲོན་གཙོ་བོ་མཆོག་གིས་བོད་མིའི་སྐྱིད་སྡུག་དྲན་གསོ་སམ་མི་ལོ་ ༥༠ འཁོར་བའི་དུས་དྲན་སྲུང་བརྩི་དབུ་འཛུགས་ཀྱིས་སྣང་གསལ་ཞལ་དབྱེ་དང་ (SOS) ཨེས་ཨོ་ཨེས་སློབ་ཕྲུག་དང་མི་མང་ཡོངས་ནས་རྔ་རོལ་གླིང་གསུམ་གྱི་སྒོ་ནས་མགྲིན་དབྱངས་གཅིག་གྱུར་ཐོག་བོད་རྒྱལ་ཁབ་དང་། བལ་ཡུལ་གྱི་རྒྱལ་གླུ་ལེན།
དེ་རྗེས་བཀྲ་ཤིས་གླིང་གི་ཕྲ་བའི་སྒྱུ་རྩལ་མཁན་སྒེར་བཙན་པ་ལྷག་པ་རྣམ་རྒྱལ་ལགས་ཀྱིས་རྟེན་འབྲེལ་དགའ་སྟོན་མཚོན་ཆེད་གླུ་གཞས་བཏང་། དེ་ནས་བཀྲ་ཤིས་གླིང་ས་འཐུས་ཚོགས་གཙོ་བསོད་ནམས་བཟང་པོ་ལགས་ཀྱིས་དུས་ཆེན་ངོ་སྤྲོད་གསུང་བཤད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་གཞིས་ཆགས་འགོ་འཛུགས་སྐབས་སུ་ཡུལ་མི་དཔོན་རིགས་ཁག་དང་། ཕྱི་རྒྱལ་རོགས་མགོན་སྐུ་ཞབས། དེ་མཚུངས་བོད་རིགས་ལས་བྱེད་སྐུ་ལས་སྐྱོན་མཁན་སྣེ་མོ་བ་རྣམས་ཀྱི་བཀའ་དྲིན་རྗེས་སུ་དྲན་པའི་ཐོག་ནས་ཆེ་མཐོང་གིས་ཕྱག་རྟགས་གནང་། དེ་རྗེས་སྐུ་མགྲོན་རྣམས་ནས་རིམ་བཞིན་གསུང་བཤད་གནང་བལ་ཡུལ་དོན་གཅོད་རྟ་མགྲིན་རྡོ་རྗེ་ལགས་ཀྱིས་སྐུ་མགྲོན་གཙོ་བོ་མཆོག་ལ་ལེགས་སྐྱེས་ཕུལ།
དེ་ནས་ཕྲ་བའི་སྒྱུ་རྩལ་མཁན་སྒེར་བཙན་པ་ལྷག་པ་རྣམ་རྒྱལ་ལགས་ཀྱིས་བལ་ཡུལ་རྒྱལ་ཁབ་ལ་ཐུགས་རྗེ་ཆེ་ཞུའི་གླུ་གཞས་བཏང་རྗེས་ས་གནས་འགོ་འཛིན་ཚུལ་ཁྲིམས་རྡོ་རྗེ་ལགས་ཀྱིས་ཐུགས་རྗེ་ཆེ་ཞུས་གྲུབ་བསྟུན་སྐུ་མགྲོན་གཙོ་བོ་མཆོག་གིས་བོད་མི་རྣམས་བཙན་བྱོལ་དུ་འབྱོར་ནས་ད་བར་གནས་སྟངས་གནས་ལུགས་རྣམས་འདྲ་དཔར་གྱི་ཐོག་ནས་ཕྱི་ལོ་ ༡༩༦༤ ནས་ ༢༠༡༤ བར་གྱི་འགྲེམས་སྟོན་དབུ་འབྱེད་དང་སྦྲགས་རིམ་བཞིན་སྐུ་མགྲོན་རྣམ་པས་གཟིགས་སྐོར་གནང་དེ་ནས་སྐུ་མགྲོན་གཙོ་བོས་དབུས་སྐུ་མགྲོན་ཡོངས་ལ་དགྱེས་སྟོན་གསོལ་ཚིགས་དང་མི་མང་དང་དགེ་ལས་སློབ་ཕྲུག་ཐུན་མོང་ལ་ཉིན་དགུང་གསོལ་ཚིགས་འབུལ་གཤོམ་གནང་བ་བཅས།།
