༢༠༡༤ ཟླ་ ༡༠ ཚེས་ ༢༣ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༡༠ ཚེས་ ༢༡ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཁེ་ན་ཌའི་གྲོང་ཁྱེར་ཝན་ཁུ་ཝར་ Vancouver ནང་བསམ་བློའི་སློབ་གསོའི་ཐོག་བཀའ་སློབ་སྩལ་འདུག དེ་ཡང་མགོན་པོ་གང་ཉིད་མཆོག་རྒྱ་གར་ནས་ཉི་ཧོང་བརྒྱུད་ཁེ་ན་ཌའི་གྲོང་ཁྱེར་ཝན་ཁུ་ཝར་དུ་༸ཞབས་སོར་བདེ་བར་འཁོད་མཚམས། མཛད་འཆར་གྱི་ཐོག་མར་ཇོན་ཨོ་ལི་ཝར་སློབ་གྲྭར་ཆིབས་སྒྱུར་བསྐྱངས་ཏེ་སློབ་གྲྭའི་འཛིན་གྲྭ་ཆུང་བའི་སློབ་ཕྲུག་རྣམས་ཀྱིས་བཀའ་དྲིན་བསམ་ཤེས་བྱེད་སྟངས་སྐོར་གྱི་བགྲོ་གླེང་ལ་ཐུགས་ཞིབ་མཛད། སྐབས་དེར་༸གོང་ས་མཆོག་ལ་འབྲེལ་ཡོད་ནས་བཀའ་དྲིན་བསམ་ཤེས་བྱ་རྒྱུ་འདིས་ང་ཚོའི་མི་ཚེའི་ནང་ཕན་ཐོགས་ཇི་ཡོད་ཀྱི་དྲི་བ་ཞུས་པར་བཀའ་ལན་སྩལ་དོན། བཀའ་དྲིན་བསམ་ཤེས་བྱ་ཡུལ་ནི་གང་ཟག་གཞན་ཞིག་ཡིན་དགོས་པ་དང་། གང་ཟག་དེས་རང་ཉིད་ལ་ཕན་བཏགས་པ་དེར་ངོས་འཛིན་བྱས་པའི་ཐོག་ནས་བཀའ་དྲིན་ལ་བསམ་ཤེས་བྱ་རྒྱུ་ཟེར་བ་དེ་ཡོང་དགོས། ཞེས་བཀའ་ལན་སྩལ།
དེ་རྗེས་སློབ་ཕྲུག་རྒན་པའི་ཁྲོད་བུད་མེད་སློབ་ཕྲུག་གཅིག་གིས་དྲན་ཤེས་བསྟེན་སྐབས་ཀླད་རྫས་ཀྱི་བྱེད་ལས་ལ་འགྱུར་བ་གང་འདྲ་འགྲོ་བཞིན་ཡོད་མེད་དང་ཀླད་རྫས་རྣམས་འཁྲུག་ཆ་དོད་པོ་ཇི་ལྟར་ཆགས་བཞིན་ཡོད་པ་རྣམས་སློབ་ཕྲུག་གཞན་ཚོས་ཀམ་པུ་ཊར་བརྒྱུད་ཉམས་ཞིབ་བྱས་ཏེ་ལན་སྤྲོད་བཞིན་པ་དེར་ཐུགས་ཞིབ་མཛད། སྐབས་དེར་༸གོང་ས་མཆོག་ལ་ཉིན་ལྟར་བདེ་སྐྱིད་ངང་འཚོ་གནས་ཐུབ་ཐབས་ཆེད་བསམ་བློ་གཏོང་སྟངས་གང་འདྲ་དགོས་སྐོར་གྱི་དྲི་བ་ཞུས་པར་བཀའ་ལན་སྩལ་དོན། གནམ་གྲུ་ས་ནས་ནམ་མཁར་འཕུར་སྐབས་གནམ་གྲུའི་ཆ་ཤས་སྟོང་ཕྲག་མང་པོས་བྱེད་ལས་ལ་རྟེན་ནས་ནམ་མཁར་འཕུར་ཐུབ་པ་ཞིག་ཡོང་བཞིན་ཡོད་པ་ལྟར། ང་ཚོའི་བསམ་བློར་བརྟེན་པའི་སེམས་ཚོར་དང་འབྲེལ་བའི་རྣམ་རྟོག་རིགས་ཧ་ཅང་མང་པོ་ཡོད་ཁོངས་ནས་མང་དག་ཅིག་བློ་མི་མཐུན་ཕྱོགས་ཀྱི་རྐྱེན་པས་སེམས་དཀྲུག་བཞིན་ཡོད་ཀྱང་མཐུན་ཕྱོགས་ཀྱི་རྣམ་རྟོག་རིགས་འགའ་ཤས་ཀྱང་ཡོད། སེམས་ནང་ཞི་བདེ་བག་ཕེབས་ཡོང་དགོས་ན་ང་ཚོས་རྣམ་རྟོག་གི་བྱེད་ལས་དེ་དག་ཤེས་དགོས། དེར་བརྟེན་ང་ཚོར་བསམ་བློའི་ས་ཁྲ་ཞིག་དགོས། ང་ཚོས་ནམ་ཞིག་ཁོང་ཁྲོས་རང་རྒྱུད་དཀྲུག་པ་ཤེས་སྐབས་ཁོང་ཁྲོའི་གཉེན་པོ་གང་ཡིན་ཤེས་དགོས། ཉོན་མོངས་པའི་གཞན་དབང་དུ་སོང་བའི་རྣམ་རྟོག་དེ་དག་གིས་སེམས་ཀྱི་ཞི་བདེར་གནོད་བཞིན་ཡོད། གང་ཡིན་བརྗོད་ན་རྣམ་རྟོག་དེ་དག་གིས་སེམས་ལ་དངངས་སྐྲག་དང་ཁྲག་ཤེད་འཕར་བ་སོགས་ལ་བརྟེན་མཚན་མོ་གཉིད་མི་ཁུག་པ་དང་གཉིད་ཁུག་ཀྱང་རྨི་ལམ་འཁྲུག་པ་སོགས་ཡོང་བཞིན་ཡོད། ཞེད་སྣང་དང་ཁོང་ཁྲོས་ཕུགས་ལ་ང་ཚོའི་འཕྲོད་བསྟེན་ལ་གནོད་བཞིན་ཡོད།
ལྷག་པར་དུས་རྟག་ཏུ་ཀུན་སློང་མ་རུང་པ་ཞིག་འཆང་ནས་བསྡད་ན་མཐའ་ན་གྲོགས་པོ་རག་རྒྱུ་ཚུན་ཆད་ཁག་པོ་རེད། གྲོགས་པོ་བློས་ཐུབ་ཅིག་དགོས་ན་ཡིད་ཆེས་བསླེབས་ཐུབ་པ་དགོས། ཡིད་ཆེས་བསླེབས་པར་བརྩེ་བ་དགོས། ཞེས་སོགས་ཀྱི་བཀའ་ལན་སྩལ།
དེ་རྗེས་སློབ་གྲྭའི་ལུས་རྩལ་ཚོགས་ཁང་ཞིག་ཏུ་དགེ་ལས་སློབ་ཕྲུག་དང་ཕ་མ་བཅས་ཁྱོན་མི་གྲངས་ ༡༤༠༠ བརྒལ་བར་སེམས་ཀྱི་སློབ་གསོ། ཞེས་པའི་བརྗོད་གཞིའི་ཐོག་སློབ་ཕྲུག་ཁག་གཅིག་དང་ལྷན་བགྲོ་གླེང་མཛད་སྐབས་བཀའ་སློབ་སྩལ་དོན། མི་ཚེ་བདེ་སྐྱིད་ལྡན་པ་ཞིག་ཡོང་བར་རྒྱུ་ནོར་ལོངས་སྤྱོད་དང་ཁྱིམ་ཚང་ཕྱུག་པོ་ཡིན་དགོས་པ་གང་ཡང་མེད། རྒྱུ་དང་དབང་ཆས་སེམས་ནང་དངངས་སྐྲག་དང་སེམས་ངལ་སོགས་ཡོང་རྐྱེན་བྱེད་བཞིན་པ་ནི་ཀུན་གྱིས་མཐོང་ཆོས་ཤིག་ཡིན། དུས་རབས་ ༢༡ ནང་འཚེ་བའི་བྱ་སྤྱོད་སོགས་ཀྱི་དཀའ་ངལ་དེ་དག་མིས་བཟོས་པ་ཙམ་མ་ཟད། ཤེས་ཡོན་ཡོད་མཁན་ཚོས་བཟོས་པ་ཞིག་ཆགས་ཡོད། དེར་བརྟེན་དེང་དུས་ཤེས་ཡོན་ལམ་ལུགས་ནང་བཟང་སྤྱོད་ཀྱི་མ་འདང་པའི་ཆ་ཞིག་ཡོད་པ་ཧ་ཅང་གསལ་པོ་རེད། བཟང་སྤྱོད་སྐོར་ང་ཚོས་སློབ་གསོ་ཇི་ལྟར་རྒྱག་ཐུབ། གཞུང་དང་མཉམ་འབྲེལ་རྒྱལ་ཚོགས་ལ་རེ་བ་བཅོལ་ནས་བསྡད་ན་འགྲིག་གི་མེད། ཆོས་ཀྱིས་ཕྲན་བུ་ཕན་ཐོགས་བྱེད་ཐུབ་ཀྱང་འཛམ་གླིང་མི་འབོར་ཐེར་འབུམ་བདུན་ཡོད་པ་ཚང་མར་བསྙབ་མི་ཐུབ། དེར་བརྟེན་ཐབས་ལམ་ཉག་གཅིག་ཡོད་པ་ནི་ཤེས་ཡོན་བརྒྱུད་ནས་བཟང་སྤྱོད་སྤེལ་ཐུབ་པ་བྱ་རྒྱུ་དེ་ཡིན།
