༢༠༡༤ ཟླ་ ༩ ཚེས་ ༡༣ རེས་གཟ་སྤེན་པ།
༄༅། །འདི་གར་ཕྱི་ལོ་ ༢༠༡༤ ཟླ་ ༩ ཚེས་ ༡༠ ཉིན་ཕ་རན་སི་ས་གནས་བོད་རིགས་ཚོགས་པ་དང་། ཕ་རན་སི་ས་གནས་བོད་ཀྱི་གཞོན་ནུ་ཚོགས་པ། ཕ་རན་སི་ས་གནས་བོད་རང་དབང་སློབ་ཕྲུག་ཚོགས་པ་བཅས་ཐུན་མོང་ནས་བཏང་གནས་ནང་འཁོད་དོན།
ཕྱི་ལོ་ ༢༠༡༤ ཟླ་ ༩ ཚེས་ ༡༠ ཉིན་ཕ་རན་སི་བོད་རིགས་ཚོགས་པ་དང་། ས་གནས་གཞོན་ནུ་ཚོགས་པ། ས་གནས་བོད་རང་དབང་སློབ་ཕྲུག་ཚོགས་པ་བཅས་ཐུན་མོང་ནས་བསམ་པ་གཅིག་མཐུན་གྱིས་ཉེ་དུས་ཕ་རན་སི་བསྟན་སྲུང་ཚོགས་པ་ཞེས་པའི་གཙོ་གྱུར་དོལ་རྒྱལ་རྗེས་འབྲང་པ་བོད་མི་ཆེས་ཉུང་ཤས་མཛུབ་མོར་གྲངས་ཐེབས་པ་དེ་དག་དང་། དེའི་བསླུ་བྲིད་འོག་ཚུད་པའི་ཕྱི་རྒྱལ་བ་མི་སྣ་ཁག་གཅིག་གིས་བོད་མིའི་བླ་ན་མ་མཆིས་པ་ལྷར་བཅས་སྲིད་ཞིའི་གཙུག་རྒྱན༌སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཡུ་རོབ་དང་། ཨ་རི་སོགས་ཕྱི་རྒྱལ་ཡུལ་གྲུ་ཁག་ལ་ཆིབས་སྒྱུར་བསྐྱངས་སྐབས་གཞི་མེད་ཀྱི་མཚན་སྨད་དང་ངོ་རྒོལ་ཞུས་དང་ཞུ་བཞིན་པའི་བྱ་སྤྱོད་ལ་བློ་ཕམ་ངང་ཐོག་མཐའ་བར་གསུམ་ལ་མཐའ་གཅིག་ཏུ་ངོ་རྒོལ་གྱིས་གྲོས་ཆོད་བཞག་པའི་འབྲུ་དོན་གཤམ་གསལ།
༡༽ བོད་མིའི་བླ་ན་མེད་པའི་དབུ་ཁྲིད། ཚེ་འདི་ཕྱི་གཉིས་ཀྱི་༸སྐྱབས་གནས། འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་རྒྱལ་དབང་ཐམས་ཅད་མཁྱེན་ཅིང་གཟིགས་པ་ཆེན་པོ་མཆོག་ལ་དོལ་རྒྱལ་རྗེས་འབྲང་པས་སྐུའི་གསང་གསུམ་ལ་གཞི་མེད་མཚན་སྨད་དང་ངོ་རྒོལ་ཞུས་དང་ཞུ་བཞིན་པ་རྣམས་མྱུར་དུ་མཚམས་འཇོག་དགོས།
