༢༠༡༤ ཟླ་ ༩ ཚེས་ ༢༢ རེས་གཟའ་ཟླ་བ།
༄༅། །མདོ་སྟོད་ཁམས་ཆབ་མདོ་ཚ་བ་དཔའ་ཞོད་རྫོང་དཀྱིལ་དག་ཤང་གྲོང་གསར་སྡེ་པའི་གྲོང་གསར་དགོན་གྱི་རང་ལོ་ ༢༡ སོན་པའི་གྲྭ་བློ་བཟང་དགེ་འདུན་ལགས་སུ་ལོ་བཅུ་གསང་བའི་ཐོག་ནས་ཁྲིམས་ཐག་བཅད་ཡོད་འདུག
དེ་ཡང་བརྒྱུད་ལམ་ཁག་གཅིག་གི་ནང་གནས་ཚུལ་ཐོན་གསལ་ལྟར་ན། ཕྱི་ལོ་ ༢༠༡༣ ཟླ་ ༧ ཚེས་ ༡ ཉིན་ཆབ་མདོ་རྫོང་དུ་རྒྱ་ནག་དམར་ཤོག་ཚོགས་པ་དབུ་བརྙེས་པའི་ཉིན་མོ་སྲུང་བརྩི་མཛད་སྒོའི་ཐོག་གྲྭ་བློ་བཟང་དགེ་འདུན་ལགས་ཀྱིས་ ༼༸རྒྱལ་བ་བསྟན་འཛིན་རྒྱ་མཚོ་སྐུ་ཚེ་ཁྲི་ལོར་བརྟན་པར་ཤོག བོད་རང་དབང་རང་བཙན་ཡིན།༽ ཞེས་རྒྱ་གཞུང་གི་བཙན་གནོན་ལ་ཞི་བའི་ངོ་རྒོལ་སྐད་འབོད་གནང་རྗེས། ཉེན་རྟོག་པས་ཁོང་འཛིན་བཟུང་བཙན་འཁྲིད་བྱས་ཏེ་ཆབ་མདོ་བཙོན་ཁང་ནང་བཀག་ཉར་བྱས་ཡོད་པ་མ་ཟད། གྲོང་གསར་དགོན་དུ་ཉེན་རྟོག་པ་དང་དམག་མི་མང་པོ་བསླེབས་ཏེ་དམ་བསྒྲགས་བྱེད་འགོ་བཙུགས་ཡོད་འདུག
ཕྱི་ལོ་ ༢༠༡༤ ཟླ་ ༩ ཚེས་ ༡༢ ཉིན་གྲྭ་བློ་བཟང་དགེ་འདུན་ལགས་ཀྱིས་ཁོ་རང་ལ་རྒྱ་གཞུང་ནས་ལོ་བཅུ་ཁྲིམས་ཐག་བཅད་ཡོད་སྐོར་ཁོང་གི་སྤུན་ཉེ་ཞིག་ལ་བརྗོད་ཡོད་འདུག་ཀྱང་། བཙོན་ཁང་གང་དུ་བཀག་ཉར་བྱས་ཡོད་པ་ད་ལྟའི་ཆར་ཤེས་རྟོགས་ཐུབ་མི་འདུག
འདི་ལོའི་ཕྱི་ཟླ་དང་པོའི་ནང་རྒྱ་གཞུང་གིས་གྲྭ་བློ་བཟང་དགེ་འདུན་ལགས་ཀྱི་ཕ་མ་གཉིས་ཆབ་མདོའི་ཁྲིམས་ཁང་དུ་སྐད་བཏང་སྟེ། ཁོ་རང་ལ་ནག་ཉེས་ངོས་ལེན་བྱེད་དགོས་པའི་སློབ་གསོ་རྒྱག་དགོས་པར་བརྗོད་ཡོད་འདུག་ཀྱང་། ཁོང་གིས་ནག་ཉེས་ངོས་ལེན་མ་བྱས་པར། རྒྱ་ནག་གཞུང་གིས་བོད་ཐོག་འཛིན་པའི་སྲིད་བྱུས་ལ་བསྐྱར་ཞིབ་དང་གུ་ཡངས་སུ་གཏོང་རྒྱུའི་འབོད་སྐུལ་ཞུས་ཡོད་འདུག ཕ་མ་གཉིས་ཁྲིམས་ཁང་དུ་གྲྭ་བློ་བཟང་དགེ་འདུན་ལགས་ཐུག་སྐབས་ཁོང་གི་གཟུགས་པོའི་གནས་སྟངས་ཧ་ཅང་སྐྱོ་བོ་ཡོད་པ་དང་ཡར་ལངས་ཐུབ་ཀྱི་མེད་པ་མཐོང་ཡོད་འདུག གྲྭ་བློ་བཟང་དགེ་འདུན་ལགས་ཀྱི་ཕ་མིང་ལ་སྐལ་བཟང་དང་མ་མིང་ལ་དཔལ་འཛོམས་བརྗོད་ཀྱི་ཡོད་འདུག་ཅིང་། ཁོང་གི་སྐྱ་མིང་ལ་རྒྱ་རྡོ་དང་ཆོས་མིང་ལ་བློ་བཟང་དགེ་འདུན་བརྗོད་ཀྱི་ཡོད་འདུག་པ་བཅས། །