དེང་སྐབས་ཤེས་ཡོན་ལམ་ལུགས་ནང་གཙོ་ཆེ་ཕྱི་དངོས་པོའི་འཛུགས་སྐྲུན་ཡར་རྒྱས་གཏོང་ཕྱོགས་ཙམ་ལས་ནང་ཤེས་རྒྱུད་དང་འབྲེལ་བའི་ཡ་རབས་བཟང་སྤྱོད་སོགས་གལ་ཆེ་ཚུལ་སྐོར་ལ་དོ་སྣང་བྱེད་ཀྱི་མེད། ལམ་ལུགས་འདི་ང་ཚོས་བསྒྱུར་བ་གཏོང་དགོས། ལས་གཞི་འདི་འདྲ་ཞིག་སྤེལ་བར་གལ་གནད་ཆེ་ཤོས་ནི་ང་ཚོ་ཚང་མ་འགྲོ་བ་མི་རིགས་ཁྱིམ་ཚང་གཅིག་ཡིན་བསམ་པའི་གཅིག་གྱུར་གྱི་འདུ་ཤེས་བསླེབ་ཐུབ་པ་བྱ་རྒྱུ་ཧ་ཅང་གལ་ཆེན་པོ་ཡིན་པ་ལས། ང་ཚོ་ཕན་ཚུན་དབར་སྐད་ཡིག་དང་རིག་གཞུང་མི་འདྲ་ཙམ་ཡོད་པ་དེ་དག་གཙིགས་ཆེར་འཛིན་ཏེ། ནང་གི་རིན་ཐང་གོང་མཐོར་གཏོང་ཐབས་བྱེད་དགོས་པ་གང་ཡང་མེད། འདས་པའི་མི་ལོ་ ༣༠ ལྷག་རིང་ངོས་ཀྱིས་ཚན་རིག་པ་དང་སྨན་པ། ཀླད་ཁམས་རིག་པའི་མཁས་ཁྱད་མི་སྣ་སོགས་དང་གོ་བསྡུར་བྱས་འབྲས་སུ་བརྩེ་བའི་བསམ་པས་སེམས་ངལ་དང་ཁྲག་ཤེད་ཆུང་དུ་བཏང་ནས་སེམས་ནང་ཞི་བདེ་བསྐྲུན་རྒྱུ་དང་། དེ་ལས་ཟློག་ནས་གལ་ཏེ་སེམས་ནང་དུས་རྟག་ཏུ་ཞེད་སྣང་དང་ཁོང་ཁྲོ། རེ་དོགས་སོགས་ལུ་གུ་རྒྱུད་བཅིངས་ནས་བསྡད་ཚེ་ལུས་ཀྱི་ཟུངས་ཤུགས་ཉམས་རྒྱུ་ཡིན་པ་ར་སྤྲོད་གསལ་པོ་བྱུང་ཡོད། ཅེས་སོགས་ཀྱི་བཀའ་སློབ་དང་མང་ཚོགས་ཀྱི་དྲི་བར་བཀའ་ལན་སྩལ། བགྲོ་གླེང་གྲུབ་བསྟུན་བྱིས་པ་སྲུང་སྐྱོབས་ཚོགས་པས་Lift the Children Foundation༸གོང་ས་མཆོག་ལ་ཉིན་དགུང་གསོལ་སྟོན་འབུལ་ལམ་ཞུས་པ་དགྱེས་བཞེས་མཛད།
གསོལ་སྟོན་གྱི་མཛད་སྒོའི་སྐབས་ཏཱ་ལའི་བླ་མའི་བསྟི་གནས་ཁང་གི་སྦྱིན་བདག་དང་ས་གནས་ཚོགས་པ་སྐྱིད་སྡུག་འདྲ་མིན་ ༣༠༠ འགོ་འཛིན་སོགས་འདུ་འཛོམས་གནང་འདུག སྐབས་དེར་༸གོང་ས་མཆོག་གིས་སྐུ་ཞབས་ཕེ་རེངྐ་གུ་ཡི་སི་ཏྲ་ལགས་དང་ Frank Giustra ཇོན་ཝོལ་ཀེན་ལགས། John Volken ཇ་ཝ་དི་མོ་ཝ་ཕ་གེན་ལགས་ Djavad Mowafaghian བཅས་ཀྱིས་སྤྱི་ཚོགས་ནང་གཞན་གྱི་བདེ་དོན་ཆེད་ད་བར་ཞབས་འདེགས་གཟེངས་སུ་ཐོན་པ་གནང་བར་ངོས་འཛིན་ཆེད་གཟེངས་རྟགས་གསོལ་རས་དང་བཀའ་སློབ།
ཕྱེད་ཡོལ་༸གོང་ས་མཆོག་གིས་ཝན་ཁུ་ཝར་ཚོགས་ཁང་ Vancouver Convention Centre ཆེན་མོའི་ནང་མི་གྲངས་ ༣༠༠༠ བརྒལ་བར་བསམ་བློའི་སློབ་གསོའི་བརྗོད་གཞིའི་ཐོག་བགྲོ་གླེང་ལྷན་ཚོགས་ཀྱི་ཚོགས་མགོན་དུ་ཆིབས་སྒྱུར་བསྐྱངས་སྟེ་བཀའ་སློབ་སྩལ།
