༢༠༡༤ ཟླ་ ༡༠ ཚེས་ ༡༧ རེས་གཟའ་པ་སངས།
༄༅། །བོད་མིའི་སྒྲིག་འཛུགས་ཕྱི་དྲིལ་འགྲེམས་སྟོན་ཚན་པས་ཕྱི་ལོ་ ༢༠༡༤ ཟླ་ ༡༠ ཚེས་ ༡༥།༡༦ བཅས་ཉིན་གཉིས་རིང་རྒྱ་གར་བྱང་ཕྱོགས་བདེ་སྐྱིད་གླིང་བོད་མིའི་གཞིས་ཆགས་སུ་མི་མང་དང་སློབ་ཕྲུག་སོགས་ལ་པར་རིགས་འགྲེམས་སྟོན་གནང་འདུག
དེ་ཡང་ཐོག་མར་ས་གནས་འགོ་འཛིན་བྱམས་པ་ཕུན་ཚོགས་ལགས་ཀྱིས་པར་རིགས་འགྲེམས་སྟོན་དབུ་འབྱེད་དང་འབྲེལ་གསུང་བཤད་གནང་དོན། པར་རིགས་ཀྱི་ལམ་ནས་བོད་དོན་ངོ་སྤྲོད་གནང་བ་དེ་ནི་བོད་མིའི་འཐབ་རྩོད་མི་རབས་གཅིག་ནས་གཅིག་ལ་རྩིས་སྤྲོད་ཐུབ་པའི་ལས་འགུལ་ཧ་ཅང་གལ་ཆེན་པོ་ཞིག་ཡིན་པ་མ་ཟད། པར་རིགས་བརྒྱུད་ནས་བོད་མི་གཞོན་སྐྱེས་ཚོས་རང་གི་མེས་པོ་གོང་མ་རྣམས་དང་། ལྷག་པར་༸གོང་ས་སྐུ་ཕྲེང་རིམ་བྱོན་རྣམས་ཀྱི་སྐུ་ཚེའི་མཛད་འཕྲིན་ཁག་ལ་རྒྱུས་མངའ་ཡོང་ཐུབ་རྒྱུས་མཚོན། བོད་ཀྱི་འདས་པའི་དུས་སྐབས་བསྐྱར་གསོའི་ལམ་ནས་མ་འོངས་མདུན་སྐྱོད་ཐུབ་རྒྱུར་ཧ་ཅང་ཕན་ཐོགས་ཡོང་རྒྱུ་ཡིན། དེར་བརྟེན་ངས་བདེ་སྐྱིད་གླིང་མི་མང་ཡོངས་ཀྱི་ཚབ་ཞུས་ཏེ་ཕྱི་དྲིལ་ལས་ཁུངས་ལ་ཐུགས་རྗེ་ཆེ་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང།
དེ་རྗེས་ཕྱི་དྲིལ་འགྲེམས་སྟོན་ཚན་པའི་འགན་འཛིན་བཀྲ་ཤིས་ཕུན་ཚོགས་ལགས་ཀྱིས་ཕྱི་དྲིལ་ལས་ཁུངས་ཀྱི་ལས་དོན་སྤྱི་དང་། ལྷག་པར་ཕྱི་དྲིལ་འགྲེམས་སྟོན་ཚན་པའི་ལས་དོན་གནང་ཕྱོགས་སྐོར། ཐེངས་འདིར་པར་རིགས་འགྲེམས་སྟོན་གོ་སྒྲིག་ཞུ་དགོས་པའི་རྒྱུ་མཚན། པར་རིགས་འགྲེམས་སྟོན་ནང་བརྗོད་གཞི་གཙོ་བོ་གང་དང་གང་ཡོད་སྐོར་སོགས་ཞིབ་ཕྲ་གསལ་བཤད་གནང་།
