༢༠༡༤ ཟླ་ ༡༠ ཚེས་ ༣ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢ ཉིན་བདག་ཉིད་ཆེན་པོ་གཱན་ངྷི་མཆོག་གི་འཁྲུངས་ཚེས་ (Gandhi Jayanti) དང་འབྲེལ་བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༨༩ ལོར་འཛམ་གླིང་ནང་ཆེས་སྙན་གྲགས་ཆེ་བའི་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ནས་ལོ་ངོ་ ༢༥ འཁོར་བའི་དུས་ཚིགས་ཁྱད་པར་ཅན་སྲུང་བརྩི་གཟབ་རྒྱས་ཞུས་པའི་མཛད་སྒོར་སྐུ་མགྲོན་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཨ་རི་བ་ལྕམ་སྐུ་ཇུ་ཌི་ཝིལ་ཡེམ་སི་མཆོག་གིས་གསུང་བཤད་གནང་དོན།
ང་རང་དེ་རིང་རྡ་སར་བཅར་ཐེངས་གསུམ་པ་ཆགས་ཡོད། དེར་བརྟེན་དེ་རིང་མཛད་སྒོའི་ཐོག་བཅར་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གིས་དབུས་བོད་མི་རྣམས་དང་ལྷན་མཛད་སྒོ་སྲུང་བརྩི་ཞུ་རྒྱུའི་སྐལ་བཟང་གི་གོ་སྐབས་ཐོབ་པར་སེམས་ནང་ཧ་ཅང་དགའ་སྤོབས་ཆེན་པོ་ཐོབ་བྱུང་། ལྷག་པར་གཱན་དྷིའི་འཁྲུངས་སྐར་ཉིན་དུས་དྲན་མཛད་སྒོ་གོ་སྒྲིག་གནང་ཐུབ་པ་འདི་ནི་རྟེན་འབྲེལ་བཟང་པོ་ཞིག་ཡིན། མེས་པོ་དམ་པ་གཱན་དྷི་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུ་མ་ཐུབ་པ་དེ་ནི་ནོ་བེལ་གཟེངས་རྟགས་ཚོགས་ཆུང་གིས་ནོར་འཁྲུལ་ཧ་ཅང་ཆེན་པོ་བྱུང་ཡོད། མེས་པོ་དམ་པ་གཱན་དྷི་ཁོང་གི་མཛད་རྗེས་ནི་ནོ་བེལ་ཞི་བདེའི་གཟེངས་རྟགས་ལས་ལྷག་པ་ཞིག་ཡིན། འཛམ་གླིང་ནང་གི་མི་རབས་རྒན་གཞོན་ཚང་མས་དམ་པ་ཁོང་གི་མཛད་རྗེས་ལ་མིག་དཔེ་ལྟ་དགོས་པ་ཞིག་ཆགས་ཡོད། ལོ་ངོ་ ༡༦ ཙམ་གྱི་གོང་ཨ་རིའི་ཝིར་ཇི་ནི་ཡའི་གཙུག་ལག་སློབ་གྲྭའི་ནང་ངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ཐེངས་དང་པོར་མཇལ་བྱུང་། སྐབས་དེར་ངས་བསམ་བློའི་ནང་གི་བག་ཆགས་ཤུགས་ཆེ་ཤོས་དེ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་གྱི་ཆོས་ལུགས་དབུ་ཁྲིད་གཉིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་ཡི་ཤུའི་ཆོས་དཔོན་སྐུ་ཞབས་ཌེ་སི་མོན་ཊུ་ཊུ་མཆོག་རྣམ་གཉིས་ཡིན། ལྷག་པར་ང་ཚོ་མང་པོ་ཞིག་གིས་ཁོང་གཉིས་ལ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ནང་ནས་ཁྱད་དུ་འཕགས་པ་ཡིན། ཞེས་འབོད་སྲོལ་ཡོད། ལྷོ་ཨ་ཕི་རི་ཀའི་སྲིད་གཞུང་གི་གནང་ཕྱོགས་དེར་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་ཚང་མ་བློ་ཕམ་བྱུང་ཡོད།
