༢༠༡༤ ཟླ་ ༩ ཚེས་ ༥ རེས་གཟའ་པ་སངས།
༄༅། །ལོ་ལྟར་ཕྱི་ཟླ་ ༩ ནང་རྡ་ས་མེག་ལོ་ཌ་གན་ཇིའི་ཡུལ་མི་ཚོས་ཆོས་ཕྱོགས་དང་སྲོལ་རྒྱུན་གྱི་དུས་སྟོན་དང་སྦྲགས། དམངས་ཀྱི་ཁྲོམས་རྭ་བཙུགས་ཏེ་མི་མང་འདུ་འཛོམས་ཆེན་པོ་ཡོང་བཞིན་པ་ལྟར། འདི་ལོར་དུས་སྟོན་སྲུང་བརྩི་ཞུ་ཆེད་ས་གནས་རྒྱ་གར་ཡུལ་མི་ཚོས་ཨབ་ཐང་འགྲན་བསྡུར་ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་སྐུ་མགྲོན་གཙོ་བོར་གདན་ཞུ་གནང་སྟེ། སྲིད་སྐྱོང་མཆོག་གིས་སྦེ་ག་འགྲན་རྩོད་ཨང་དང་པོ་དང་གཉིས་པ་སོགས་ལ་གསོལ་རས་གནང་འདུག
སྐབས་དེར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨ་ཇེ་སིངྒ་མན་ཀོ་ཊི་ཡ་མཆོག་ཀྱང་ཕེབས་ཡོད། དེ་ཡང་སྲིད་སྐྱོང་མཆོག་གིས་སྐབས་དེར་གསུང་བཤད་གནང་དོན། ངོས་རང་ཧིན་སྐད་དེ་ཙམ་ཡག་པོ་ཤེས་ཀྱི་མེད། འོན་ཀྱང་གང་ཤེས་པ་དེ་འབད་བརྩོན་གང་ཡོད་ཐོག་རྒྱག་ཐབས་བྱ་རྒྱུ་ཡིན། ཐོག་མར་དེ་རིང་འདིར་དམངས་ཀྱི་ཁྲོམ་རྭ་གོ་སྒྲིག་གནང་མཁན་གོ་སྒྲིག་ཚོགས་ཆུང་གི་ཚོགས་མི་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱི་གོ་ཐོས་ལ་དམངས་ཀྱི་ཁྲོམ་རྭ་འདི་ལོ་ངོ་ ༢༠༠ ལོ་རྒྱུས་ཡོད་འདུག ལོ་རྒྱུས་འདི་དང་ཧིན་དུའི་གནས་ཆེན་མི་ནི་མ་ཧེ་ཤི་ཞེས་པ་དང་འབྲེལ་བ་ཆེན་པོ་ཡོད་སྐད། དེར་བརྟེན་འདི་ལོའི་ཕྱི་ཟླ་ ༩ ཚེས་ ༢ ཉིན་གནས་དེར་དད་ལྡན་མི་མང་འབུམ་དྲུག་ཙམ་བསྐྱོད་འདུག གནས་དེར་བསྐྱོད་མ་ཐུབ་མཁན་ཚོས་ས་གནས་འདིར་ཆོས་མཇལ་དུ་ཕེབས་ཀྱི་ཡོད། ངོས་ནས་བོད་མི་ཚང་མའི་ཚབ་ཞུས་ཏེ་ཁྱེད་རྣམ་པ་ཚང་མར་བཀའ་དྲིན་ཆེ་ཞུ་རྒྱུ་དང་བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་ཡིན། སྤྱིར་ངོས་ཀྱི་དམངས་ཀྱི་ཁྲོམ་རྭ་རྡ་སར་ནམ་ཚོགས་སྐབས་ཆར་པ་ཉུང་དུ་འགྲོ་རྒྱུ་འགོ་འཛུགས་བྱེད་ཀྱི་ཡོད་པ་ཤེས་ཀྱི་ཡོད།