སྐབས་དེར་སམ་བྷོ་ཊ་དང་། རྒྱ་གར་གྱི་ཊ་ཆི་ཝུ་ཌ་སློབ་གྲྭ (Touchwood School) དེ་བཞིན་མངོན་དགའ་སློབ་གྲྭ ས་སྐྱའི་བཙུན་དགོན། སྲི་ཞུ་བ་བགྲེས་ཡོལ་ཕེབས་པ་རྣམ་པ། གཞན་ཡང་བདེ་སྐྱིད་གླིང་ས་གནས་མི་མང་སོགས་ཁྱོན་མི་གྲངས་ ༧༠༠ བརྒལ་བས་པར་རིགས་ཁག་དང་ཕྱི་དྲིལ་ལས་ཁུངས་ཀྱི་ཟླ་རེའི་ཤེས་བྱ། དེ་བཞིན་བོད་མིའི་སྒྲིག་འཛུགས་ཀྱི་སྲིད་བྱུས་ལམ་སྟོན་དང་འབྲེལ་བའི་དཔེ་དེབ་སོགས་ལ་དོ་སྣང་ཧ་ཅང་གནང་འདུག ཕྱེད་ཡོལ་བོད་དོན་དང་འབྲེལ་བའི་གློག་བརྙན་བསྟན་ཡོད།
ཐེངས་འདིར་པར་རིགས་འགྲེམས་སྟོན་གྱི་བརྗོད་གཞི་གཙོ་བོ་གསུམ་ལ་དབྱེ་ཡོད་པ་རྣམས་ནི། ༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེའི་མཛད་ཁུར་གཙོ་བོ་གསུམ་དང་། བཙན་བྱོལ་བོད་མི་རྣམས་ཀྱི་མི་ལོ་ལྔ་བཅུ་ལྷག་གི་གནས་སྟངས་སྐོར། ཕྱོགས་མཚུངས་བོད་མི་ཚོས་རང་ལུས་མེར་སྲེག་གཏོང་དགོས་དོན་གང་ཡིན། ཞེས་པའི་དེང་སྐབས་ཛ་དྲག་གི་དྲི་བ་གལ་ཆེན་པོ་ཆགས་ཡོད་པའི་སྐོར་སོགས་ཀྱི་གནད་དོན་རྣམས་པར་རིགས་དང་ཡིག་ཆའི་ལམ་ནས་འགྲེམས་སྟོན་གནང་ཡོད།
དེ་ཡང་སྐབས་བཅུ་བཞི་པའི་བཀའ་ཤག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་སླད་ཕྱི་ལོ་ ༢༠༡༤ ལོ་ཧྲིལ་པོའི་རིང་རྒྱ་གར་གཙོ་བོར་གྱུར་བའི་བཙན་བྱོལ་བོད་མིའི་གནས་ཡུལ་རྒྱལ་ཁབ་འདྲ་མིན་ནང་༸གོང་ས་མཆོག་གི་སྐུའི་མཛད་ཁུར་གཙོ་བོ་གསུམ་དང་། བོད་ནང་གི་ཛ་དྲག་གནས་སྟངས་སྐོར་གོ་རྟོགས་ལས་འགུལ་འདྲ་མིན་སྤེལ་འགོ་བཙུགས་པའི་ཆ་ཤས་སུ་ཕྱི་དྲིལ་འགྲེམས་སྟོན་ཚན་པས་པར་རིགས་འགྲེམས་སྟོན་གྱི་སྐོར་བསྐྱོད་ལས་གཞི་དབུ་འཛུགས་གནང་བ་ཞིག་ཡིན་འདུག ཐེངས་འདིར་བོད་མིའི་སྒྲིག་འཛུགས་ཕྱི་དྲིལ་འགྲེམས་སྟོན་ཚན་པས་ཟླ་བ་གཅིག་རིང་རྒྱ་གར་བྱང་ཕྱོགས་ས་ཁུལ་ཁག་ཏུ་སྐོར་བསྐྱོད་པར་རིགས་འགྲེམས་སྟོན་གནང་སྐབས། ཚན་པའི་འགན་འཛིན་དྲུང་གཞོན་བར་གླིང་བཀྲ་ཤིས་ཕུན་ཚོགས་ལགས་དང་ལས་རོགས་ཀུན་དགའ་ཕུན་ཚོགས་ལགས་དང་བསྟན་འཛིན་ཕན་བདེ་ལགས་བཅས་ཕེབས་ཡོད། །