༢༽སྤྱིར་ཕ་རན་སི་བོད་རིགས་སྤྱི་ཡོངས་ཁྲོད་དོལ་རྒྱལ་སྟེན་མཁན་ཧ་ལམ་མེད་པ་མ་ཟད། མགོན་པོ་གང་ཉིད་ལ་སྙིང་ནས་དད་གུས་དང་ནམ་རྒྱུན་བླང་དོར་ཞུ་མཁན་ཤ་སྟག་ཡིན་ཅིང་། དབུས་བོད་མིའི་སྒྲིག་འཛུགས་ལ་བརྩི་བཀུར་དང་ལམ་སྟོན་ཁག་ལ་བཀའ་གསུང་ཅི་སྒྲུབ་ཞུ་མུས་ཡིན་པས། ས་གནས་བོད་རིགས་མི་མང་ཡོངས་ཀྱི་སྐུ་ཚབ་མཚོན་པའི་ཚོགས་པས་དེ་རིང་འདི་ནས་སྤོབས་པ་ཆེན་པོའི་ཐོག་གསལ་བསྒྲགས་ཞུ་རྒྱུ་ཡིན། ད་ལམ་ཕ་རན་སིའི་བསྟན་སྲུང་ཚོགས་པ་ཞེས་པའི་མིང་ཐོག་ནས་དོལ་རྒྱལ་རྗེས་འབྲང་བ་ཉུང་ཤས་ཤིག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་མཚན་སྨད་དང་ངོ་རྒོལ་ཞུས་པ་དེར་བོད་རིགས་ཡོངས་ནས་མཐའ་གཅིག་ཏུ་ངོལ་རྒོལ་ཡོད།
༣༽བོད་རྒྱལ་ཁབ་དང་བོད་མི་རིགས་ཀྱི་ལོ་རྒྱུས་ནང་ཆེས་གཉན་འཕྲང་ཅན་གྱི་དུས་སྐབས་འདིར་གཞིས་བཞུགས་རྒྱ་ཆེའི་མི་མང་གི་སྙིང་སྟོབས་དང་ལྷག་བསམ། མི་རིགས་ཀྱི་ལ་རྒྱ་ནི་བསམ་ཡུལ་ལས་འདས་པ་ཞིག་ཡོད་པ་བརྗོད་མི་དགོས་པ་དང་། ལྷག་པར་བོད་བསྟན་སྲིད་མི་རིགས་ཀྱི་ཆེད་བོད་མི་སྟོང་ཕྲག་ལྷག་ད་དུང་རྒྱ༌དམར་གྱི་བཙོན་འོག་ཏུ་ཉིན་མཚན་འཁྱོལ་དཀའ་བའི་དཀའ་སྡུག་མྱོང་བཞིན་ཡོད་པ་མ་ཟད། བོད་མི་བརྒྱ་ལྷག་གིས་རང་ལུས་མེར་སྲེག་བཏང་སྟེ། བོད་ནང་གི་དཀའ་སྡུག་རྒྱལ་སྤྱིའི་ཁྱོན་དུ་བདེན་དོན་གསལ་ཐབས་བྱེད་པའི་གནས་སྟངས་དེ་འདྲའི་སྐབས་སུ། རང་དབང་ལུང་པར་དེ་ལས་ཟློག་སྟེ་བོད་མི་ཁག་གཅིག་རྒྱ་ནག་གཞུང་གིས་སྲིད་དོན་གྱི་ལག་ཆར་བོད་སྤྱད་དེ་དངུལ་དངོས་ཀྱི་མགོ་སྐོར་བསླུ་བྲིད་འོག་ཚུད་པའི་བསམ་མེད་དོལ་རྒྱལ་རྗེས་འབྲང་པས་༸གོང་ས་༸སྐྱབས་མགོན་ཆེན་པོ་མཆོག་ལ་གཞི་མེད་མཚན་སྨད་ཞུས་པ་དང་། བོད་བསྟན་སྲིད་དང་བོད་མི་རིགས་ལ་གནོད་པའི་བྱ་སྤྱོད་ལས་འགུལ་སྤེལ་བཞིན་པ་འདི་རིགས་ལ་འདི་ནས་ངོ་རྒོལ་མཐའ་གཅིག་ཏུ་བྱ་རྒྱུ་མ་ཟད། འདི་ག་ཚོགས་པ་ཁག་གི་རྒྱུན་ལས་དང་ཚོགས་མི་རྣམས་དོལ་རྒྱལ་དང་འབྲེལ་བ་གཏན་ནས་མེད་པ་དང་། དོལ་རྒྱལ་རྗེས་འབྲང་པའི་ལས་གུལ་འདི་རིགས་མྱུར་དུ་མཚམས་འཇོག་དགོས་པའི་ནན་བསྐུལ་བྱ་རྒྱུ་བཅས།།
