༢༠༡༤ ཟླ་ ༩ ཚེས་ ༢༢ རེས་གཟའ་ཟླ་བ།
ཆོས་བརྡ།
༄༅། །ཕྱི་ལོ་ ༢༠༡༤ ཟླ་ ༩ ཚེས་ ༢༩ ནས་ཟླ་ ༡༠ ཚེས་ ༣ བར་ཉིན་གྲངས་ལྔའི་རིང་རྡ་ས་ཐེག་ཆེན་གཙུག་ལག་ཁང་དུ་དྭང་སློབ་ཀྱི་གོ་སྒྲིག་འོག་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དབུས། བསྟན་འཛིན་སྐྱེས་བུ་ཐམས་ཅད་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ། བོད་མིའི་བདེན་མཐའ་མགྱོགས་ནས་མྱུར་དུ་གསལ་ཞིང་གཞིས་བྱེས་མཉམ་འཛོམས་རང་དབང་བདེ་སྐྱིད་དཔལ་ལ་རོལ་ཐུབ་པ་སོགས་ལ་དམིགས་ཏེ། མཧཱ་གུ་རུའི་འབུམ་ཚོགས་འབུལ་གཤོམ་གནང་རྒྱུ་ཡིན་འདུག དེ་ཡང་ཆོས་རིག་ལས་ཁུངས་ནས་སྤེལ་བའི་གསལ་བསྒྲགས་ནང་འཁོད་དོན། རང་རིགས་དྭང་སློབ་འགོ་དམངས་ཡོངས་ནས་༸རྒྱལ་བའི་བསྟན་པ་རིན་པོ་ཆེ་གནས་དུས་ཀུན་ཏུ་དར་ཞིང་འཕེལ་བ་དང་། བསྟན་པ་དེ་འཛིན་ཀུན་གྱི་གཙུག་རྒྱན་བོད་མིའི་བླ་ན་མེད་པའི་དབུ་ཁྲིད་ཁམས་གསུམ་ཆོས་ཀྱི་རྒྱལ་པོ་༸གོང་ས་༸སྐྱབས་མགོན་ཐམས་ཅད་མཁྱེན་པ་མཆོག་གིས་དབུས། བསྟན་འཛིན་སྐྱེས་བུ་ཐམས་ཅད་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་ལྷུན་གྱིས་འགྲུབ་པ། བོད་མིའི་བདེན་མཐའ་མགྱོགས་ནས་མྱུར་དུ་གསལ་ཞིང་གཞིས་བྱེས་མཉམ་འཛོམས་རང་དབང་བདེ་སྐྱིད་དཔལ་ལ་རོལ་ཐུབ་པ་སོགས་ལ་དམིགས་ཏེ་ལོ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་རྡ་ས་ཁུལ་གྱི་གཉུག་མར་གནས་པ་དང་། གློ་བུར་ལྷགས་པའི་དགེ་བཙུན་སྔགས་གསུམ་གདན་འདྲེན་བསྙེན་བཀུར་ཞུ་བ་དང་བསྟུན། བྱང་གཏེར་རིག་འཛིན་གདུང་སྒྲུབ་ཀྱི་སྒོ་ནས་མ་ཧཱ་གུ་རུའི་འབུམ་ཚོགས་གནད་སྨིན་འབད་སྒྲུབ་གནང་གི་ཡོད་པ་གཞིར་བཅས། ད་ལོའི་དྭང་སློབ་འབུམ་ཚོགས་དེ་ཉིད་བོད་ཟླ་ ༨ ཚེས་ ༥ ནས་ ༡༠ བར་ཏེ། ཕྱི་ལོ་ ༢༠༡༤ ཟླ་ ༩ ཚེས་ ༢༩ ནས་ཟླ་ ༡༠ ཚེས་ ༠༣ བར་ཉིན་ལྔའི་རིང་ཐེག་ཆེན་ཆོས་གླིང་གཙུག་ལག་ཁང་དུ་ཚོགས་གཏན་འཁེལ་འདུག་ཅིང་། སྔ་དགོང་ཚོགས་ཐུན་སྔ་དྲོའི་ཆུ་ཚོད་ ༦་༣༠ ནས་ ༡༢་༠༠ བར་དང་། ཉིན་རྒྱབ་ཆུ་ཚོད་ ༡་༣༠ ནས་ ༤་༣༠ བར་ཡིན་པ་དང་། ཞོགས་པའི་གསོལ་ཇ་དང་ཉིན་གུང་གསོལ་ཚིགས་བཅས་པ་ནར་གཏོང་ཞུ་རྒྱུ་རེད་འདུག་ན། སྐྱབས་གནས་དགེ་འདུན་རྣམ་པ་དང་མང་ཚོགས་རྣམས་ནས་དེ་ཉིན་བོད་དོན་སྤྱི་རིམ་གལ་ཆེ་ཞིག་ཏུ་བརྩིས་ནས་ཚོགས་བཅར་མཉམ་ཞུགས་ངེས་གནང་ཡོང་བ་རྣམ་མངའ་འཚལ། ཞེས་ཆོས་རིག་ལས་ཁུངས་ནས་ཆོས་བརྡ་སྤེལ་འདུག་པ་ཞུ་རྒྱུ་བཅས།