ང་ཚོ་བཙན་བྱོལ་བོད་མི་རྣམས་༸གོང་ས་༸སྐྱབས་མགོན་ཆེན་པོ་མཆོག་གི་དབུ་ཁྲིད་འོག་རྡ་སར་བསླེབས་ཐུབ་པ་བསོད་ནམས་ཆེན་པོ་རེད་བསམས་བཞིན་ཡོད། ང་ཚོ་ཚང་མ་ཁྱིམ་ཚང་གཅིག་ནང་བཞིན་རེད། ང་ཚོ་ཚང་མ་ལས་དབང་གཅིག་ལྟ་བུ་ཡིན། འདིར་ཚང་མ་མཉམ་ཟ་མཉམ་འཐུང་བྱེད་བཞིན་ཡོད། ཁྱེད་ཚོས་ད་བར་བོད་མི་ཚོར་རོགས་རམ་དང་རྒྱབ་སྐྱོར་ཇི་ཙམ་གནང་བ་དེ་དག་ང་ཚོས་རྩ་བ་ནས་མ་བརྗེད་པར་སེམས་ནང་བཞག་ཡོད། ཕྱོགས་མཚུངས་བོད་མི་ཚོས་རྒྱ་གར་གཞུང་མང་གཉིས་ཀྱི་བཀའ་དྲིན་སྙིང་བཅང་ཐོག་བོད་མིའི་འཐབ་རྩོད་ལམ་ལྷོང་ལྡན་པ་ཞིག་ཡོང་རྒྱུར་ཚང་མས་རྒྱབ་སྐྱོར་གནང་རོགས་ཞུ་རྒྱུ་ཡིན། རྒྱ་གར་གཞུང་མང་གཉིས་ཀྱིས་རྒྱབ་སྐྱོར་ལ་བརྟེན་ནས་བོད་དོན་འཐབ་རྩོད་ལམ་ལྷོང་ལྡན་པ་ཞིག་ཡོང་ཐུབ། སྤྱིར་ས་གནས་འདིར་རྡམ་སཐཱལ་ཞེས་ཆོས་ཀྱི་ཞིང་ཞེས་བརྗོད་པ་དང་བོད་ཀྱི་རྒྱལ་སར་ལྷ་ས་ཞེས་འབོད་ཀྱི་ཡོད། དེར་བརྟེན་ནམ་ཞིག་བོད་དོན་བདེན་མཐའ་གསལ་རྗེས་བོད་མི་ཚོ་ཆོས་ཞིང་ནས་ལྷའི་སར་འགྲོ་རྒྱུ་ཡིན། ངོས་རང་རྒྱ་གར་རང་བཙན་ཉིན་མོ་དང་མང་གཙོའི་དུས་ཆེན་ནམ་ཡིན་སྐབས་རྡ་ཤོད་ཉེན་རྟོག་སྐོར་སྲུང་ལས་ཁུངས་ཀྱི་ཐང་ཆེན་དུ་སྐུ་མགྲོན་དུ་མགྲོན་འབོད་ལྟར་འགྲོ་བཞིན་ཡོད། ང་ཚོ་རྒྱ་གར་གྱི་ཡུལ་ཆུ་བཏུང་། ཡུལ་ཟས་བཟས་ནས་འཚར་ལོང་བྱུང་། དེར་བརྟེན་རྒྱ་གར་ནི་ང་ཚོར་ཧ་ཅང་རྩ་བ་ཆེན་པོ་ཆགས་ཡོད། བོད་མི་ཚོར་དཀའ་ངལ་འཕྲད་སྐབས་རྒྱ་གར་གཞུང་མང་གཉིས་ཀྱི་རོགས་རམ་གནང་བ་བཞིན་གཞན་སུས་ཀྱང་གནང་མེད། དེར་བརྟེན་བོད་མི་སུས་ཀྱང་རྒྱ་གར་གཞུང་མང་གི་བཀའ་དྲིན་ནམ་ཡང་བརྗེད་ཐབས་མེད། ད་ལྟ་ང་ཚོ་རྒྱ་གར་གྱི་སྐུ་མགྲོན་ཆགས་ཡོད། ནམ་ཞིག་བོད་ལ་རང་དབང་གི་ཉི་མ་འཆར་ཚེ་ཁྱེད་རྣམས་ལྷ་སར་སྐུ་མགྲོན་དུ་མགྲོན་འབོད་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་འདུག
