༢༠༡༤ ཟླ་ ༩ ཚེས་ ༡༣ རེས་གཟའ་སྤེན་པ།

༄༅། །ཕྱི་ལོ་ ༢༠༡༤ ཟླ་ ༩ ཚེས་ ༡༢ ཉིན་ཨ་རི་མི་ནི་སོ་ཊ་བོད་རིགས་སྤྱི་མཐུན་ཚོགས་པས་ལྷོ་ཨ་ཕི་རི་ཀའི་ཕྱི་སྲིད་བློན་ཆེན་ལྕམ་སྐུ་མ་ཏེ་ནོ་ན་མ་ཤབ་བྷ་ནེ་མཆོག་ (Ms Maite Nkoana-Mashabane) ལ་སྙན་ཞུ་ཞིག་ཕུལ་བ་བརྒྱུད་༸གོང་ས་༸སྐྱབས་མགོན་ཆེན་པོ་མཆོག་ཡུལ་དེར་ཆིབས་སྒྱུར་བསྐྱང་ཆེད་མཐོང་མཆན་འབུལ་ལམ་ཞུ་དགོས་པའི་འབོད་སྐུལ་སྙན་ཞུ་ཕུལ་འདུག དེ་ཡང་སྙན་ཞུའི་ནང་དོན་ལྟར་ན།

ནོ་བེལ་ཞི་བདེའི་གཟེངས་རྟགས་བཞེས་མྱོང་མཁན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ནི་རྒྱལ་སྤྱིའི་ནང་འཚེ་མེད་ཞི་བ་དང་འཁོན་འཛིན་སེལ་བའི་འཆམ་མཐུན་གྱི་སྤྱི་ཚོགས་སྐྲུན་མཁན་ཞིག་ཡིན་པར་ཡོངས་གྲགས་སུ་ངོས་འཛིན་ཞུ་བཞིན་ཡོད། དེར་བརྟེན་འབྱུང་འགྱུར་ལྷོ་ཨ་ཕི་རི་ཀའི་ནང་ནོ་བེལ་ཞི་བདེའི་ལྷན་ཚོགས་འཚོགས་རྒྱུ་ཡིན་པར་ཆིབས་སྒྱུར་བསྐྱང་རྒྱུར་མཐོང་མཆན་འབུལ་ལམ་ཞུ་དགོས་པ་ལས། རང་དབང་དང་མང་གཙོ་ལྡན་པའི་ལྷོ་ཨ་ཕི་རི་ཀའི་སྲིད་གཞུང་གིས་རྒྱ་ནག་གི་གནོན་ཤུགས་འོག་ཚུད་ནས་༸གོང་ས་མཆོག་ལ་མཐོང་མཆན་འབུལ་ལམ་མ་ཞུས་པ་ནི་བློ་ཡུལ་ལས་འདས་པ་ཞིག་ཡིན་པ་མ་ཟད། རྒྱལ་སྤྱིའི་སྟེང་ལྷོ་ཨ་ཕི་རི་ཀའི་རྒྱལ་ཁབ་ལ་མཚན་ཤས་འགྲོ་རྒྱུ་དང་། ལྷོ་ཨ་ཕི་རི་ཀའི་མང་གཙོ་དང་ཆབ་སྲིད་འདྲ་མཉམ། རིག་གཞུང་གི་རིན་ཐང་ཆེད་འཐབ་རྩོད་ནང་ཞུགས་ནས་བློས་གཏོང་ཆེན་པོ་གནང་མཁན་རྒྱལ་ཞེན་དཔའ་མཛངས་ལྡན་པའི་མི་རབས་རྣམས་ཀྱིས་ཡུན་རིང་བློས་གཏོང་གནང་བའི་བྱས་རྗེས་ལ་མཐོང་ཆུང་ཁྱད་གསོད་འགྲོ་རྒྱུ་ཡིན།

ལྷག་པར་སྐུ་ཉིད་ཀྱི་སྲིད་གཞུང་ནས་༸གོང་ས་མཆོག་ལ་མཐོང་མཆན་འབུལ་ལམ་མ་ཞུས་པ་འདི་ནི་ལྷོ་ཨ་ཕི་རི་ཀའི་རྒྱལ་ཡོངས་ཀོངྒ་རེ་སི་ཚོགས་པས་ཆབ་སྲིད་ཀྱི་འཐབ་རྩོད་དང་འགྲོ་བ་མིའི་ཐོབ་ཐང་ཆེད་འཐབ་རྩོད་གནང་བ་དེར་རྩིས་མེད་རྡོག་རོལ་བཏང་བ་ཞིག་ཆགས་ཏེ། ལྷོ་ཨ་ཕི་རི་ཀའི་མི་མང་ཙམ་མ་ཟད། རང་དབང་ལ་དགའ་བའི་མི་མང་རྣམས་བློ་ཕམ་ཆེན་པོ་ཡོང་རྒྱུ་གདོན་མི་ཟ། དེར་བརྟེན་ལྷོ་ཨ་ཕི་རི་ཀའི་སྲིད་གཞུང་གིས་༸གོང་ས་མཆོག་ལ་མཐོང་མཆན་འབུལ་ལམ་ཞུས་ཏེ་ཕེབས་བསུ་གཟབ་རྒྱས་ཞུ་རྒྱུར་ང་ཚོས་འབོད་སྐུལ་ཤུགས་དྲག་ཞུ་རྒྱུ་ཡིན། ལྷོ་ཨ་ཕི་རི་ཀའི་སྲིད་གཞུང་ནས་དེ་སྔའི་ཐག་གཅོད་ལ་བསྒྱུར་བཅོས་གནང་ནས་༸གོང་ས་མཆོག་ལ་མཐོང་མཆན་འབུལ་ལམ་ཞུ་ཐུབ་པ་ཡིན་ན་ང་ཚོས་སྙིང་ཐག་པ་ནས་བསྔགས་བརྗོད་དང་རྗེས་སུ་ཡི་རང་ཞུ་རྒྱུ་ཡིན། ཞེས་འཁོད་འདུག