༢༠༡༤ ཟླ་ ༡༠ ཚེས་ ༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༡ རེས་གཟའ་ལྷག་པའི་སྔ་དྲོ་ཆུ་ཚོད་ ༡༠ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་ཚོགས་ཁང་ནང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཨི་རན་གྱི་ལྕམ་སྐུ་ཤི་རིན་ཨི་བྷ་ཌི་ Shirin Ebadi མཆོག་གིས་གསར་འགོད་གསལ་བསྒྲགས་སྐབས་གསུང་བཤད་གནང་དོན། ཕྱི་ལོ་ ༢༠༠༩ ནས་ཕྲན་རང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་དབུས་བཙན་བྱོལ་བོད་མི་རྣམས་དང་མཚུངས་པར་སྐྱབས་བཅོལ་བའི་གནས་སྟངས་འོག་འཚོ་བཞིན་ཡོད། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་ཚོས་འཚེ་མེད་ཞི་བའི་ལམ་ནས་འཐབ་རྩོད་ཀྱི་ལས་འགུལ་སྤེལ་བཞིན་པ་དེར་དུས་རྟག་ཏུ་རྒྱབ་སྐྱོར་ཞུ་བཞིན་ཡོད། ཕྲན་རང་འདིར་ཡོང་བ་ཐེངས་དང་པོ་མིན། ལོ་ལྔའི་གོང་༸གོང་ས་ཏཱ་ལའི་བླ་མ་མཆོག་གིས་ཕྲན་ལ་མགྲོན་འབོད་མཛད་པ་ལྟར་བཅར་རྒྱུ་བྱུང་།
བོད་ཀྱི་འགྲེམས་སྟོན་ཁང་དུ་གཟིགས་ཞིབ་གནང་བཞིན་པ།
ངས་དྲན་གསལ་ལྟར་ན། ཕལ་ཆེར་ལོ་བརྒྱད་གོང་ཀོ་སི་ཊ་རི་ཁའི་(Costa Rica)རྒྱལ་ཁབ་ནང་ནོ་བེལ་ཞི་བདེའི་ལྷན་ཚོགས་འཚོགས་རྒྱུ་བྱས་པ་རེད། ཀོ་སི་ཊ་རི་ཁའི་སྲིད་འཛིན་ཁོང་རང་ཉིད་ཀྱང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་མཚུངས་པར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཞིག་ཡིན། འོན་ཀྱང་རྒྱ་ནག་གཞུང་གི་གནོན་ཤུགས་འོག་ཁོང་གིས་༸གོང་ས་ཏཱ་ལའི་བླ་མ་མཆོག་སྐབས་དེར་ལྷན་ཚོགས་ནང་མགྲོན་འབོད་ཞུ་རྒྱུ་ཕྱིར་འཐེན་བྱས་པར་བརྟེན། ང་ཚོས་ཀྱང་ལྷན་ཚོགས་དེར་བཅར་མེད། ང་ཚོས་དེ་ལྟར་བྱེད་དགོས་དོན་ནི། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་རྣམས་གཅིག་པུར་ལུས་མེད། ང་ཚོ་ཁོང་རྣམ་པའི་རྒྱབ་ཏུ་ཡོད། ཅེས་རྒྱ་ནག་གཞུང་ལ་བརྡ་ལན་སྤྲོད་ཆེད་ཡིན། བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་རྣམས་ཀྱིས་དྲང་བདེན་དང་འགྲོ་བ་མིའི་ཐོབ་ཐང་སྲུང་སྐྱོབ། དེ་བཞིན་འདྲ་མཉམ་ཆེད་འཐབ་རྩོད་མཛད་བཞིན་ཡོད། དེར་བརྟེན་འཛམ་གླིང་གིས་ཁྱེད་རྣམ་པར་རྒྱབ་སྐྱོར་ཞུ་བཞིན་ཡོད།