དེར་བརྟེན་ང་ཚོ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་མི་གྲངས་བཅུ་བཞིས་ལྷོ་ཨ་ཕི་རི་ཀའི་སྲིད་འཛིན་ཇེ་ཀོབ་ཛུ་མ་མཆོག་ལ་ངོ་རྒོལ་བྱས་ནས་༸གོང་ས་ཏཱ་ལའི་བླ་མ་མཆོག་ཡུལ་དེར་ཆིབས་སྒྱུར་བསྐྱང་ཐུབ་རྒྱུར་མཐོང་མཆན་འབུལ་ལམ་ཞུ་དགོས་པའི་གནོན་ཤུགས་སྤྲད་པ་ཡིན། དེ་ལྟར་༸གོང་ས་མཆོག་ལ་མཐོང་མཆན་འབུལ་ལམ་ཞུས་པ་ཡིན་ན་ང་ཚོ་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་རྣམས་ཀྱིས་བོད་ཀྱི་༸སྐྱབས་མགོན་ཏཱ་ལའི་བླ༌མ་མཆོག་དང་ལྷན་ལྷོ་ཨ་ཕི་རི་ཀའི་ནང་ཡུལ་དེའི་སྲིད་འཛིན་ཟུར་པ་དང་ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྐུ་ཞབས་ནེལ་སན་མན་ཌེ་ལ་མཆོག་གི་དུས་དྲན་སྲུང་བརྩི་ཞུ་རྒྱུར་འགྲོ་ཐུབ། འོན་ཀྱང་བློ་ཕམ་པ་ཞིག་ལ་དེ་ལྟར་བྱུང་མེད། ང་ཚོས་ལྷན་ཚོགས་ནས་ཕྱིར་འཐེན་བྱས་པ་དེ་ལྷན་ཚོགས་གོ་སྒྲིག་ཚོགས་ཆུང་ལ་བརྡ་ལན་སྤྲད་པ་གང་ཡང་མིན། ང་ཚོས་བརྡ་ལན་དེ་རྒྱ་ནག་གཞུང་ལ་སྤྲད་ཡོད། ང་ཚོས་བརྡ་ལན་སྤྲོད་ས་དེ་རྒྱལ་ཁབ་ཀྱི་བདག་དབང་རྒྱ་ནག་གཞུང་ལ་འཚོང་མཁན་ལྷོ་ཨ་ཕི་རི་ཀའི་སྲིད་གཞུང་ཆགས་ཡོད། ང་ཚོས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བོད་མི་རྣམ་པའི་རྒྱབ་ལ་ལངས་ཏེ་རྒྱབ་སྐྱོར་ཞུ་བཞིན་ཡོད། འདི་ག་རྡ་སའི་ཁུལ་ཙམ་མ་ཟད། བཙན་དབང་འོག་གནས་བཞིན་པའི་བོད་ནང་གི་གཞིས་ལུས་བོད་མི་རྣམས་ལ་རྒྱབ་སྐྱོར་ཞུ་བཞིན་ཡོད། འོན་ཀྱང་མི་རིང་བར་ང་ཚོ་ཨ་རིའི་མངའ་སྡེ་ཇོར་ཇི་ཡའི་ནང་སླར་ཡང་མཇལ་ཐུབ། ཨ་རིའི་གཞུང་གིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ལ་དུས་རྟག་ཏུ་མཐོང་མཆན་འབུལ་ལམ་ཞུ་བཞིན་ཡོད། འོན་ཀྱང་ཨ་རིའི་གཞུང་གིས་༸གོང་ས་མཆོག་ལ་མཐོང་མཆན་མ་ཕུལ་བའི་ཉིན་མོ་ཞིག་བྱུང་ན། ང་རང་ཨ་རིའི་ཕོ་བྲང་དཀར་པོའི་ཉེ་འགྲམ་དུ་སྡོད་བཞིན་ཡོད་པར་བརྟེན་ཕོ་བྲང་དཀར་པོའི་རྡོ་གཅལ་མདུན་དུ་ཐོན་ནས་ངོ་རྒོལ་བྱེད་རྐྱང་ཡིན།
དེ་རིང་མཛད་སྒོ་འདི་ལྟ་བུར་མགྲོན་འབོད་གནང་བར་ངས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དང་བཀའ་སྤྱི་ལྷན་རྒྱས་ཀྱིས་གཙོས་གཞུང་གི་མཛད་གཙོ་རྣམ་པ་ཚང་མར་བཀའ་དྲིན་ཆེ་ཞུ་རྒྱུ་ཡིན། ང་རང་སྒེར་གྱིས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་མེས་པོ་དམ་པ་གཱན་དྷི་མཆོག་ལྟར་སྙན་གྲགས་ཆེ་བའི་ཞི་བདེའི་དེད་དཔོན་ཞིག་ལ་ངོས་འཛིན་ཞུ་བཞིན་ཡོད། ཅེས་གསུངས།