བོད་ཀྱི་འགྲེམས་སྟོན་ཁང་དུ་གཟིགས་ཞིབ་གནང་བཞིན་པ།
འོན་ཀྱང་སྟབས་མ་ལེགས་པ་ཞིག་ལ་ལྷོ་ཨ་ཕི་རི་ཀའི་ནང་དུའང་གནས་ཚུལ་དེ་མཚུངས་ཤིག་བྱུང་ཡོད། ལྷོ་ཨ་ཕི་རི་ཀའི་ལོ་རྒྱུས་ནང་མི་རིགས་དབྱེ་འབྱེད་ལ་འཚེ་མེད་ཞི་བའི་ལམ་ནས་གདོང་ལེན་ཤུགས་ཆེ་བྱས་ཡོད། དེར་བརྟེན་ལྷོ་ཨ་ཕི་རི་ཀའི་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་མཐོང་མཆན་འབུལ་ལམ་མ་ཞུས་པའི་གནས་སྟངས་ཐེངས་གསུམ་ཆགས་པ་དེར་ང་ཚོས་ངོས་ལེན་བྱ་ཐབས་རྩ་བ་ནས་མེད། ལྷག་པར་ཡི་ཤུའི་བླ་ཆེན་ཌེ་སི་མོན་ཊུ་ཊུ་མཆོག་ནས་ཀྱང་གནད་དོན་འདིའི་ཐོག་ད་བར་གང་ཡང་མ་གསུངས་པར་ཁ་ཁུ་སིམ་མེར་བཞུགས་པ་དེར་ཡ་མཚན་པ་ཞིག་བྱུང་། བླ་ཆེན་ཁོང་ནི་རྒྱལ་ཁབ་དེའི་གཞུང་འཛིན་ཚོགས་པའི་མི་སྣ་མིན་པ་ངས་ཤེས་ཀྱི་ཡོད། འོན་ཀྱང་ཁོང་གིས་ང་ཚོ་ནང་བཞིན་བསྒྲགས་གཏམ་སྤེལ་ནས་ལྷོ་ཨ་ཕི་རི་ཀའི་བྱ་སྤྱོད་དེར་སྐྱོན་བརྗོད་གང་ཡང་མ་གནང་བར་ང་རང་ཧ་ཅང་ཡ་མཚན་སྐྱེས་བྱུང་། དེར་བརྟེན་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་རྣམས་ཀྱིས་འཚེ་མེད་ཞི་བའི་ལམ་ནས་རྒྱ་ནག་གཞུང་གི་བྱ་སྤྱོད་ལ་སྐྱོན་བརྗོད་གདོང་ལེན་མཛད་པ་ནི་ཧ་ཅང་གི་གནད་འགག་ཆེན་པོ་ཡིན།
རྒྱ་ནག་མི་འབོར་ཧ་ཅང་མང་པོ་ཡོད་པ་ཁྱེད་ཚོས་མཁྱེན་གསལ་རེད། འོན་ཀྱང་རྒྱ་རིགས་མང་ཚོགས་ཕལ་ཆེ་བས་རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པ་མཐོང་བཞིན་དུ་དེར་སྐྱོན་བརྗོད་གང་ཡང་མ་བྱས་པར་ཁ་ཁུ་སིམ་མེར་བསྡད་པ་ནི་བློ་ཕམ་དགོས་པའི་གནས་ཚུལ་ཞིག་ཡིན། དེང་སྐབས་རྒྱ་རིགས་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ལིའུ་ཞའོ་པོ་མཆོག་ད་ལྟ་རྒྱ་ནག་གི་བཙོན་ཁང་ནང་ལུས་ཡོད། ཕྱོགས་མཚུངས་ངའི་གྲོགས་མོ་ལྕམ་ར་བྷི་ཡ་ཁ་དིར་མཆོག་ནས་རྒྱ་ནག་གཞུང་གིས་ཡུ་གུར་བ་ཁ་ཆེའི་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བའི་སྐོར་ང་ལ་འགྲེལ་བཤད་མང་པོ་གནང་མྱོང་ཡོད། ར་བྷི་ཡ་ཁ་ཌིར་མཆོག་གིས་རྒྱ་ནག་གཞུང་ལ་མུ་མཐུད་ནས་སྐྱོན་བརྗོད་བྱས་པར་བརྟེན་ཁོང་གི་ཕྲུ་གུ་རྣམས་རྒྱ་ནག་གཞུང་གིས་བཙོན་དུ་བཅུག་ཡོད། ཅེས་སོགས་ཀྱི་གསར་འགོད་གསལ་བསྒྲགས་སྤེལ་སོང་།།
